سۋرەت: ru.freepik.com
مۇنىڭ سەبەبىن ماماندار ءبىلىم بەرۋ سالاسىنداعى سۇرانىس پەن ۇسىنىستىڭ تومەندەۋىمەن تۇسىندىرەدى. بۇل وقۋ ورىندارىندا تۇلەكتەرگە ديپلوم تابىستاۋ ماۋسىمىنىڭ اياقتالۋىنا بايلانىستى بولۋى مۇمكىن. قىركۇيەك ايىندا, جىلىتۋ ماۋسىمىنا كوشۋ كەزەڭى قارساڭىندا جىلۋ, قازاندىق جابدىقتارىنا قىزمەت كورسەتەتىن جۇمىسشىعا سۇرانىس ارتقان ەدى. مىسالى, وتكەن ايدا قازاندىق وپەراتورلارى, ماشينيستەرى, قازاندىقتاعى باسقا دا جۇمىسشىلاردىڭ بوس ورىندارى كوبەيگەن. مۇنداي ماماندارعا سۇرانىس, اسىرەسە باتىس قازاقستان (2,9 مىڭ بوس جۇمىس ورنى), اقتوبە (1,3 مىڭ), جامبىل (974) وبلىستارىندا قاتتى بايقالعان. بۇدان وزگە, مال شارۋاشىلىعىنان حابارى بار جۇمىسشىلارعا دا سۇرانىس كوبەيگەن. مۇنى مال شارۋاشىلىعىنداعى قىسقى ماۋسىمعا دايىندىق كەزەڭىنىڭ باستالعانىمەن بايلانىستىرۋعا بولادى.
وڭىرلەر بولىنىسىندە جۇمىسشىلاردى قاراعاندى وبلىسى, الماتى قالاسى, باتىس قازاقستان وبلىسى, استانا قالاسىنىڭ جۇمىس بەرۋشىلەرى كوپ ىزدەگەن. بۇل رەتتە قازان ايىندا بوس جۇمىس ورىندارىنىڭ جالپى سانى الماتى (-44%), جەتىسۋ (-37%), استانا قالاسىندا (-34%) ازايعانىن ايتا كەتكەن ءجون.
سۇرانىس پەن ۇسىنىستىڭ تەڭگەرىمسىزدىگى كەي اۋماقتاردا وزەكتى بولىپ قالا بەرەدى. مىسالى, شىعىس قازاقستان وبلىسىندا 5,5 مىڭ بوس ورىنعا 2,5 مىڭ تۇيىندەمە, سولتۇستىك قازاقستان وبلىسىندا 4,1 مىڭ بوس ورىنعا 2 مىڭ تۇيىندەمە, پاۆلودار وبلىسىندا 6,5 مىڭ بوس ورىنعا 3,4 مىڭ تۇيىندەمە تىركەلگەن. ال شىمكەنت قالاسىندا, قىزىلوردا, تۇركىستان وبلىستارىندا تۇيىندەمەلەر بوس ورىندار سانىنان تيىسىنشە 54%, 48%, 47%-عا ارتىق ورنالاستىرىلعان.
قازان ايىندا جوعارى جالاقى باس قۇرىلىسشىلارعا (ورتا ەسەپپەن 679 مىڭ تەڭگە), باس تەحنيكالىق ماماندارعا (شامامەن 565 مىڭ تەڭگە), ۇشۋ قاۋىپسىزدىگى جونىندەگى ينجەنەرلەرگە (شامامەن 554 مىڭ تەڭگە) ۇسىنىلعان. وسى رەتتە ينۆەستيتسيالىق جوبالار جونىندەگى ديرەكتور (ورتا ەسەپپەن 2 ملن تەڭگەدەن باستاپ), ءوندىرىستى باسقارۋدىڭ اۆتوماتتاندىرىلعان جۇيەسى ءبولىمىنىڭ باستىعى (شامامەن 1,8 ملن تەڭگە), كومباينەر (1,2 ملن تەڭگە) لاۋازىمىندا جۇمىس ىستەيتىندەر ەڭ جوعارى جالاقى سۇراعان.
جالپى, وتكەن ايدا ەلەكتروندى ەڭبەك بيرجاسىندا ەڭبەك بەلسەندىلىگى تومەندەگەن. بۇل اسىرەسە ءبىلىم بەرۋ سالاسىندا قاتتى بايقالعان. سونىمەن قاتار قىسقى ماۋسىمنىڭ باستالۋى جىلۋ ءوندىرىسى جۇيەسىنىڭ جۇمىسشىلارىنا سۇرانىستىڭ ءالى دە بولسا ازايماۋىنا سەبەپ بولىپ وتىر.
