قۇرىلىس قارقىن العان جىل
وبلىس ورتالىعىنان بولەك, اۋدان-اۋىلداردا ساۋلەتتى عيماراتتاردىڭ كوپتەپ بوي كوتەرگەنى ايماقتىڭ قۇرىلىس سالاسىنداعى ىلگەرىلەۋشىلىكتى ايعاقتايدى. بيىلدىڭ وزىندە وڭىردە ءتۇرلى نىسان مەن تۇرعىن ءۇي قۇرىلىسىنا 180 ملرد تەڭگەدەن استام قارجى ءبولىندى. كوكتەمدە جىل ساناپ قونىستانۋشىلار قاتارى كوبەيىپ كەلە جاتقان سول جاعالاۋدا زاماناۋي ۇلگىدەگى جاڭا اۆتوۆوكزال اشىلدى. سالادا جاڭا ەكونوميكالىق كەڭىستىك قالىپتاستىرۋدىڭ ماڭىزىن مەملەكەت باسشىسى ق.توقاەۆ «ادىلەتتى قازاقستاننىڭ ەكونوميكالىق باعدارى» اتتى جولداۋىندا: «كولىك-لوگيستيكا سالاسى ەكونوميكامىزدى العا باستايتىن باستى كۇشتىڭ بىرىنە اينالۋعا ءتيىس» دەپ اتاپ وتكەن بولاتىن. بيۋدجەت قارجىسى ەسەبىنەن 975 ملن تەڭگەگە سالىنعان عيماراتتا جولاۋشىلار مەن جۇرگىزۋشىلەرگە, مۇمكىندىگى شەكتەۋلى ازاماتتارعا بارلىق جاعداي قاراستىرىلعان.
ءساۋىر ايىندا اشىلعان اۆتوۆوكزالدان كۇنىنە 200-400 جولاۋشى 38 باعىتقا, ءار تاراپقا جول تارتادى. جولاۋشىلاردى تۇسىرەتىن 6, ساپارعا شىعاتىندارعا ارنالعان 11 پەررون بار. بۇگىندە ارال, قازالى, تورەتام, قارماقشى, بەكارىستان بي باعىتتارىنا جول ءجۇرۋ بيلەتتەرى اۆتوۆوكزالدان, تەمىرجول ۆوكزالى الاڭىنان ساتىلىپ جاتىر.
جىل ۇلەسىندەگى تاعى ءبىر جاڭالىق – قالانىڭ وسى اۋماعىنان قان ورتالىعى اشىلدى. جىل سايىن وڭىردە 10 مىڭنان اسا تۇرعىن قان تاپسىرادى ەكەن. ەندى جاڭا ورتالىق مەديتسينالىق ۇيىمداردىڭ سۇرانىسىنا ساي 17 مىڭ دوزادان استام قان كومپونەنتتەرىن دايىنداماق.
تۇراقتاندىرۋ قورى قامسىز ەمەس
قىزىلوردادا «جان اراي» اتتى اگرو-يندۋستريالدى كەشەن بار. كۇرىش ءوندىرىسى, كۇرىش جارماسىن حالىقارالىق ستاندارتتار بويىنشا وڭدەۋمەن قاتار قۇراما جەم وندىرۋمەن اينالىساتىن سەرىكتەستىك قۇرىلتايشىسى – بەلگىلى كاسىپكەر باعداۋلەت ماقاشوۆ. «بايقوڭىر» اكك» اق كەلىسىم نەگىزىندە وسى سەرىكتەستىك قويماسىندا تۇراقتاندىرۋ قورىنا تيەسىلى ونىمدەردى ساقتاپ وتىر.
«مۇندا ساقتالعان ونىمدەر 3 ايعا جەتەدى. ولار تىكەلەي وندىرۋشىدەن الىنعان. بىلتىر كۇرىش باعاسى 480 تەڭگەگە كوتەرىلىپ كەتكەندە بىزدە 350 تەڭگە بولدى. بازاردا ماكارون باعاسى وسكەنىنە قاراماستان, ءبىز 35 الەۋمەتتىك دۇكەن ارقىلى 270 تەڭگەدەن ەلگە ۇسىنامىز. ولاردان بولەك, ءىرى ساۋدا ورىندارىندا الەۋمەتتىك بۇرىشتارىمىز بار. وبلىستىڭ 11 شارۋاشىلىعى فورۆاردتىق كەلىسىم نەگىزىندە بىزگە ونىمدەرىن وتكىزەدى. بۇل قاجەتتى تاۋاردى شەتتەن ىزدەمەي وزىمىزدەن تابۋعا مۇمكىندىك بەرىپ وتىر. كەلىسىم نەگىزىندە بىلتىردان باستاپ كارتوپ پەن ءسابىزدى جەرگىلىكتى شارۋاشىلىقتار جەتكىزە باستادى. الداعى ۋاقىتتا كۇرىش پەن تۇزدان باسقا, وزىمىزدە وندىرىلگەن كوكونىس ونىمدەرىن كوبەيتە تۇسەمىز», دەيدى تۇراقتاندىرۋ قورىنىڭ باسقارما باسشىسى مەيرامبەك سەرىكباي.
جالپى, بۇل قويمادا 1500 تونناعا دەيىن جەمىس ساقتاۋعا مۇمكىندىك بار. ونىڭ 1120 تونناسىن توڭازىتقىشقا ساقتاۋ قاراستىرىلعان.
العاشقى «جايلى مەكتەپ»
مەملەكەت باسشىسىنىڭ باستاماسىمەن قولعا الىنعان «جايلى مەكتەپ» ۇلتتىق جوباسى اياسىندا وڭىردە 21 مەكتەپ سالىنادى. بۇگىندە سولاردىڭ ونىنىڭ قۇرىلىسى ءجۇرىپ جاتىر. وسى ارقىلى ايماقتاعى 4 اپاتتى, 3 بەيىمدەلگەن مەكتەپتىڭ ماسەلەسى تۇبەگەيلى شەشىمىن تابادى.
جالپى, وبلىستا الەۋمەتتىك ماسەلەلەردى وڭىنان شەشۋدە جەكە كومپانيالاردىڭ دا كومەگى كوپ. مىسالى, وسى اۋداندا «ساۋتس ويل» كومپانياسىنىڭ دەمەۋشىلىگىمەن مۋزىكالىق كوللەدج عيماراتى بوي كوتەرىپ كەلەدى.
قالادا 10 ملرد 900 ملن تەڭگەگە سالىنىپ جاتقان «شىعارماشىلىق يننوۆاتسيالىق ورتالىقتا» بالالاردى سپورتتىق ساۋىقتىرۋدان بولەك, كوركەم-ەستەتيكالىق, عىلىمي-تەحنيكالىق, تاريحي-ولكەتانۋ, گۋمانيتارلىق باعىتتا دامىتۋ كوزدەلىپ وتىر. فۋتبول, باسكەتبول, ۆولەيبول, ۆوركاۋت الاڭدارى, باسسەين, سوڭعى ۇلگىدەگى ماتەريالدىق-تەحنيكالىق بازامەن جابدىقتالعان كابينەتتەر جۇمىس ىستەيدى.
قۇنى 8 ملرد 400 ملن تەڭگە بولاتىن دارىندى بالالارعا ارنالعان 400 ورىندىق فيزيكا-ماتەماتيكا مەكتەپ-ينتەرناتى ء«بىلىمدى قولداۋ قورى» ەسەبىنەن سالىنىپ جاتىر. جاقىن ارادا قولدانىسقا بەرىلەتىن وقۋ ورنى ەرتەڭ ەل دامۋىنا وزىندىك ۇلەس قوساتىن مامانداردى مەكتەپتەن ازىرلەۋگە سەپتىگىن تيگىزبەك. مەكتەپ-ينتەرنات جانىندا 300 ورىنعا ارنالعان جاتاقحانا بولادى.
بالاعا جاعداي جاساعان
بۇگىندە وبلىستا 62 قوسىمشا ءبىلىم بەرۋ ۇيىمى جۇمىس ىستەيدى. ونداعى ۇيىرمەلەرگە 60 مىڭنان استام وقۋشى قاتىسادى. كوكورىم بالالاردىڭ كوكجيەگىن كەڭەيتەتىن وسىنداي ورتالىقتىڭ ءبىرى – قالاداعى وقۋشىلار سارايى. بيىل قالا كۇنى مەرەكەسى اياسىندا قولدانىسقا بەرىلگەن عيماراتتا تەحنوورتالىق, باعدارلامالاۋ, روبوتتەحنيكا, ونەركاسىپتىك ديزاين سىنىپتارى, ەكولوگيالىق زەرتحانا, جىلىجايلار مەن قىسقى باق, تەلەستۋديا, ۆوكال, مۋزىكالىق اسپاپتار, حورەوگرافيا كابينەتتەرى بار. «قازگەرمۇناي» بك» جشس نىسان قۇرىلىسىنا قارجى ءبولىپ, ونىڭ ماتەريالدىق-تەحنيكالىق جابدىقتالۋىنا دا تولىق جاعداي جاسادى.
«وقۋشىلار سارايىندا قازىر 213 بالا ءتۇرلى باعىتتاعى ۇيىرمەلەرگە قاتىسادى. عيمارات سول جاعالاۋ تۇرعىندارىنا وتە ءتيىمدى بولىپ وتىر. اشىلعالى بەرى حورەوگرافيا مەن روبوتتەحنيكا ۇيىرمەسىنىڭ بالالارى ءتۇرلى جارىستارعا بارىپ قاتىسىپ, جۇلدەلى ورىندارمەن ورالدى. وڭىردەگى جوعارى وقۋ ورىندارىمەن, باسقا دا مەملەكەتتىك مەكەمەلەرمەن, قوعامدىق ۇيىمدارمەن مەموراندۋم اياسىندا جۇمىس ىستەپ جاتىرمىز», دەيدى ديرەكتوردىڭ مىندەتىن اتقارۋشى گاۋحار قۇدايبەرگەنوۆا.
وقۋشىلار سارايىنىڭ ىرگەسىنەن ورىن تەپكەن ۇستەل تەننيسى ورتالىعىنىڭ سالىنۋىنا وبلىستىق بيۋدجەتتەن 2,5 ملرد تەڭگە قارالسا, «Samruk Kazyna Trust» الەۋمەتتىك جوبالاردى دامىتۋ قورى 900 ملن تەڭگە ءبولىپ, كوپ كومەك جاسادى. ورتالىقتا 16 ۇستەل تەننيسى ورنالاسقان اۋقىمدى ويىن الاڭى, كورەرمەندەرگە ارنالعان 350 ورىندىق تريبۋنا, جاتتىعۋ زالى, اكىمشىلىك بولمەلەر بار.
ورتالىق ديرەكتورىنىڭ مىندەتىن اتقارۋشى جانىبەك وڭتالاپتىڭ ايتۋىنشا, مۇندا 3 جاتتىقتىرۋشى 200-گە جۋىق بالانى جاتتىقتىرادى. ولاردىڭ اراسىندا ەل چەمپيوناتىنىڭ جۇلدەگەرلەرى بار. الداعى ۋاقىتتا مۇندا جارىستار مەن وقۋ-جاتتىعۋ جيىندارى وتكىزىلمەك.
مادەنيەتتىڭ مايەگى ساقتالعان جەر
ءباسپاسوز تۋرىنا قاتىسۋشىلار بيىل كوكتەمدە اشىلعان ونەر ورتالىعىندا دا بولدى. مىڭ ورىندىق ورتالىقتا تۇرماعامبەت اتىنداعى حالىق اسپاپتارى وركەسترى, سيمفونيا وركەسترلەرىنەن بولەك, 7 ونەر ۇجىمى ورىن تەپكەن. كەيىنگى ءۇش جىلدا ايماقتا جاڭا 21 نىسان سالۋعا قاراجات ءبولىنىپتى, ولاردىڭ ونى قازىر جۇمىس ىستەپ تۇر, قالعانى جىل سوڭىنا دەيىن قولدانىسقا بەرىلەدى. ەكى جىلدا سالادا 6 ۇجىم جۇمىسىن باستاپ, 200-دەن اسا شتات اشىلىپتى. ون جىلعا جۋىق ۇيىرمە رەتىندە جۇمىس ىستەپ كەلگەن جاستار تەاترى ءوز الدىنا جەكە كاسىبي ۇجىم بولىپ قۇرىلسا, مۇگەدەك ونەرپازداردىڭ شىعارماشىلىعىن شىڭداۋعا ارنالعان «ينكليۋزيۆتى تەاتر» جوباسى ۇيىرمە رەتىندە جۇمىس ىستەپ جاتىر.
حالىقارالىق تۇركسوي ۇيىمى ايماقتاعى مادەنيەت, رۋحانيات سالاسىندا اتقارىلعان جۇمىستاردى سارالاپ, سىر ءوڭىرى تۇركى دۇنيەسىنىڭ ەڭ ۇزدىك مادەني ايماعى دەپ باعالادى. استانا مەن الماتى قالالارىندا الاشتىڭ اناسى اتانعان ءوڭىردىڭ ونەر كۇندەرى ۇيىمداستىرىلدى.
ءان ۇزىلمەيتىن ورتالىق
«اناعا تاعزىم» ورتالىعىنىڭ تاڭنان كەشكە دەيىن انا جايلى ءان كەرنەپ تۇراتىن ەرەكشەلىگى بار. جاس ۇرپاققا رۋحاني-ادامگەرشىلىك تاربيە بەرۋدى ۇيىمداستىرۋ, وتباسىلىق قۇندىلىقتاردى نىعايتىپ, بۇگىنگى قازاق ايەلىنىڭ رۋحاني كەلبەتىن قالىپتاستىرۋ, كرەاتيۆتى يندۋستريانى دامىتۋ باعىتىندا جۇمىس ىستەيتىن ورتالىقتا «قازاق ەلىنىڭ ۇلى انالارى» اتتى بىرەگەي كارتينا مەن كيىز ءۇيدىڭ ينستاللياتسياسى ورنالاسقان. «ميراس», «بويتۇمار», «انا ءتىلى», «جاس وتاۋ» كلۋبتارى مەن «بەرەكە» اسپازدىق ستۋدياسى, «شامشىراق» فوتو-ۆيدەو ستۋدياسى قازىر كوپكە تانىس. مۇنداعى پسيحولوگ مامانداردىڭ دا جۇرتقا كومەگى مول. مەكەمە اشىلعان ساتتەن باستاپ «دامۋ Lift» جوباسىن قولعا الىپ, مەكتەپ وقۋشىلارى مەن ستۋدەنتتەردى ورتالىققا شاقىردى. ولارمەن جۇمىس ىستەۋ بارىسىندا «اناما حات» جوباسى پايدا بولدى. كوكەيدەگى سىرىن ەشكىمگە ايتا المايتىن جاستارعا ارنالىپ جۇزەگە اسىرىلعان جوبا اياسىندا ءىرى ساۋدا ورتالىقتارىنا «سەنىم جاشىكتەرى» ورناتىلىپ, جينالعان حاتتارمەن پسيحولوگتەر جۇمىس ىستەدى.
ء«بىر جىلدىڭ ىشىندە باس-اياعى 500-گە جۋىق حات ءتۇستى. ولاردىڭ اراسىندا ۆيرتۋالدىق ويىنعا قىزىعۋشىلىعىنا اناسى تىيىم سالعانىن جازعاندار كوپ. وسىدان كەيىن ءبىز ماماندارمەن اقىلداسىپ, وسى تاقىرىپقا ارنايى الەۋمەتتىك بەينەروليك تۇسىردىك. قازىر ول بارلىق ءبىلىم بەرۋ ورنىنا تاراتىلدى», دەيدى ورتالىق ديرەكتورى التىناي مولجانوۆا.
باق وكىلدەرى جاڭا اۋەجاي مەن قالا ىرگەسىندەگى شارۋاشىلىقتار جۇمىسىن دا ارالاپ كورىپ, ەلگە ورتاق يگىلىكتى ىستەرگە كۋا بولدى.
قىزىلوردا
