ويدىڭ ءيىرىمىن بوياۋ تىلىندە سويلەتۋ ارقىلى ءوزىنىڭ قولتاڭباسىن قالىپتاستىرعان جەڭىس كاكەن ۇلى جاقىندا امەريكانىڭ نيۋ-يورك قالاسىندا ءوتكەن حالىقارالىق كونكۋرستا «قالا پەيزاجى» اتالىمى بويىنشا «التىن قىران» اتتى باس جۇلدەنى جەڭىپ الىپ, قازاق ەلىنىڭ تاعى ءبىر مارتەبەسىن ءوسىردى. ونىڭ ابىرويىن اسىرعان ارقا توسىندەگى ەسىل وزەنىنىڭ ەكى جاعىندا بوي كوتەرگەن كورىكتى استانامىزدىڭ كوز تارتاتىن اسەم عيماراتتارىن الۋان ءتۇرلى ايشىقتى بوياۋلارمەن اجارىن اشقاندىعىندا جاتقانى انىق.
حالىقارالىق دەڭگەيدە وتكەن بۇل ونەر سايىسىنا الەمنىڭ اقش, كانادا, ۇلىبريتانيا, فرانتسيا, گەرمانيا, رەسەي, قىتاي, جاپونيا, يزرايل, وزبەكستان, قىرعىزستان, وزگە دە مەملەكەتتەردىڭ 1500 سۋرەتشىسىنىڭ اراسىنان توپ جارىپ شىعۋ ەكىنىڭ بىرىنە بۇيىرا بەرمەيتىن باق ەكەنى بەلگىلى. وسى تۇرعىدان كەلگەندە جەڭىستىڭ بۇل جەڭىسى ونىڭ تالانتىن تانىتىپ قانا قويماي, قارىم-قابىلەتىنىڭ دە مىقتى ەكەنىن دايەكتەسە كەرەك.
ول بۇعان دەيىن دە تالاي ونەر جارىسىندا ءوزىن تانىتا بىلگەن. كەيبىر تۋىندىلارى وزگە مەملەكەتتەردىڭ مۇراعاتتارىنا قابىلدانىپ, ورىن العان.
ەسەلى ەڭبەگىن, شىعارماشىلىق جۇمىسىن تانىتۋ ءۇشىن تالانتتى سۋرەتشى وتاندىق جانە دۇنيەجۇزىلىك دەڭگەيدە ەلۋگە جۋىق كورمەسىن, الدەنەشە رەت شىعارماشىلىق كەشتەرىن وتكىزىپ, جۇرتتىڭ ءىلتيپاتىنا بولەنگەنىن دە ايتا كەتسەك دەيمىز. ول تەك سۋرەتشى عانا ەمەس, ۇشقىر ويدىڭ قارىمىمەن بۋىرقانعان بوياۋلاردى كوركەم تىلدە سويلەتىپ ءجۇر. ونەرلى ازاماتتىڭ قالامىنان تۋعان «اق زەر» اتتى كىتابىنان الار تاعىلىم, ۇيرەنەر ۇلگى از ەمەس. قازاق جۇرتىنىڭ مەرەيىن اسىرعان جەڭىستىڭ جەڭىسى تاۋەلسىز جۇرتىمىزدىڭ تاعى ءبىر ەلەۋلى ءساتى دەۋىمىزگە بولادى.
سۇلەيمەن مامەت,
«ەگەمەن قازاقستان».
