«ناز» مەملەكەتتىك بي تەاترى – ەلىمىزدە اشىلعان العاشقى كاسىبي بي تەاترى. 2007 جىلدىڭ 1 ناۋرىزىندا قالا اكىمىنىڭ شەشىمى بويىنشا استانا قالاسى اكىمدىگىنىڭ «ناز» مەملەكەتتىك بي تەاترى بولىپ ءوز الدىنا شاڭىراق كوتەردى. تەاتردىڭ ىرگەتاسىن قالاعان كاسىبي حورەوگرافتار – ەركەبۇلان جانە قاديشا اعىمباەۆتار.
ءتور قالامەن تۇيدەي قۇرداس تەاتر ەلوردامىزدىڭ مادەني-رۋحاني دامۋىنا زور ۇلەس قوسىپ قويماي, ەلىمىزدىڭ مادەني كەڭىستىگىنىڭ جاڭا بەلەسكە كوتەرىلۋىنە دە ەرەكشە اسەر ەتتى. ءداستۇرلى قازاق بي ونەرىن دامىتۋ, ۇلتتىق فولكلور مەن ەتنوگرافيانى كەڭىنەن ناسيحاتتاۋدى مۇرات تۇتقان ۇجىمنىڭ ونەر الەمىندەگى ورنى ايرىقشا. وسى قيىن دا قىزىققا تولى 25 جىلدىق شىعارماشىلىق جولدا, اسىرەسە تەاتردىڭ نەگىزىن قالاعان ەركەبۇلان مەن قاديشا اعىمباەۆتاردىڭ ەڭبەگى ەرەن.
قازاق ونەرىنىڭ جاناشىرى, اڭىز ادام وزبەكالى جانىبەكوۆتىڭ شەكپەنىنەن شىعىپ, تاربيەسىن كورگەن, ونەردى شىن ءتۇسىنىپ, باعالاي بىلەتىن بي ونەرىنىڭ مايتالماندارى ەركەبۇلان م ۇلىك ۇلى مەن قاديشا ەرمەكبايقىزىنىڭ ءو.جانىبەكوۆتەن كورگەن ۇلاعاتىن ءوز تاجىريبەلەرىنە ارقاۋ ەتىپ, ۇلكەن ۇجىم قۇرۋى كەزدەيسوقتىق بولماسا كەرەك. بۇگىندە ءبىرى تەاتردىڭ ديرەكتورى, ەكىنشىسى كوركەمدىك جەتەكشىسى بولىپ تۇسىنىسكەن تاندەم, ءۇنسىز ۇعىسقان ۇندەستىكتە ۇيلەسىمدى ەڭبەك ەتىپ كەلە جاتقان سول جاراسىمدىلىق ۇجىمنىڭ دا مارتەبەسىن اسقاقتاتىپ, اتاعىن الىسقا جەتكىزىپ ءجۇر. ونىڭ ايقىن ايعاعى «ناز» مەملەكەتتىك بي تەاترى وسى جىلدار ىشىندە مەملەكەتتىك ماڭىزى بار ءىس-شارالارعا قاتىسىپ, نورۆەگيا, يزرايل, تۇركيا, قاتار, قىتاي, رۋمىنيا, يسپانيا, ءۇندىستان, موروككو, فرانتسيا, شۆەيتساريا, پورتۋگاليا, يوردانيا, مىسىر, ت.ب. مەملەكەتتەردە ونەر كورسەتىپ, ەلىمىزدىڭ مارتەبەسىن بيىكتەتتى. تەاتردىڭ 25 جىلدا جەتكەن جەتىستىكتەرى دە از ەمەس. اتاپ ايتساق, 2001 جىلى IV حالىقارالىق «شابىت» شىعارماشىل جاستار فەستيۆالىنىڭ گران-پري يەگەرى, قازاقستان جاستار وداعى سىيلىعىنىڭ لاۋرەاتى (2002), 2004 جىلى – «التىن ءمۇسىن» يەگەرى (قىتاي); م.ەسامباەۆ اتىنداعى IX حالىقارالىق فەستيۆالىنىڭ لاۋرەاتى (گروزنىي), XXI «شابىت» حالىقارالىق شىعارماشىل جاستار فەستيۆالىنىڭ گران-پري يەگەرى (2018) بولسا, «Nauryz – 2021» تۇڭعىش ۇلتتىق سىيلىعىمەن ماراپاتتالدى.
«حالقىمىزدا «ناز» دەگەن ەلدىڭ وكپە-رەنىشتەرىن ايتۋ, جەتكىزۋ, ءبىلدىرۋ ماعىناسىندا قالىپتاسقان فورما عوي. نەگىزىندە «ناز» دەگەن – ادامنىڭ ىشىندەگى سىرىن سەنىمدى جانعا اقتارۋ. بىراق بۇل ءسوزدى تەك بىرجاقتى قاراۋعا بولمايدى. «قۋانىشىڭدى, سىرىڭدى اقتارۋ» دەگەن بالاماسىنا نەگە ءمان بەرمەسكە؟ مەنىڭ ويىمشا, ناز ءبيدىڭ ىشكى جاي-كۇيىن, سەزىمىن, سىرىن بىلدىرەتىن ايشىقتى ءسوز دەپ ويلايمىن. ءبىز سىزىلىپ تا, كەربەزدەنىپ تە, باتىر, وجەت بولىپ تا بيلەيمىز عوي. بي ارقىلى ىشكى سەزىمنىڭ ءارتۇرلى كۇيىن كورسەتەمىز. ءبىراز جىل بۇرىن ومىردەگى ءارى ونەردەگى سەرىگىم ەركەبۇلان ەكەۋمىز «وسى اتاۋدى وزگەرتسەك قالاي بولار ەكەن؟» دەپ ءبىراز ويلانعان ەدىك. ويلانا كەلە, تەاتردىڭ اتاۋىن اۋىستىرمايمىز دەپ شەشتىك. حالىق ءبىزدى «ناز» دەپ تانيدى», دەپ تاريحتان تارقاتا ءسوز قوزعاعان تەاتردىڭ كوركەمدىك جەتەكشىسى ءارى باس بالەتمەيستەرى قاديشا ەرمەكبايقىزى اتالىپ ءوتىپ جاتقان مەرەيتويدىڭ ءمان-ماڭىزىنا دا جان-جاقتى توقتالدى: «بۇل مەرەيتوي – تەاتردىڭ شيرەك عاسىرلىق شىعارماشىلىق ەڭبەگىنىڭ ناتيجەسىن قورىتىندىلاپ, جاڭا بەلەستەرگە قادام باسۋ مۇمكىندىگى. تەك قورىتىندىلاردى شىعارۋ عانا ەمەس, بولاشاققا جاڭا جوسپارلار قۇرۋ. تەاتردى الدا جاڭا گاسترولدەر, حالىقارالىق جوبالارعا قاتىسۋ جانە جاڭا شىعارماشىلىق بەلەستەر كۇتىپ تۇر», دەدى ونەر يەسى.
25 جىل! بۇل جاي العا جىلجىعان جىلدار كوشى عانا ەمەس, شيرەك عاسىرلىق ەڭبەك پەن تابىستىڭ, شىعارماشىلىق جولدىڭ جارقىن كورىنىسى. وسى ۋاقىت ىشىندە ۇجىم تەك تانىمالدىلىققا يە بولىپ قانا قويماي, كورەرمەندەردىڭ رياسىز ماحابباتىنا بولەنىپ, بي ونەرىنىڭ بەكزات الەمىندە شەبەرلىك پەن سۇلۋلىقتىڭ شىنايى سيمۆولىنا دا اينالا ءبىلدى. ءوز ەلىمىزدە عانا ەمەس, شەت مەملەكەتتەرگە «قازاق» دەگەن مىڭجىلدىق تاريحى بار ەل بولعانىن, كونە وركەنيەتى مەن مادەنيەتى بولعانىن حورەوگرافيا تىلىمىنەن جەتكىزىپ جۇرگەن بىرەگەي تەاتر. وسى جىلدار ىشىندە رەپەرتۋارىنىڭ سان الۋاندىعىمەن كورەرمەنىن تاڭ قالدىرىپ, 200-دەن استام بي مەن حورەوگرافيالىق قويىلىمداردى تارتۋ ەتتى. سپەكتاكلدەرىنەن كلاسسيكالىق بالەتتەن باستاپ زاماناۋي بي باعىتتارىنا دەيىنگى جانرلاردىڭ ارتۇرلىلىگىن كورۋگە بولادى.
تەاتردىڭ مەرەيتويىن رەسمي مەرەكەلەۋ ۇلتتىق مۋزەيدە ۇيىمداستىرىلعان «25 جىلدىق بەلەس» اتتى كورمەنىڭ سالتاناتتى اشىلۋىمەن باستالدى. ونەر ورداسىنىڭ تاريحى مەن شىعارماشىلىق جەتىستىكتەرىن كورسەتەتىن كورمەگە تەاتردىڭ مەملەكەتتىك جانە حالىقارالىق بايقاۋلاردان العان ماراپاتتارى مەن سىيلىقتارى, ءار جىلعى قويىلىمدار مەن كونتسەرتتەردى ەسكە تۇسىرەتىن فوتوسۋرەتتەر مەن كارتينالار, سونداي-اق ساحنالىق كوستيۋمدەر قويىلدى. «فوتوسۋرەت», «پرەمەرالار مەن كونتسەرتتەر» جانە «ساحنالىق كوستيۋمدەر» اتتى ءۇش بولىمنەن تۇراتىن كورمەنىڭ العاشقى بولىمىندە ونەر ۇجىمىنىڭ ءار جىلداردا حالىقارالىق بايقاۋلاردان العان ماراپاتتارى مەن شەتەلدەردەن كەلگەن كادەسىيلار ورنالاسسا, «پرەمەرالار مەن كونتسەرتتەر» بولىمىندە, اتاۋى ايتىپ تۇرعانداي, تەاتر ساحناسىندا قويىلعان «شىڭعىسحان», ء«ازىمنىڭ اڭگىمەسى», «نۇرعيسا» حورەوگرافيالىق سپەكتاكلدەرىنىڭ, «سامعاۋ», «شابىت», «شاڭىراق», «جەلدىرمە», «سەرپىن», ت.ب. بيلەرىنىڭ قويىلۋ تاريحىنان اقپارات بەرەتىن كارتينالار قويىلعان. ال «ساحنالىق كوستيۋمدەر» اتتى سوڭعى بولىمىندە كورەرمەننىڭ ەسىندە قالعان ساحنالىق كوستيۋمدەر ورنالاسقان. اتاپ ايتساق, «مىڭ ءبىر ءتۇننىڭ ءبىر ءتۇنى» سپەكتاكلىندەگى ەسميگيۋلدىڭ, اتەكتىڭ, «تۇيعىندار» سپەكتاكلىندەگى «سارباز» بەينەسى, ء«ازىمنىڭ اڭگىمەسى» سپەكتاكلىندەگى «ايلاكەر شال», «شىڭعىسحان» سپەكتاكلىندەگى انا, بۇعى بەينەلەرى, «سەرپىن» ءبيىنىڭ ساحنالىق كوستيۋمى, ت.ب. ۇسىنىلدى. كورمە ۇلتتىق مۋزەيدە 2024 جىلدىڭ 21 قاراشاسىنان 20 جەلتوقسانىنا دەيىن جۇمىس ىستەيدى.
كورمەدەن كوڭىل مارقايتىپ شىققان قاۋىم ۇلتتىق مۋزەيدىڭ عىلىمي كىتاپحاناسىندا وتكەن تەاتر قايراتكەرلەرى وداعىنىڭ مۇشەسى, «مادەنيەت سالاسىنىڭ ۇزدىگى», جۋرناليست تولقىن سۇلتاننىڭ ««ناز» مەملەكەتتىك بي تەاترى. 25 جىلدىق بەلەس» اتتى كىتابىنىڭ تۇساۋكەسەرىنە كۋا بولدى.
ايتۋلى كىتاپ – «ناز» مەملەكەتتىك بي تەاترىنىڭ 25 جىلدىق مەرەيتويىنا ارناپ جازىلعان العاشقى ەڭبەك. ەلىمىزدەگى تۇڭعىش بي تەاترىنىڭ قۇرىلۋى, قالىپتاسۋى مەن جەتكەن جەتىستىكتەرى, شىعارماشىلىق جولى سارالانىپ, وقىرمانعا ۇسىنىلىپ وتىر. كىتاپتىڭ بي ونەرى تۋرالى ايتار تانىمدىق, تاعىلىمدىق ءمانى زور. بۇل ەڭبەك ونەر زەرتتەۋشىلەرىنە, جوعارى جانە ورتا ارناۋلى وقۋ ورىندارىنىڭ وقىتۋشىلارىنا, ستۋدەنتتەرگە جانە ونەرسۇيەر قاۋىمعا ارنالعان. سونداي-اق حورەوگرافيا سالاسى ماماندارىنىڭ تەاتر تۋرالى وي-پىكىرلەرى مەن جالپى قازاق ۇلتتىق بي ونەرىنە دەگەن پايىمدى ويلارى باياندالادى.
«وسى كىتاپتى جازساڭ» دەگەن ۇسىنىسقا ءبىر جىل ويلانىپ, ارەڭ كەلىستىم. كەلىسپەگەن سەبەبىم, از ۋاقىتتا ماتەريال جيناپ, ونى قاعازعا ءتۇسىرۋ, ءتۇسىنۋ, قورىتىندى شىعارۋ وڭاي ەمەس. ال كەلىسكەن سەبەبىم, ءوزىم قىزمەت ەتە ءجۇرىپ, جان دۇنيەڭنىڭ وسى الەممەن تۇتاسىپ, شابىت الىپ, ارتىستەردىڭ جانكەشتىلىگىنە تاڭعالىپ, ءوز باعاسىن الا الماعان كەزىندە قارنىڭ اشىپ, جۇرەگىڭ سىزدايدى ەكەن. از بولسا دا وسى تەاتردىڭ دامۋىنا ءوز ۇلەسىمدى قوسىپ, كوزقاراسىمدى بىلدىرگىم كەلدى. بۇل كىتاپ ادەبي كوركەم شىعارما ەمەس. مۇندا ناقتى دەرەكتەرگە سۇيەنگەن, وسى تەاتردىڭ قالىپتاسۋىنا ىقپال ەتكەن ازاماتتار مەن ارتىستەردىڭ ەستەلىكتەرى مەن پىكىرلەرى جان-جاقتى اڭگىمەلەنەدى», دەيدى تەاتر تۋرالى جارىق كورگەن جاڭا كىتاپتىڭ اۆتورى تولقىن سۇلتان.
مەرەيتويلىق ءىس-شارالار لەگى ودان ءارى «ناز» مەملەكەتتىك بي تەاترى – ۇلتتىق ءبيدىڭ فەنومەنى» اتتى دوڭگەلەك ۇستەلگە جالعاستى. مازمۇندى جيىندا ەلىمىزدىڭ ءار وڭىرىنەن كەلگەن گۇلجان تالپاقوۆا, تويعان ءىزىم باستاعان حورەوگرافيا سالاسىنىڭ مايتالماندارى تەاتردىڭ ءوسۋ جولدارى مەن ستراتەگياسىن, قازاقتىڭ بي ونەرىنە قوسقان ۇلەسىن تالقىعا سالدى.
تانىمدىق ءمانى زور تاعىلىمدى شارا «الدار كوسە» حورەوگرافيالىق سپەكتاكلىمەن تۇيىندەلدى. قويۋشى بالەتمەيستەرلەر ۋاليتبەك سيازبەكوۆ پەن ءامينا سامارباەۆانىڭ سۋرەتكەرلىك ساراپتاۋىندا ۇسىنىلعان ايتۋلى قويىلىم – تەاتردىڭ XXV جاڭا ماۋسىمىنداعى ءىرى جوبالارىنىڭ ءبىرى. سپەكتاكلدە الدار كوسەنىڭ باستان كەشكەن وقيعالارى, ساراڭ بايدىڭ قۋلىعى مەن جاماندىعى اشكەرە بولادى. سونداي-اق قويىلىمدا عاشىقتار وقيعاسى دا قالىس قالمايدى. ەلەنتاي مەن ايسۇلۋ ءۇشىن دە بىرگە قۋانىپ, بىرگە مۇڭاياسىز. تەاتردىڭ باستى ۇستانىمدارىنىڭ ءبىرى – قازاق فولكلورى مەن ەتنوگرافياسىن ناسيحاتتاۋ بولسا, قويىلىمدا قازاقتىڭ تۇرمىس-سالت جىرلارى, داستۇرلەرى دە مول كورىنىس تابادى. سپەكتاكلدە الدار كوسە بەينەسىن سانات كاليمبەتوۆ, يسلام ابباسوۆ, بايدى – مارعۇلان جەڭىسوۆ, ايسۇلۋدى – ادەل نۇرعياس, ەلەنتايدى – امانبەك كايداسىنوۆ, بايبىشەنى – گۇلدانا كادەروۆا, بايدىڭ شابارمانىن – بەيبارىس عازيزوۆ كەيىپتەسە, ز ۇلىم پەرىلەر ءرولىن دانارا نۇرعاليەۆا, كارينا رىبكينا, ءۇريا داۋلەت, نۇرلىاي عاينوللا, نازيرا تاشماعانبەتوۆا, ايارۋ سايىپ-نازار, ريما پاشان باستاعان ارتىستەر شوعىرى بي تىلىندە كەمەلىنە كەلتىرە كەيىپتەدى. قويىلىم «استانا» ەسترادالىق-سيمفونيالىق وركەسترىنىڭ سۇيەمەلدەۋىمەن ءوتتى.
ءيا, وسى كەشتە كۋا بولعانىمىزداي, «ناز» مەملەكەتتىك بي تەاترى سوڭعى جىلدارى قازاق حورەوگرافياسىنان ەرەكشە ورىن الا وتىرىپ, تەك تانىمالدىلىققا عانا قول جەتكىزبەي, سونىمەن قاتار كورەرمەننىڭ سۇيىسپەنشىلىگىنە دە بولەنگەن بىرەگەي ونەر ۇجىمىنا اينالدى. تەاتر شىعارماشىلىعى تەك ەلىمىزدە عانا ەمەس, حالىقارالىق دەڭگەيدە دە تانىلدى. وسى ۋاقىت ىشىندە تەاتر حورەوگرافتارى ءوز قويىلىمدارىندا رومانتيكالىق نازىكتىك پەن درامالىق شيەلەنىستەن باستاپ, كەڭ اۋقىمدى ەموتسيالار مەن تەرەڭ سەزىمدەرگە دەيىنگى ءتۇرلى وقيعالاردى كورسەتۋدە شەبەرلىك بيىگىنە جەتتى دەسەك, ارتىق ايتقاندىعىمىز ەمەس. قويىلىمدارداعى ءاربىر قوزعالىس پەن حورەوگرافيالىق شەشىم كورەرمەندى باۋراپ الادى. كوركەمدىك تاسىلدەر مەن كوستيۋمدەر, دەكوراتسيالار – بۇل تەاتردىڭ باستى ەرەكشەلىكتەرىنىڭ ءبىرى. سۋرەتشىلەر ءار قويىلىمدا ەرەكشە اتموسفەرا جاساي وتىرىپ, كورەرمەندى تاڭعالدىرۋدى الدەقاشان ادەتكە اينالدىرعان. بي تەاترىنىڭ ۆيزۋالدى بولىگى ءاردايىم كوركەمدىك تۇرعىدان جوعارى دەڭگەيدە. تەاتر ءوزىنىڭ تالانتى مەن شىعارماشىلىعىنا دەگەن ادالدىقپەن بىرنەشە بۋىن حورەوگرافتار مەن ورىنداۋشىلاردى تاربيەلەپ, ولاردىڭ ەڭبەكتەرى ارقىلى تەاتردىڭ داڭقتى داستۇرلەرىن جالعاستىرىپ كەلەدى. تەاتردىڭ جەتىستىگى مەن قۇپياسى دا, بالكىم, وسى ونەرگە دەگەن شەكسىز ادالدىق پەن شىڭدالعان شەبەرلىگىندە جاتسا كەرەك.
تاقىرىپقا وراي: ۇلتتىق ونەردىڭ جەڭىسى
«ناز» مەملەكەتتىك بي تەاترى – ەلىمىزدەگى ۇلتتىق باعىتتاعى قۇندىلىقتارىمىزدى ناسيحاتتايتىن تۇڭعىش كاسىبي بي تەاترى. بىزدە ءتۇرلى بالەت, وپەرا تەاترلارى بار. بىراق ناقتى ءوزىنىڭ قولتاڭباسى مەن باعىتى ۇلتتىق ەرەكشەلىكتەرگە نەگىزدەلگەن كاسىبي تەاتر جالعىز. الدا ءالى دە تالاي تەاتر اشىلار, بىراق ءبىرىنشى بولىپ «ناز» تەاترى اتالاتىنى ءسوزسىز. سەبەبى ول ەشكىمگە ۇقسامايتىن دارا جولىمەن تاريحقا ەندى. وسى تۇستا, اسىرەسە, تالانتتى جۇپ ەركەبۇلان مەن قاديشا اعىمباەۆتاردىڭ ەڭبەگىن ايرىقشا اتاپ وتكىم كەلەدى. ولار تاريحتى ءوز قولدارىمەن جاسادى. 25 جىلدىق جارقىن جەتىستىك – سول ەسەپسىز توگىلگەن ماڭداي تەردىڭ جەمىسى. «نازدىڭ» تاريحى عاسىردان-عاسىرعا جالعاسسىن دەپ تىلەيمىن.
گۇلجان تالپاقوۆا,
ءبيشى, قازاقستاننىڭ حالىق ءارتىسى
ىنتىماعى جاراسقان ۇجىم
مەملەكەتتىك «ناز» بي تەاترى قۇرىلعاننان بەرگى 25 جىل ىشىندە ءوزىن كەرەمەت ساحنالىق كوستيۋمدەرىمەن, باي رەپەرتۋارىمەن, ورىنداۋشىلىق شەبەرلىگىمەن مىقتى كاسىبي ۇجىم رەتىندە كورسەتە ءبىلدى. حورەوگرافيا ونەرى نەگىزىنىڭ ءبىرى – ۇلتتىق فولكلوردى ناسيحاتتاۋ, قازاق حالقىنىڭ بي مادەنيەتىن دامىتۋ جانە بايىتۋ, الەم حالقىنىڭ حورەوگرافيالىق ماتەريالدارىنا ۇندەۋ, حورەوگرافيانىڭ جاڭا باعىتتارىن باتىل يگەرۋ, جوعارى ەستەتيكالىق مانەر – «ناز» بي تەاترىنىڭ بۇگىنگى كۇندەرىنىڭ دامۋ ۇستانىمدارى. «نازدىڭ» ساتتىلىگىنىڭ نەگىزى – كوركەمدىك جەتەكشى مەن باس بالەتمەيستەردىڭ جانە رەپەتيتور-ۇستازدار قۇرامىنىڭ مىقتىلىعى, اۋىزبىرشىلىگى, ولاردىڭ كاسىپتىك دەڭگەيى, ۇزدىكسىز شىعارماشىلىق ىزدەنۋى, ىنتالىلىق جانە ەڭبەققورلىعى.
گۇلبانۋ مىرزاباەۆا,
قىزىلوردا وبلىستىق فيلارمونياسى «توميريس» بي ءانسامبلىنىڭ باس بالەتمەيستەرى
ءباسى بيىك تەاتر
1999 جىلى استانا قالاسىنىڭ مادەنيەت دەپارتامەنتى جانىنان «ناز» حالىق بي ءانسامبلى قۇرىلعان بولاتىن. ءانسامبلدىڭ جەتەكشىلەرى – كەزىندە «التىناي» فولكلورلىق بي ءانسامبلى قۇرامىندا ونەر كورسەتكەن ەرلى-زايىپتى ەركەبۇلان جانە قاديشا اعىمباەۆتار. سول جىلى استانا قالاسى مادەني باسقارماسىنىڭ شاقىرۋىمەن «ناز» حالىق بي ءانسامبلىن قۇرۋ جۇمىسىنا ەكەۋى قىزۋ كىرىستى. «ناز» تەاترىنىڭ العاشقى قويىلىمدارى قازاقتىڭ ۇلتتىق ەپوستارىن, اڭىزدارىن جانە ءداستۇرلى مادەنيەتىن ساحنالاۋدان باستالدى. ۋاقىت وتە كەلە تەاتر كلاسسيكالىق حورەوگرافيا ەلەمەنتتەرىن بىرىكتىرىپ, قازاقتىڭ باي مادەنيەتىن جاڭاشا ءتۇسىندىرۋدى ماقسات ەتىپ قويدى. تەاتر كوپتەگەن حالىقارالىق فەستيۆالگە قاتىسىپ, ەل مادەنيەتىن الەمدىك ارەنادا تانىتتى. «ناز» تەاترىنىڭ شىعارماشىلىعى تەك ەلىمىزدە ەمەس, شەتەلدە دە جوعارى باعالانىپ, ونەرسۇيەر قاۋىمنىڭ نازارىن اۋدارىپ كەلەدى. تەاتردىڭ بيلەرى قازاقتىڭ وسىنداي باي سالت-داستۇرلەرىن ساحنادا كورسەتىپ, حالىقتىق مادەنيەتتى زاماناۋي ونەرگە ساي ۇيلەستىرە وتىرىپ بەينەلەيدى. سونىسىمەن دە «نازدىڭ» ءباسى قاشاندا بيىك!
بالجان تلەۋباەۆا,
ج.تاشەنوۆ اتىنداعى ۋنيۆەرسيتەتتىڭ ونەر كافەدراسى مەڭگەرۋشىسى,
پەداگوگيكا عىلىمدارىنىڭ كانديداتى, دوتسەنت
