كاسىبي تەاترى جوق اۋداندارداعى ونەر كورسەتىپ جۇرگەن حالىق تەاترلارى جەرگىلىكتى جۇرتتىڭ مادەني ومىرىنە ءار بەرىپ, رۋحاني-ەستەتيكالىق سۇرانىسىنا ساي قىزمەت ەتۋگە تىرىسىپ كەلەدى. اۋداندا وتكەن بايقاۋعا ۇسىنىلعان قويىلىمدار مەن تەاتر ۇجىمدارىنىڭ ساحناداعى شەبەرلىك دەڭگەيى دە كوپشىلىكتى ءتانتى ەتتى. تەاترلاردىڭ رەپەرتۋارىندا جاستاردى وتانسۇيگىشتىككە تاربيەلەيتىن زاماناۋي شىعارمالاردىڭ بولۋىنا, سونىمەن قاتار تەاترلاردىڭ ونەرىن ناسيحاتتاۋ, ءبىر-بىرىمەن تاجىريبە الماسۋ, شەبەرلىك ساعاتتارىن وتكىزۋ جانە شىعارماشىلىق بايلانىستى نىعايتۋعا ىقپال ەتۋ ماقساتىنداعى بايقاۋدا قازىلار القاسىنىڭ شەشىمىمەن باس جۇلدەنى «كەلەس» حالىق تەاترى يەلەندى. جۇلدەلى ءى ورىندى شىمكەنت قالاسىنىڭ «دۋمان» حالىقتىق جاستار تەاترى, ءىى ورىندى «تەمىرلان» حالىق تەاترى, «سايرام» اۋداندىق قازاق حالىق تەاترى, سارىاعاش اۋدانى حالىقتىق دراما ۇجىمى يەلەندى. جۇلدەلى ءىىى ورىندى ورداباسى اۋداندىق مادەنيەت ءۇيى جانىنان قۇرىلعان «جاس تولقىن» بالالار مەن جاسوسپىرىمدەر ۇلگىلى تەاترى, «شاردارا», «اسىقاتا», «وتىرار» حالىق تەاترلارى ءوزارا ءبولىستى. سونداي-اق بىرقاتار تەاتر ۇجىمى ارنايى جۇلدەمەن جانە العىس حاتتارمەن ماراپاتتالدى.
ايتا كەتەيىك, ءداستۇرلى بايقاۋ وبلىستىق مادەنيەت باسقارماسى, ورداباسى اۋدانى اكىمدىگىنىڭ باستاماسىمەن اۋداننىڭ 60 جىلدىعى, «تەمىرلان» حالىق تەاترىنىڭ 50 جىلدىعىنا وراي وتكىزىلىپ وتىر. ءداستۇرلى بايقاۋدى كەلەسى جىلى وتكىزۋ ءۇشىن ەستافەتانى وتىرار اۋدانى قابىلدادى.
تۇركىستان وبلىسى
