كوللاجدى جاساعان – قونىسباي شەجىمباي, «EQ»
كۇن رايىنا بايلانىستى بيىل جىلىتۋ ماۋسىمى كەيبىر وڭىرلەردە مەزگىلىنەن ەرتە باستالدى. تۇرعىندار جىلداعىداي گازدى ەش قيىندىقسىز قوستى. ءۇيدىڭ جىلۋىن ەمىن-ەركىن باقىلاپ وتىر. تابيعي كوگىلدىر وتىن تۇتىنۋشىعا ءتيىمدى, جايلى بولعانىمەن, كەيدە قاراپايىم قاۋىپسىزدىك شارالارىن ەسكەرمەيتىندەر تابىلادى. تابيعي گاز – مەتان. ءيىسسىز ءارى ءتۇسسىز. قاۋپى دە سوندا. سوندىقتان ۇيىنە كوگىلدىر وتىن كىرگىزگەن ءار وتباسى گاز ماماندارىنىڭ كەڭەسىن مۇقيات ورىنداعانى ابزال. قالاي دەگەندە دە, اركىم ءوزىنىڭ ۇيىنە, وتباسىنىڭ اماندىعىنا ءوزى جاۋاپتى.
ەلدىڭ بارلىق ايماعىندا تۇتىنۋشىعا گاز جەتكىزەتىن «QazaqGaz Aimaq» اكتسيونەرلىك قوعامىنىڭ ماماندارى تۇرعىندار اراسىندا تۇرمىستىق گازدى قاۋىپسىز پايدالانۋ جونىندە تۇسىندىرمە جۇمىسىن ءجيى جۇرگىزەدى. ستاتيستيكالىق دەرەكتەرگە زەر سالساق, سول تۇسىندىرمە جۇمىسى ازدىق ەتىپ جاتىر ما دەگەن ويعا قالاسىڭ. مىسالى, 2022 جىلدان بەرى ەل كولەمىندە 65 رەت گاز جارىلۋ دەرەگى تىركەلىپتى. گازدان ۋلانۋ وقيعاسى وسى مەرزىمدە 232-گە جەتكەن. ال زارداپ شەككەندەردىڭ سانى 634 بولسا, 233 ادام قازا تاپقان.
ارىعا بارماي-اق قويالىق, جۋىقتا بولعان بىرنەشە جايتتى مىسال ەتەيىك. قىزىلوردا قالاسىندا زاقىمدانعان مۇرجا سالدارىنان ءۇش ادام گازدان ۋلانىپ قايتىس بولعان. ارال قالاسىندا گاز جارىلىپ, ەكى ادام زارداپ شەككەن. سونداعىسى ءۇي يەسى گاز قوساتىن ورىندى رۇقسات قاعازى بىلاي تۇرسىن, بىلىكتىلىگى جوق مامانعا جاساتىپتى, ياعني مونتاج جۇمىستارى كەزىندە قاۋىپسىزدىك شارالارىن ساقتاماۋدىڭ سوڭى جارىلىسپەن اياقتالىپ وتىر. تاعى ءبىر توتەنشە جاعداي ماڭعىستاۋ وبلىسىنىڭ مۇنايلى اۋدانىندا تىركەلگەن. وندا قازاندىقتىڭ مۇرجاسى سىر بەرىپ, جەتى ادام گازدان ۋلانعان. ابىروي بولعاندا تۇرعىندار اجالدان امان قالىپتى.
وكىنىشكە قاراي, ساقتىق شارالارىنا سەلقوس قاراۋدىڭ سالدارىنان تۋعان وسىنداي وقىس وقيعالار كوپ. مۇنداي جايتتار گاز جابدىعىن تۇراقتى تەكسەرىپ وتىرۋدىڭ ماڭىزىن ۇقتىرادى. ورنى تولماس وكىنىشكە اپاراتىن وقيعالاردىڭ الدىن الۋ ءۇشىن قىستا مۇرجانى بىلىكتى مامانعا ءبىر تەكسەرتىپ الۋ ارتىق ەتپەيدى. تەحنيكالىق قىزمەت كورسەتۋ مەن قاۋىپسىزدىك ەرەجەلەرىن ءار تۇتىنۋشى قاتاڭ ساقتاسا, قاپەردەن شىعارماسا, وقىس وقيعالار دا تىيىلادى.
گازعا جاۋاپتى ماماندار تۇرعىنداردى مۇرجالاردى ۇنەمى تازالاپ, تەكسەرۋگە, قاۋىپسىزدىككە سالعىرت قاراماۋعا شاقىرادى. مۇرجانىڭ بۇتىندىگىن, بىتەلمەۋىن قاداعالاپ, ءتۇتىن تارتاتىن قۇرىلعىنى ۇنەمى تەكسەرىپ وتىرۋدى ەسكەرتەدى. اسىرەسە قىس مەزگىلىندە مۇرجاعا مۇز قاتۋى مۇمكىن. سوندىقتان گاز جابدىعىن پايدالانار كەزدە گازدى اۆتوماتتى تۇردە وشىرەتىن دابىل ورناتۋ ەش ارتىق ەتپەيدى. سوسىن تۇتىنۋشىلار گازدى قوساردا, جالعايتىن كەزدە نەمەسە ورنىن اۋىستىراردا بىلىكتى ماماننىڭ كومەگىنە جۇگىنگەنى ابزال. ويتكەنى كۇماندى نەمەسە قولدان جاسالعان گاز قوندىرعىلارىنىڭ باعاسى ءتيىمدى بولعانىمەن, ساپاسىنا ەشكىم كەپىلدىك بەرە المايدى.
