بۇل – قازاقستاندىق موتور مايى
حالىقارالىق ستاندارتتارعا سايكەس موتور مايىن شىعاراتىن قازاقستانداعى العاشقى كاسىپورىن «HILL Corporation» جشس-ءى «وڭتۇستىك» يندۋستريالىق ايماعىندا تابىسپەن جۇمىس جاساپ كەلەدى. قازىر الەمدىك نارىقتا «Mobil», «ESSO», «Shell», «Castrol» مايلارىنىڭ ءباسى جوعارى. ال, «Hill» شىعارعان «Fastroil» موتور مايى ساپاسى جاعىنان ولاردان ەش كەم تۇسپەيدى. باعاسىنا كەلسەك, 10-15 پايىزداي ارزان. بۇل مايمەن اۆتوموبيلدەر 15 مىڭ شاقىرىمعا دەيىن جۇرەتىنىنە زاۋىت كەپىلدىك بەرەدى. «Hill» كورپوراتسياسى ەلىمىزدەگى ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا 2010 جىلى اشىلعان.
جاقىندا كورپوراتسياعا باردىق, جۇمىسىمەن تانىستىق.
سەرىكتەستىك ديرەكتورىنىڭ ورىنباسارى ازامات تاجىمبەت ۇلى جولشىبەكوۆ بۇگىنگى جاعدايىنان حاباردار ەتتى. ءوز ەلىمىزدەن بولەك, موتور مايى رەسەي, بەلارۋس مەملەكەتتەرىنە ەكسپورتتالىپ جاتىر. بۇگىندە ءوز مۇمكىندىگىنىڭ 64 پايىزىن عانا پايدالانىپ وتىرعان كورپوراتسيا تاعى باسقا سالالارىن قوسقاندا ۇلكەن تابىسقا شىعادى ەكەن. 2016 جىلى 100 پايىز بيىگىن باعىندىرماق. 3 ملرد. تەڭگەدەن استام ينۆەستيتسيا سالعان كورپوراتسيانىڭ نەگىزگى مەكەمەسى الماتىدا. «سامۇرىق-قازىنا» قورى ارقىلى وتاندىق كاسىپورىندارمەن كەلىسىمشارت نەگىزىندە جۇمىس جاسايدى.
مەملەكەتتىك ساتىپ الۋ باسەكەلەسىندە نەگىزىنەن وتاندىق ونىمگە ماڭىز بەرىلەتىندىكتەن, «Hill» مايىن «قازاقستان تەمىر جولى», «قازمۇنايگاز», «ينتەر گاز», «قازاقمىس», «ەمبىمۇنايگاز» سياقتى ۇلتتىق كومپانيالار ساتىپ الادى. ياعني, ءونىمدى وتكىزۋدە مەملەكەتتىك تەتىكتىڭ ورنى ەرەك. سولاي بولۋعا ءتيىستى دە. وبالى كانى, يندۋستريالىق-يننوۆاتسيالىق باعدارلاما اياسىندا جۇمىس جاساۋعا تىرىساتىن كاسىپكەرلەرىمىز كوبەيىپ كەلەدى. بىراق, تاۋارىن بۇلداۋدا قوسىمشا كەدەرگىلەرگە كەزدەسكەندىكتەن شىعىنعا ۇشىراپ, ەندى قايتىپ ءوندىرىستى كورمەي كەتۋگە بەل بۋاتىندار بار. سوندىقتان, ولار اياعىنان تۇرعانشا مەملەكەتتىك قولداۋ كەرەك-اق.
زاۋىت Inc Exxonmobil, Shell, ChevronTexaco جانە ت.ب. سەكىلدى مۇناي ونىمدەرىن ءىرى وندىرۋشىلەر زاۋىتتارىنىڭ باسىم سانىن قۇرىپ بەرگەن, وسى سالانىڭ كوش باسشىسى بولىپ سانالاتىن امەريكالىق FMC Tehnologies Inc فيرماسىنىڭ تەحنولوگياسىمەن جانە قۇرالدارمەن جابىقتالعان. ەڭ زاماناۋي دەگەن جاعارمايلاردىڭ سان الۋان تۇرلەرىنىڭ وندىرىسىنە قاجەتتى پريسادكالارى مەن رەتسەپتۋراسىن ەۋروپالىق حيميالىق ونەركاسىپ كوشباسى – لۋبريزول كومپانياسى جەتكىزىپ تۇرادى. زاۋىتتىڭ قوسىمشا جابدىقتارى دا يسپانيانىڭ, يتاليانىڭ, چەحيانىڭ, شۆەتسيانىڭ, رەسەيدىڭ جانە تايلاندتىڭ الەمدىك ءوندىرۋشىلەرىمەن جەتكىزىلگەن.
جوبا الەمدىك دەڭگەيدەگى جاعارمايلاردىڭ تولىق سپەكترىن ءوندىرۋدى قاراستىرعان. ءوندىرىس قازاقستاندا وسىنداي ءونىمنىڭ ساتۋ قۇنىن تۇسىرۋگە, يمپورتتى الماستىرۋعا جانە جاعارمايلاردىڭ ەكسپورتىن ارتتىرۋعا مۇمكىندىك بەرەدى.
ازامات جولشىبەكوۆ 2015 جىلداردىڭ ورتا شەنىنەن رەسەي تەمىرجولى كومپانياسىمەن ارىپتەستىك بايلانىس ورنايتىندىعىن ايتادى. سۇرانىس بار, ساپا, باعا ولاردى قاناعاتتاندىراتىن سىڭايلى. زاۋىتتا موتور مايىنىڭ ەكى ءتۇرى شىعارىلادى. «Hill» مايىنىڭ 5 ءليترى 2,5 مىڭ تەڭگە بولسا, حالىقارالىق ستاندارتتارعا نەگىزدەلگەن, ساپاسى دا اناعۇرلىم مىقتى «Fastroil» مايىنىڭ 5 ءليترى 5مىڭ 700 تەڭگەدەن ساتىلۋدا. سونىمەن قاتار, كومپانيا سوليدول, ليتول سياقتى وندىرىسكە اسا قات مايلاۋىش ونىمدەردى دە شىعارماق. مۇندا قازىر 200-دەي ادام جۇمىس جاسايدى, ايلىعىنىڭ ورتاشا قۇنى 80 مىڭ تەڭگەدەن جوعارى. جىلدىق تابىسى 4 ملرد. 800 مىڭ تەڭگەگە شىققان سەرىكتەستىكتەن رەسپۋبليكالىق جانە جەرگىلىكتى بيۋدجەتكە قوماقتى قارجى تۇسەدى.
قازاقستانداعى العاشقى موتور مايىنىڭ جاعدايى وسىنداي. زاۋىت ديرەكتورى نۇربول دۇتباەۆ ءوندىرىستى تولىق ىسكە قوسقاندا الەمدەگى ءباسى بولەك موتور مايلارىمەن باسەكەگە تۇسۋگە قابىلەتىمىز تولىق جەتەدى دەيدى.
قازاق مۇندايدا «اۋزىڭا ماي, استىڭا تاي» دەيدى عوي. بۇرىن موتور مايىن شەتەلدەن تاسىمالداپ كەلسەك, ەندى ءبىزدىڭ مايىمىزعا رەسەي, بەلارۋس, تاجىكستان سياقتى مەملەكەتتەر قىزىعۋشىلىق تانىتىپ, كەلىسىمشارتتار جاساسۋدا. كورىنگەن تاۋدىڭ الىستىعى جوق, ار جاعىندا ەۋروپانىڭ جازىعى بار. وتاندىق ءورىس وسىلاي كەڭەيەدى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.
