Lexus «مىنگەن» جەتكىنشەك

قاراعاندىدا مەكتەپ جاسىن­داعى وقۋشى قىز شەتەلدىك قىمبات ماشينالاردىڭ ءبىرى – Lexus كولىگىن ءمىنىپ ءجۇر دەگەن حاباردى اقپارات كەڭىستىگىنەن بايقاپ قالىپ, العاشقىدا: «وسى جۇرت نە بولسا, سونى جازىپ باستى قاتىراتىنى نەسى؟ وندا تۇرعان نە بار؟» دەپ ازداپ كەيىستىك تانىتقانبىز. بىراق سالدەن كەيىن بۇل حاباردىڭ ينتەرنەتكە بوسقا جاريالانباعانىن سەزە قويدىق. ويتكەنى, «وقۋشى قىز ماشينا ءمىنىپ ءجۇر» دەگەن ءسوزدىڭ ءمانىسى باسقادا ەكەن. دالىرەگى, ول زاڭدى قۇقىعى بولماسا دا كولىك جۇرگىزگەن. ونىڭ قاشاننان بەرى «شوپىر» بولىپ جۇرگەنىن ءوزى نە جانىنداعى جاقىندارى ايتپاسا, ءبىر اللا عانا بىلەدى. بۇل «سەنساتسيانىڭ» جاريالانۋ تاريحىنا كەلەر بولساق, جاس قىزدىڭ وسى ارەكەتىن الدەكىم بەينەكامەراعا جازىپ الىپ, ناتيجەسىندە «قىزىقتى ءفيلمدى» كەڭ قۇرساق عالامتورعا ورنالاستىرعان. بەينە ماتەريالدا كورسەتىلگەندەي, وقۋشى قىز كولىكتىڭ ارتقى ورىندىعىنا سومكەسىن قويىپ, ءوزى جۇرگىزۋشى ورنىنا وتىرادى. بۇدان كەيىن كولىككە بالاسىن كوتەرگەن ايەل كەلىپ, «شوپىردىڭ» قاسىنا جايعاسادى. ودان ارعىسى بەلگىلى. قىز بالا كولىكتى وتالدىرىپ, ماشينالار اعىلىپ جاتقان كوشەگە بەتتەگەن. وسىعان بايلانىستى قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى ارنايى تۇسىنىك بەردى.  پوليتسەيلەردىڭ ايتۋىنشا, كولىكتىڭ يەسى انىقتالىپ, ول زاڭناما اياسىندا اكىمشىلىك جاۋاپكەرشىلىككە تارتىلىپتى. ءيا, ەشتەڭە ب ۇلىنگەن جوق. بىراق ءالى بۋىنى قاتپاعان جاس جەتكىنشەكتى قانداي جاعداي رولگە وتىرۋعا ءماجبۇر ەتتى ەكەن؟ ول – بالا. كوپ نارسەنىڭ بايىبىنا بارا بەرمەيدى. بىراق ۇلكەندەر جاعى نە قاراپ وتىر؟ كامەلەت جاسىنا تولماعان جالعىزدارىنا «اساۋ» كولىكتىڭ تىزگىنىن ۇستاتىپ, اقىرىندا ءومىر بويى ساناسىنان ءبىر ساتكە وشپەيتىن, جۇرەگىنە  قانجارداي قادالعان قايعىعا تاپ بولعاندار از با؟ ويلاناتىن ماسەلە. جولدىباي بازار, «ەگەمەن قازاقستان».