ىرىكتەۋگە الەمنىڭ تۇكپىر-تۇكپىرىنەن 60-تان استام فيلم تۇسكەن. كوميسسيا مۇشەسى قاتارىنا وتاندىق جانە شەتەلدىك كينوسىنشىلار شاقىرىلعان. ولار ۇسىنىلعان تۋىندىلاردى مۇقيات زەردەلەپ, تەك تالاپقا ساي كەلەتىن فيلمدەردى ىرىكتەپ العان.
ء«بىرىنشى كەزەكتە ءبىز فيلمدەردىڭ وي تەرەڭدىگىنە نازار اۋداردىق. فەستيۆالدىك كينو – كوڭىل كوتەرەتىن كونتەنت ەمەس, بۇل بىرەگەي تۋىندى. ول كورەرمەن كوڭىلىنە ساۋال تاستايدى, سويتە وتىرىپ وعان جاۋاپ ىزدەۋگە ۇمتىلدىرادى», دەيدى ايبارشا بوجەەۆا.
ىرىكتەۋدەن وتكەن فيلمدەردىڭ باسىم بولىگى – اۆتورلىق تۋىندىلار. ولار كوپشىلىك ۇيرەنگەن ءداستۇرلى جانر شەكاراسىنان شىعىپ, قالىپتاسقان قاعيدانى سىندىرۋعا تىرىسادى. سول ارقىلى تىڭنان تۇرەن سالىپ, جاڭا ءورىس ىزدەيدى.
«مەنىڭ ءفاۆوريتىم – فرانتسۋز ءفيلمى «Disco boy». بۇل بوسقىندار تۋرالى ەكشن ەمەس, ول ادام بولمىسىنىڭ قابات-قابات قاتپارلارى تۋرالى تەرەڭ تۋىندى. كۇتپەگەن فينال, پالساپالىق وي كورەرمەندى ەرەكشە ەستەتيكالىق لاززاتقا بولەيدى. مۇنداي كينو تەك فرەنسيس كوپپولا سياقتى مىقتى رەجيسسەرلەردىڭ دەڭگەيىندە باعالانادى», دەيدى كوميسسيا توراعاسى.
سونداي-اق ايبارشا بوجەەۆانىڭ پىكىرىنشە, بۇگىن كوڭىل كوتەرەتىن كونتەنت باسىمدىققا يە. سوندىقتان فەستيۆالدىك كينو قازىر اۋاداي قاجەت.
«بۇل تۋىندىلار ءومىردىڭ تىلسىم ءارى تەرەڭ ماعىناسىن ۇقتىرىپ, الەمگە كوڭىل كوزىمەن قاراۋعا قاراۋعا مۇمكىندىك بەرەدى. جاسىرىنىپ كەلگەن اقيقات ساۋلەسىن سانامىزعا تۇسىرەدى», دەپ قورىتىندىلادى ساراپشى.
ايتا كەتەيىك ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – مادەنيەت جانە اقپارات مينيسترلىگى. كينوفەستيۆالدى تىكەلەي ۇيىمداستىرۋ شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا جۇكتەلگەن.
