فوتو: اقوردا
مەملەكەت باسشىسىنىڭ جازۋىنشا, قازاقستان مەن رەسەيدىڭ قارىم-قاتىناسى – بەرىك ءارى مىزعىماس دوستىقتىڭ شىنايى كورىنىسى.
«ەكى ەلدىڭ ستراتەگيالىق سەرىكتەستىگى مەن وداقتاستىعى تىعىز استاسىپ جاتقان تاريحي جانە مادەني بايلانىستارعا, سونداي-اق, قوس حالىقتىڭ بولاشاعىنا قاتىستى ورتاق جاۋاپكەرشىلىككە نەگىزدەلگەن. بۇرىن-سوڭدى بولماعان جاھاندىق سىن-قاتەرلەرگە قاراماستان, ءبىزدىڭ ەلدەرىمىز تاتۋ كورشىلىك پەن سان سالالى ىنتىماقتاستىقتىڭ ۇلگىسىن كورسەتىپ كەلەدى», دەپ جازدى قاسىم-جومارت توقاەۆ.
ەلدەر اراسىنداعى بۇل ىنتىماقتاستىققا ورتاق مۇددە, ءوزارا سىيلاستىق, ەڭ جوعارى دەڭگەيدەگى سىندارلى ساياسي ديالوگ ارقاۋ بولىپ وتىرعانىن ەرەكشە اتاپ وتكەن ءجون.
«رەسەي پرەزيدەنتى ۆلاديمير ۆلاديميروۆيچ پۋتين ەكەۋمىز ۇنەمى حابارلاسىپ وتىرامىز. ءبىر-بىرىمىزگە دەگەن قۇرمەتكە نەگىزدەلگەن ءبىزدىڭ قارىم-قاتىناسىمىز ەمەن-جارقىندىعىمەن جانە ىسكەرلىك سيپاتىمەن ەرەكشەلەنەدى. مۇنداي تىعىز بايلانىس تۋىنداعان ماسەلەلەردى جەدەل شەشۋگە جانە مەملەكەتتەرىمىزدىڭ اراسىنداعى شىنايى دوستىق قاتىناستى نىعايتا تۇسۋگە مۇمكىندىك بەرەدى. سوڭعى ءبىر جىلدىڭ وزىندە رەسەي پرەزيدەنتى ەكەۋىمىز تولىققاندى فورماتتا ءتورت كەلىسسوز جۇرگىزدىك. حالىقارالىق ءىس-شارالار اياسىندا بىرنەشە مارتە كەزدەستىك, تەلەفونمەن دە ءجيى سويلەستىك», دەپ جازدى قازاقستان پرەزيدەنتى.
سونداي-اق پرەزيدەنت قازاقستان مەن رەسەيدىڭ ساۋدا-ەكونوميكا سالاسىنداعى ىقپالداستىعى تۇراقتى تۇردە دامىپ جاتقانىن اتاپ ءوتتى.
