ءيا, تەمىردەن ءتۇيىن تۇيەتىن شەبەر بولۋعا قىزىعاتىن جاستاردىڭ قاتارى سيرەك ەكەنى راس. دەسەك تە تۇركىستان قالاسىنىڭ تۇرعىنى قۇربانالى راسۋلوۆ توكار بولۋعا بالا كەزىنەن قىزىققان. بۇگىندە جيىرما جەتى جاستاعى جىگىتتىڭ جۇمىسشى ماماندىعىن تاڭداپ, توكارلىق قىزمەت كورسەتىپ كەلە جاتقانىنا ون جىلعا جۋىقتاپتى.
«بالا كەزىمنەن اكەمە كومەكشى بولدىم, قاسىنان شىقپايتىنمىن. ون ەكى جاسىمنان باستاپ تۇرمىستىق تەحنيكالاردى, سۋ شىعاراتىن موتورلاردى, باسقا دا ءتۇرلى تەحنيكالاردى جوندەۋدى, ولارمەن جۇمىس ىستەۋدى ۇيرەنە باستادىم. بەرتىنىرەك اكەم توكارلىق ستانوك ساتىپ الدى. سول قوندىرعىدا ماعان كوپتەگەن جۇمىستى ۇيرەتتى. جالپى, اكەم ءوز بىلەتىنىن ماعان دا ەرىنبەي ۇيرەتىپ, وسى ءبىر بەينەتكەش ماماندىقتىڭ قىر-سىرىن مەڭگەرۋىمە سەپتىگىن تيگىزدى. وعان قوسىمشا, ينتەرنەت كەڭىستىگى ارقىلى دا كوپ نارسەنى وقىپ-ۇيرەندىم. ون جىلعا جۋىقتاپتى, وسى ىسپەن اينالىسىپ كەلەمىن», دەيدى قۇربانالى ءابدىماناپ ۇلى.
توكارلىق ستانوكتا مەتالل مەن باسقا دا ماتەريالداردى پايدالانا وتىرىپ ءتۇرلى بەتتەردى, بۇيىرلىك جازىقتىقتاردى وڭدەپ, كەسەتىن, سونداي-اق بۇراندا كەسۋ, بۇرعىلاۋ سىندى كوپتەگەن وپەراتسيالاردى ورىندايتىن شەبەر جۇمىسىنىڭ وڭاي ەمەستىگىن ايتادى. سۇرانىسقا يە جوعارى دەڭگەيدەگى توكار بولۋعا ەڭ كەمى ەكى-ءۇش جىلدىق تاجىريبە كەرەك ەكەن.
«كەز كەلگەن وندىرىستە, قۇرىلىستا مەتالل كونسترۋكتسيالار, ستانوكتار, مەتالل بولشەكتەر قولدانىلادى. ءساتتى جۇمىس ىستەپ, سەنىڭ قىزمەتىڭە جۇگىنگەن ادامداردىڭ سۇرانىسىن قاناعاتتاندىرۋدا شەبەردىڭ دالدىك, ۇقىپتىلىق, قارا جۇمىسقا توزىمدىلىك سياقتى جەكە قاسيەتتەرى بولۋى كەرەك. دالدىگىڭىز ماتەماتيكا, گەومەتريامەن ۇشتاسادى, سىزۋ, فيزيكانى دا ءبىلۋ ماڭىزدى. مۇنى ايتىپ وتىرعان سەبەبىم, ءبىلىمى تايازدار جۇمىسشى بولادى دەگەن تەرىس تۇسىنىكتىڭ بارى بەلگىلى. سونىمەن قاتار كەز كەلگەن توكار فيزيكالىق تۇرعىدا مىقتى بولۋعا ءتيىس. ويتكەنى تاڭنىڭ اتىسىنان ستانوكتى ماڭايلاپ تىزە بۇكپەي جۇمىس ىستەۋ وڭاي شارۋا ەمەس. ستانوك جابدىعى جوعارى كەرنەۋدە جۇمىس ىستەيدى, جىلدام اينالاتىن ىستىق مەتالل ەلەمەنتتەرى كوپ. سوندىقتان قاۋىپسىزدىكتى ساقتاۋ دا اسا ماڭىزدى. راس, قازىرگى تاڭدا توكار وتە از. جاڭا ايتىپ وتكەنىمدەي, جۇمىسى وڭاي ەمەس. سوندىقتان دا شىعار بۇل ماماندىقتى تاڭدايتىندار سيرەك, سونداي-اق توكارلىقتى وقىتاتىن وقۋ ورىندارىنىڭ جوقتىعىن العا تارتاتىندار دا بار. ەندى ءبىرى جالاقىسىن قاناعات تۇتپايدى», دەيدى مامان جۇمىسشى.
قۇربانالى جۇمىسشى ماماندىعىن تاڭداعانىنا وكىنبەيتىنىن ايتادى. جۇمىس ىستەي ءجۇرىپ, كاسىپتىك كوللەدجدى تامامداعان وعان 3d ديزاينەرى بولۋ جونىندە ۇسىنىس تا ءتۇسىپتى. ءبىراز تاپسىرىس قابىلداپ, ونى ورىنداعان دا. سونىڭ اراسىندا كەيبىر تاپسىرىستارعا بايلانىستى ەلەكترمونتاجشى دا بولىپ ىستەگەن. الايدا كوپ ۇزاماي توكارلىققا قايتا ورالعان.
«باسقا سالاعا اۋىسىپ كورگەنىم بولماسا, بۇل ماماندىقتى يگەرگەنىمە ەش وكىنبەيمىن, كەرىسىنشە ماقتان تۇتامىن. توكاردىڭ جۇمىسى وتە جاۋاپتى, كۇردەلى. بەرىلگەن تاپسىرمالاردى سىزبالار ارقىلى دالمە-ءدال ەتىپ جاساپ شىعارۋ, ءۇزىلىسسىز جۇمىس ىستەپ تۇرعان ستانوكتىڭ شۋىلى, سەگىز ساعات بويى اياقتا تۇرۋ سياقتى وزىندىك قيىندىقتارى دا جەتەرلىك. بىراق تاپسىرىس بەرۋشىنىڭ كوڭىلىنەن شىعىپ, كۇندەلىكتى وندىرىسكە قاجەتتى بۇيىم جاساپ شىعارعانىڭدا بار قيىندىقتى ۇمىتىپ, ءوز كاسىبىڭنەن ءلاززات الاسىڭ. نەگىزى جاستاردىڭ, زامانداستارىمنىڭ وقىپ-ۇيرەنگەنى جاقسى. ءبىلىمىن راستايتىن ديپلومى بولسا, جۇمىسقا كىرۋى دە وڭاي بولادى. وسى ورايدا پرەزيدەنتىمىزدىڭ 2025 جىلدى جۇمىسشى ماماندىقتارى جىلى دەپ جاريالاۋى ەرتەڭگى كۇنگە سەنىمدى نىعايتادى. ياعني بۇگىندە تاپشى بولىپ وتىرعان جۇمىسشى ماماندىقتى تاڭداۋشىلار قاتارى ارتادى. ارينە, شەبەرلەردەن ۇيرەنگەندەر دە جامان بولمايدى. جاس ماماندارعا تەوريانى كوبىرەك زەردەلەپ, ۇدەرىستىڭ ءمانىن تەرەڭ ءبىلۋ وتە ماڭىزدى. قازىر الەم كۇن سايىن وزگەرىپ, دامۋ ۇستىندە. ءتۇرلى كۋرستارعا قاتىسىپ, توكارلىق ءىستىڭ جاڭالىقتارى تۋرالى وقىپ-ۇيرەنۋگە تىرىسسا, ۇلكەن جەتىستىكتەرگە جول اشىلادى. جالپى, ەڭبەك نارىعىندا توكار ماماندارى جوعارى سۇرانىسقا يە», دەيدى جۇمىسشى.
ەلىمىزدە كاسىپورىنداردىڭ, زاۋىت-فابريكالاردىڭ كوپتەپ اشىلعانىن قالايتىن ق.راسۋلوۆقا توكارلىقتى ۇيرەتۋىن سۇرانىپ حابارلاساتىندار دا بارشىلىق. الايدا ولاردىڭ كوبىسى باسقا وڭىرلەردەن ەكەن. ياعني قىزىعۋشىلىقتارى بولعانىمەن, جەردىڭ شالعايلىعىنا بايلانىستى كەلە المايدى. دەگەنمەن قۇربانالى توكارلىقتى ۇيرەنۋگە نيەت ەتكەن جاستارعا كومەكتەسۋگە ءار كەز دايىن.
تۇركىستان
