اقتوبەدە ءاليا مولداعۇلوۆانىڭ سىڭلىسىنە كومەك كورسەتىلدى

اقتوبە. 30 ءساۋىر. اقتوبە وبلىسىندا ۇلى جەڭىستىڭ 70 جىلدىعى قارساڭىندا بىرقاتار مەرەكەلىك شارالار ۇيىمداستىرىلىپ, قايىرىمدىلىق اكتسيالارى وتۋدە. وسىنداي شاراعا اقتوبە وبلىسىنىڭ سۋديالار قاۋىمداستىعى دا اتسالىسىپ, «ارداعىم – ارداگەرىم» اتتى اكتسيانى جۇزەگە اسىرۋدا. بۇل تۋرالى egemen.kz حابارلادى. بۇعان دەيىن دە بىرقاتار قايىرىمدىلىق ءىس-شارالارىن ۇيىمداستىرعان قاۋىمداستىق جاقىندا تاعى ءبىر يماندىلىق ىسكە ۇيىتقى بولدى. وبلىستىڭ سۋديالار قاۋىمداستىعى اتىنان قازاقستان رەسپۋبليكاسى سۋديالار وداعى اقتوبە فيليالىنىڭ توراعاسى دامەش ءابدالى مەن وبلىستىق سوتتىڭ كەڭسە باسشىسى اسەت مامبەتوۆ كەڭەس وداعىنىڭ باتىرى ءاليا مولداعۇلوۆانىڭ ءسىڭلىسى ءالىپ ۇسەنوۆانىڭ ۇيىنە بارىپ, كەلە جاتقان مەرەكەمەن قۇتتىقتاپ, اپكەسىنىڭ باسىنا بارىپ-كەلۋ ءۇشىن جول شىعىنىنا 200 مىڭ تەڭگە قارجىلاي كومەك كورسەتتى. «مەنىڭ قازىر جاسىم 75-تە, قانشا ءومىرىم قالعانىن اللا بىلەدى. سوندىقتان, سوڭعى رەت اپكەمنىڭ باسىنا بارىپ, توپىراق سالسام, سودان كەيىن تىنىش ۇيىقتايتىن بولامىن. قازاقتىڭ باتىر قىزىنىڭ رۋحىنا ادالدىق تانىتىپ, مەنىڭ جاعدايىمدى تۇسىنگەندەرىڭە مىڭ دا ءبىر راحمەت, وركەندەرىڭ ءوسسىن», – دەدى ءالىپ اپا ريزاشىلىعىن ءبىلدىرىپ. ءاليا مولداعۇلوۆا 1943 جىلدىڭ تامىز ايىندا مايدانعا اتتانىپ, ەكىنشى بالتىق جاعالاۋى مايدانىنداعى №22 ارميانىڭ №54 ارنايى اتقىشتار بريگاداسىنىڭ قۇرامىندا سوعىسقان. قازاقتىڭ قايسار قىزى جاۋ اسكەرىنىڭ 78-دەن استام ساربازدارى مەن وفيتسەرلەرىنىڭ كوزىن جويعان. شىعىستىڭ قوس شىنارىنىڭ ءبىرى ءاليا مولداعۇلوۆا ۇرىستا اۋىر جاراقات الىپ, 1944 جىلدىڭ 14 قاڭتارىندا پسكوۆ وبلىسىنىڭ سولتۇستىگىندە قازا تاپقان. وعان 1944 جىلدىڭ 4 ماۋسىمىندا كەڭەس وداعىنىڭ باتىرى اتاعى بەرىلدى. ءاليا ەسىمىمەن ونداعان كوشەلەر, مەكتەپتەر, اسكەري-تەڭىز فلوتىنىڭ كەمەلەرى, كاسپيدە جۇك تاسيتىن تەپلوحود اتالادى. اقتوبە, استانا, الماتى, ماسكەۋ, سانكت-پەتەربۋرگ, نوۆوسوكولنيكي قالالارىندا ەسكەرتكىشتەر مەن مەموريالدىق تاقتالار ورناتىلعان. اقتوبەدە ءاليا مولداعۇلوۆا اتىنداعى ارنايى وبلىستىق مەموريالدىق مۋزەي جۇمىس ىستەيدى. ساتىبالدى ءساۋىرباي. دەرەك, سۋرەت: egemen.kz.