فوتو: ساۋدا جانە ينتەگراتسيا مينيسترلىگىنىڭ ساۋدا كوميتەتى
ساۋدا جانە ينتەگراتسيا مينيسترلىگىنىڭ ساۋدا كوميتەتىنىڭ حابارلاۋىنشا, قىركۇيەكتە الماتى وبلىسىنىڭ تۇرعىنى ءوڭىردىڭ ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە «ە-otinish» پلاتفورماسى ارقىلى شاعىم قالدىرعان.
ازامات ءوز وتىنىشىندە «لەرۋا مەرلەن» قۇرىلىس سۋپەرماركەتىنەن ساتىپ الماق بولعان تاۋار باعا بەلگىسىندە 1550 تەڭگە دەپ كورسەتىلگەنىن جازعان. بىراق كاسسادا بۇل ارتيكۋلمەن تىركەلگەن تاۋاردى 2880 تەڭگەدەن ساتقان. وسى شاعىمنىڭ نەگىزىندە الماتى وبلىسى بويىنشا ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتى ءىرى قۇرىلىس سۋپەرماركەتىنە جوسپاردان تىس تەكسەرۋ جۇرگىزدى.
«جوسپاردان تىس تەكسەرىس بارىسىندا ساۋدا وبەكتىسىندە 2 ءتۇرلى باعا كورسەتىلگەنى انىقتالدى. دەپارتامەنت قىزمەتكەرى شاعىمدا كورسەتىلگەن ورىندى تەكسەرگەننەن كەيىن سۋپەرماركەت سىرتىنا قويىلعان تاۋار برەندتىك قۇرىلىس تاۋارى ەكەنى بەلگىلى بولدى, دەگەنمەن ساتۋشى باعا بەلگىسىندە 1550 تەڭگە دەپ كورسەتكەن», دەلىنگەن حابارلامادا.
ايتا كەتەيىك, ىشكى ساۋدا قاعيدالارىنىڭ 54-تارماعىنىڭ 2-تاراۋىنا سايكەس, كەز كەلگەن ىشكى ساۋدا سۋبەكتىسى تاۋاردى ساۋدا وبەكتىسىنىڭ ىشكى نەمەسە سىرتقى سورەلەرىنە قانداي باعامەن راسىمدەسە, ساتىپ الۋشىعا قويىلعان باعا بەلگىسىمەن ساتۋعا مىندەتتى.
قر اقبتك-ءنىڭ 193-بابىنىڭ 4-بولىگىنە سايكەس تاۋاردىڭ قۇنى ساۋدا وبەكتىسىنىڭ ىشكى جانە سىرتقى سورەلەرىندە كورسەتىلگەن باعادان قىمبات ساتىلاتىن بولسا اكىمشىلىك جاۋاپكەرشىلىك كوزدەلگەن.
«وسىعان بايلانىستى «لەرۋا مەرلەن» جشس جوسپاردان تىس تەكسەرۋ ناتيجەلەرى بويىنشا قر اقبتك-ءنىڭ 193-بابىنىڭ 4-بولىگىنە سايكەس الماتى وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى اكىمشىلىك قۇقىق بۇزۋشىلىق تۋرالى حاتتاما تولتىردى. اكىمشىلىك ايىپپۇل سۋمماسى 30 اەك-ءتى قۇرايدى. سۋپەرماركەت اكىمشىلىگى ايىپپۇلدىڭ تولىق قۇنىنىڭ 50 پايىزىن تولەۋ قۇقىعىن پايدالاندى», دەلىنگەن حابارلامادا.
سونداي-اق, قر كاسىپكەرلىك كودەكسىنىڭ 152-بابى 1-تارماعىنىڭ 2-تارماقشاسىنا سايكەس جشس باسشىلىعىنا جەرگىلىكتى دەپارتامەنت تاراپىنان باعا بەلگىسىنە قاتىستى زاڭسىزدىقتى جويۋ تۋرالى نۇسقاما ەنگىزىلگەن.
