سۋرەتتى تۇسىرگەن – اسلان جەكسەنبين
ساربازدار ءۇشىن اسا ماڭىزدى ءىس-شاراعا ولاردىڭ تۋىستارى مەن دوستارى, اسكەري ءبولىم كومانديرلەرى قاتىستى. جاس ساربازداردىڭ انت قابىلداۋ راسىمىنە ەلىمىزدىڭ ءار قيىرىنان ارنايى كەلگەن اتا-انالار دا قوبالجىپ ءجۇر. ولار ءۇشىن بالاسىنىڭ اسكەري بورىشىن ابىرويمەن وتەگەنى ماڭىزدى.
كەزەكتى شاقىرىلىم ساربازدارى ەل شەكاراسىنىڭ كۇزەتىن قامتاماسىز ەتەتىن قورداي شەكاراسى باسقارماسىنىڭ قاتارىن تولىقتىردى. ەلىمىزدىڭ وڭتۇستىگىندە ورنالاسقان بۇل ايماق شەكارا قىزمەتىن قامتاماسىز ەتۋدە ايرىقشا ماڭىزعا يە ەكەنى بەلگىلى. اسكەر قاتارىنا قابىلدانعانداردىڭ موينىنا زور مىندەت پەن جاۋاپكەرشىلىك جۇگى ارتىلعان. انت بەرۋ ءراسىمى وسى مىندەتتىڭ رامىزدىك باستاۋى دەسەك تە بولاتىن سەكىلدى. بۇل كۇنى ساربازدار وتان الدىنداعى جاۋاپكەرشىلىگىن تەرەڭ سەزىنىپ, تاۋەلسىزدىك پەن بەيبىتشىلىكتى, تىنىشتىقتى ساقتاۋ جولىنداعى قىزمەتكە شىن پەيىلمەن دايىن ەكەنىن جەتكىزدى.
جانارىندا وت ويناعان جاس جاۋىنگەرلەر انت قابىلداعاننان كەيىن بىردەن اسكەري دايارلىق باعدارلاماسىنا قوسىلدى. ولار اسكەري بولىمدە تاكتيكالىق جانە فيزيكالىق دايىندىقتان ءوتىپ, شەكارا كۇزەتۋ ءىسىنىڭ قىر-سىرىن مەڭگەرۋگە كىرىسەدى.
«اسكەري ءومىردىڭ ءاربىر ءساتى شىدامدىلىق پەن شىڭدالۋدى تالاپ ەتەتىنى ءمالىم. ءبىز سارباز رەتىندە مۇمكىندىگىنشە شەكارا قورعاۋ ىسىنە قاجەتتى داعدىلاردى مەڭگەرەمىز. ارقاشان قىراعى بولۋعا ماشىقتانامىز. مىندەتىمىز – ەل تىنىشتىعى مەن تاۋەلسىزدىگىن قورعاۋ. سوندىقتان دا وتان الدىنداعى قىزمەتىمىزدى ءاردايىم ادال اتقارۋعا دايىنبىز. ەڭ باستىسى – ابىروي», دەيدى ولار.
قىرعىز رەسپۋبليكاسىمەن شەكارالاس ورنالاسقان قورداي اۋدانىندا وتكەن انت قابىلداۋ راسىمىنە جالپى سانى 321 سارباز قاتىستى. كۇزگى شاقىرىلىم اياسىندا قازاقستاننىڭ ۇلتتىق قاۋىپسىزدىگىن قامتاماسىز ەتۋ جولىندا وزدەرىنىڭ العاشقى قادامىن جاساعان ولاردىڭ جۇزىنەن شاتتىق لەبى ەسىپ تۇردى.
انت قابىلداۋ راسىمىنە ۇلتتىق قاۋىپسىزدىك كوميتەتىنىڭ شەكارا قىزمەتى جامبىل وبلىسى بويىنشا دەپارتامەنتىنىڭ باسشىسى, پولكوۆنيك عاني بەكمىرزاەۆ ارنايى قاتىسىپ, جاس ساربازدارعا ساتتىلىك تىلەدى. ول ءوز سوزىندە اسكەر قاتارىنا قوسىلعان جاۋىنگەرلەردىڭ ەلىمىزدىڭ شەكارالىق قاۋىپسىزدىگىن قامتاماسىز ەتۋدەگى ماڭىزدى ءرولىن اتاپ ءوتىپ, ساربازداردىڭ وتان الدىنداعى بورىشىن ابىرويمەن اتقارۋىنا تىلەكتەس ەكەنىن جەتكىزدى.
جامبىل وبلىسى,
قورداي اۋدانى
