جاقىندا ءبىر تانىستان ەستىگەن اڭگىمە دە ويلانتارلىق. قالاداعى جەكە مەكتەپتەردىڭ ءبىرى ءبىر پاننەن 3 مۇعالىمنىڭ ورنىنا كونكۋرس جاريالاپتى. «سەنەسىز بە, سوعان الپىستان اسا ادام قاتىستى. كوپشىلىگى – گرانتپەن وقىپ, وقۋدى ەندى بىتىرگەن جاستار. ەلىمىزدە جوعارى وقۋ ورىندارى دايارلاپ جاتقان كەيبىر ماماندىقتاردى بىتىرگەندەر سانى قاجەتتىلىكتەن اسىپ كەتكەنىن وسىدان-اق بىلە بەرىڭىز. ەسەسىنە كوپ مەكەمە قاراپايىم جۇمىسشى تابا الماي وتىر», دەيدى ول.
ءدال وسىنداي ماسەلەنى «قىزىلوردا – جەزقازعان» كۇرە جولى قۇرىلىسىنا بارعاندا جەرگىلىكتى مەردىگەر, «قىران» جشس-نىڭ ديرەكتورى جايساڭ سىزدىقوۆ تا ايتىپ ەدى. كومپانيا 1 ملن تەڭگە جالاقىعا گرەيدەر ايداۋشىنى شەتەلدەن الدىرىپ وتىر. ويتكەنى وزىمىزدە ونداي ماماندىق يەلەرى تابىلا بەرمەيدى.
ءبىزدىڭ بۇگىنگى كەيىپكەرىمىزدىڭ دە ماماندىعى قازىر كوپ كەزدەسپەيدى. دۇرىسى, قازىرگى جاستار كوپ جولاي بەرمەيتىن كاسىپ. «قىزىلوردا سۋ جۇيەسى» مەكەمەسىنىڭ جوندەۋشى-سلەسارى بولات نازاروۆ كەزىندە اۋىل مەكتەبىن ۇزدىك بىتىرگەن وقۋشى ەدى. سول جىلى جەرگىلىكتى پەداگوگيكالىق ينستيتۋتقا دا ءتۇستى. بولاشاقتا تاريحشى بولامىن دەگەن جاستىڭ ارمانى دا كوپ ەدى. بىراق ءۇيدىڭ بار شارۋاسىن اتقارىپ جۇرگەن ۇلكەن ۇلدىڭ وقۋعا كەتكەنى ەڭ الدىمەن اكە-شەشەگە سالماق بولدى.
ۇيگە ارا-تۇرا ءبىر سوققاندا تىرلىكتەن قاجىعان ۇلكەندەردى كورگەن جىگىت وقۋدى تاستاپ, اۋىلداعى شارۋا قوجالىعىنا جۇمىسقا كىردى. تەحنيكا دا ايدادى, شارۋاشىلىقتىڭ بار جۇمىسىنىڭ باسىندا ءجۇردى. وزىنەن كەيىنگى باۋىرلارىنا باس-كوز بولىپ, از ۋاقىتتا بەلدى ماماننىڭ بىرىنە اينالدى. اۋىلداعى شارۋاشىلىق جۇمىسىن توقتاتقاندا, «قىزىلوردا سۋ جۇيەسى» مەكەمەسىنە كەلىپ, سلەسار اتاندى.
باستاپقىدا قارا جۇمىستان قاجىعان ساتتەردە «اتتەڭ, باياعىدا وقۋىمدى ۇزبەۋىم كەرەك ەدى» دەگەن ويدا بولعانى راس. بىراق جاڭا ورتاعا ۇيرەنىپ, كاسىپتى مەڭگەرگەننەن كەيىن ونىڭ ءبارى جايىنا قالدى. جاڭا جۇمىس جاستايىنان موتور جيناپ, تەحنيكا ءتىلىن ۇيرەنگەن وعان ونشالىقتى قيىن بولعان جوق. دەسە دە بىلگەنىن ۇيرەتۋدەن جالىقپاعان مارات ەسىمدى اعا شەبەردىڭ قامقورلىعىن ۇمىتپايدى. قازىر زەينەتكە شىققان سول اعالاردىڭ جولىن بۇلار باستى. جۇمىسقا جاڭا كەلگەن جاستارعا جول كورسەتۋ سالاداعى بىلىكتى مامان اتانعان وسىلارعا اۋىستى.
ء«ار جۇمىستىڭ ءوز ەرەكشەلىگى بار. مىسالى, كارىز سورعى ستانسالارىن جوندەۋدە قاۋىپسىزدىك شارالارى قاتاڭ ساقتالۋى كەرەك. ءبىز جاستارعا وسىنى ەسكەرتەمىز. قازىر بۇرىنعىعا قاراعاندا جۇمىس الدەقايدا جەڭىلدەدى. تىرلىكتىڭ كوبى اۆتوماتتاندىرىلىپ, قالاداعى 60-قا جۋىق سورعى ستانسالارىنىڭ دەنى جاڭارتىلدى. جالپى, كەيىنگى تولقىننىڭ اراسىندا كولىك جۇرگىزۋشىسى, مەحانيزاتور ماماندىعىن كەڭىنەن ناسيحاتتاپ, سوعان بەيىمدەۋىمىز كەرەك. سلەسارلىق تا سيرەك ماماندىققا اينالىپ بارادى. اسىرەسە توكار تابۋ قازىر وڭاي بولماي تۇر. جىل سايىن كوللەدجدەردى ءتامامداپ جاتقان جۇزدەگەن مامان جەڭىل جۇمىس ىزدەپ ءار سالادا ءجۇر», دەيدى بولات نازاروۆ.
شىنىندا دا قازىر جۇمىسشى بولاتىن جاستى كۇندىز قولىڭا شام الىپ ىزدەسەڭ دە تابۋىڭ قيىنعا اينالىپ بارادى. كوپشىلىگى بەلىن بۇكپەي, بەينەت شەكپەي, بايلىققا كەنەلە قالعىسى كەلەدى. الەۋمەتتىك جەلىدەگى جارقىلداعان ومىرگە ەلتىپ جۇرگەندەرى قانشاما. قول-اياعى بالعاداي جىگىتتەردىڭ مەكەمە ەسىگىن كۇزەتكەن قاراۋىلدىقتان اسا الماي جۇرگەنىنە جانى اۋىرادى. رەسمي دەرەكتەر بويىنشا ەلىمىزدەگى قۇرىلىس سالاسىندا جۇرگەندەردىڭ 67 پايىزى سىرت مەملەكەتتەردەن كەلەدى ەكەن. اۋىلداعى مەحانيزاتورلاردىڭ ەڭ جاسى زەينەت جاسىنا كەلىپ قالدى. ەلدەگىلەردىڭ كوبى قالاعا كەلىپ, كولىگىمەن ادام تاسىعاندى قاناعات قىلىپ ءجۇر. كۇنى ەرتەڭ جۇمىس ىستەيتىن, ءىستىڭ كوزىن بىلەتىن جاستى قايدان تاپپاقپىز؟
وسىدان دا مەملەكەت باسشىسىنىڭ كەلەسى جىلدى «جۇمىسشى ماماندىقتارى جىلى» دەپ جاريالاعانى كوپتى قۋانتىپ وتىر. قۇرىلىس, اۋىل شارۋاشىلىعى, ونەركاسىپ سالاسىندا ەڭبەك ەتىپ جۇرگەندەرگە كوڭىل بولىنسە, جۇمىسشىنىڭ دا مارتەبەسى ارتاتىنى انىق. كەيىپكەرىمىز پرەزيدەنتتىڭ جۇمىسشى ماماندىقتارىن دارىپتەۋ ارقىلى ەڭبەكقور, ناعىز مامان بولۋ يدەياسىن ناسيحاتتاۋ, كاسىپتىك ءبىلىم سالاسىنا رەفورما جاساۋدىڭ ماڭىزدىلىعىنا ەرەكشە توقتالعانى قوعامعا ۇلكەن قوزعاۋ سالادى دەپ ويلايدى. ماڭداي تەرىن توگىپ ءجۇرىپ تابىسقا جەتكەن ادامداردى ۇلگى ەتىپ, ولارعا لايىق قۇرمەت كورسەتكەندە عانا ەڭبەككەر مارتەبەسى كوتەرىلە بەرمەك.
«بالانى شەكتەن تىس وبەكتەۋدىڭ زاردابى كوپ. كىشكەنتايىنان قولىنان كەلەتىن جۇمىستى تاپسىرساق, ەرتەڭ ەسەيگەندە ەڭبەكتەن قاشپايتىن, جاۋاپكەرشىلىگى جوعارى ادام قالىپتاساتىنىن ۇمىتپاۋىمىز كەرەك», دەيدى ول. ءوزى بالالارىن وسى باعىتتا تاربيەلەدى. ۇلدىڭ ۇلكەنى اسكەردەن كەيىن سول سالادا ەڭبەك ەتىپ ءجۇر. كەيىنگىلەرىنىڭ دە تاپسىرعان ءىستى تاپ-تۇيناقتاي اتقارۋىن قاداعالايدى.
«جۇمىستىڭ كوزىن تاپقان بايلىقتىڭ ءوزىن تابادى» دەگەن بار. بۇل – كاسىبىنە ادال ءارى جاۋاپكەرشىلىكپەن قاراعان ادامدى قۇرمەتتىڭ تورىنە شىعارعىسى كەلگەن قوعامنىڭ ۇستانىمى.
قىزىلوردا
