فوتو: يۋري بەككەر
ءبىر ەمەس, ءۇش بىردەي جوعارى وقۋ ورنىنىڭ فوتوونەردى مەڭگەرىپ جۇرگەن ستۋدەنتتەرىنىڭ قىزىعۋشىلىعىن وياتقان ىلكىمدى جوبا «شەۆرون» كومپانياسىنىڭ دەمەۋشىلىگىمەن «EcoForming» ەكولوگيا جانە ءبىلىم بەرۋ قورىمەن بىرگە قازاقستان زوولوگيا ينستيتۋتى مەن «National Geographic Qazaqstan» جۋرنالىنىڭ قولداۋىمەن جۇزەگە اسىرىلىپ جاتىر.
جوبا اۆتورلارىنىڭ ايتۋىنشا, جاڭا سايت ينتەرنەت-پايدالانۋشىلارعا قازاقستاننىڭ جان-جانۋارلار الەمىن كەڭىنەن ناسيحاتتاۋدى, اڭ مەن قۇستاردىڭ بىرەگەيلىگىن كورسەتۋدى ماقسات ەتكەن. سوعان وراي, ءاربىر تىرشىلىك يەسىنىڭ ءتۇر-سيپاتى مەن ەرەكشەلىكتەرىن تانىتاتىن جوعارى ساپالى پورترەتتىك فوتوتۇسىرىلىمدەر جاسالعان. فوتوگالەرەيا جوبانى دامىتۋ بارىسىندا تىڭ دەرەكتەرمەن, جاڭا فوتوسۋرەتتەرمەن تولىعا بەرمەك.
ءبىر جاعىنان «قازاقستاننىڭ تۇمسا تابيعاتى» ۋەب-سايتى ستۋدەنتتەر مەن وقۋشىلار ءۇشىن عانا ەمەس, بايتاق ەلىمىزدىڭ فاۋناسىن زەرتتەۋشىلەرىنە دە كورنەكتى ءارى باعالى دەرەكقور رەتىندە قىزمەت اتقارادى. بوياۋى قانىق پلاتفورمانىڭ بىرەگەيلىگى سوندا – مۇندا تۇمسا تابيعاتتاعى جان-جانۋارلار دۇنيەسىن تانىپ-بىلگىسى كەلەتىن زەرتتەۋشىلەر مەن اۋەسقويلارعا اڭدار مەن قۇستاردىڭ پورترەتتىك ءھام تابيعي ورتاداعى جوعارى ساپالى فوتوسۋرەتتەرى ۇسىنىلماق.
تاماشا جوبانىڭ تۇساۋكەسەر راسىمىندە «شەۆرون» كومپانياسىنىڭ الەۋمەتتىك ينۆەستيتسيالار بويىنشا كەڭەسشىسى لەيلا ايتمۇحانوۆا مەن جوبالىق كوماندا وكىلى قانات اباشوۆ جۇمىستاردىڭ قالاي ءجۇرىپ جاتقانى جايىندا قىزىقتى باياندادى.
وسى جوباداعى ەڭ قيىن دا قىزىقتى جۇمىستى اتقارعان فوتوگرافتار – «National Geographic Qazaqstan» جۋرنالىنىڭ شەف-فوتوگرافى ەربولات شادراحوۆ پەن تۇمسا تابيعات فوتوگرافى ۆلاديسلاۆ ياكۋشكينگە ءسوز بەرىلگەندە, كوزمەرگەندەر ەلىمىزدىڭ زووباقتارى مەن ۇلتتىق قورىقتارداعى قىزىقتى ساتتەردى ەرەكشە اسەرمەن اڭگىمەلەدى.
