قازىر 3 جوبا جۇزەگە استى. اتاپ ايتقاندا, «Koksai resort», «المالى» (جامبىل اۋدانى) تۋريستىك ايماقتارى مەن تاراز قالاسىنداعى «زەربۇلاق» اكۆاپاركى تۋريستەردىڭ بارلىق سۇرانىستارىنا ساي قىزمەت كورسەتەدى.
«وسى جىلدىڭ ءىىى توقسانىنىڭ قورىتىندىسىندا وبلىسقا 95 644 تۋريست ساياحاتتاپ كەلدى. ونىڭ ىشىندە 1 455 شەتەلدىك, ەلىمىزدىڭ وزگە وڭىرلەرىنەن كەلگەن 94 209 تۋريست بار. وتكەن جىلدىڭ سايكەس كەزەڭىمەن سالىستىرعاندا تۋريستەر سانى 40,1 پايىزعا وسكەن. بۇگىندە وبلىس اۋماعىندا 225 تۋريستەردى ورنالاستىرۋ, 525 تاماقتانۋ, 21 دەمالىس ورنى, 16 تۋريستىك ۇيىم, 9 بالالاردى ساۋىقتىرۋ لاگەرى, 7 شيپاجاي جۇمىس ىستەيدى. تۋريستەرگە 1,3 ملرد تەڭگەنىڭ قىزمەتى كورسەتىلدى», دەپ جازىلعان اكىمدىك حابارلاماسىندا.
تۋريستىك ينفراقۇرىلىمدى دامىتۋعا قاتىستى جۇمىستار دا قارقىندى جۇرگىزىلىپ جاتىر. ماسەلەن, جامبىل اۋدانى «اقىرتاس» ارحەولوگيالىق كەشەنىندەگى اۋىزسۋ ماسەلەسى جەكە ينۆەستوردىڭ قاراجاتى ەسەبىنەن شەشىمىن تاپتى. تاراز قالاسىنداعى «تاسكول» دەمالىس ورتالىعى ەلەكتر جەلىسىمەن قامتاماسىز ەتىلدى. بۇدان بولەك, 4 تۋريستىك نىساننىڭ ينفراقۇرىلىمىن دامىتۋعا قاتىستى جوبالىق-سمەتالىق قۇجاتتاما ازىرلەنىپ, مەملەكەتتىك ساراپتامادان وتكىزىلدى.
تۋريستەرگە تولىق اقپارات بەرەتىن, ياعني انىقتامالىق قىزمەتتىڭ بارلىق رەسۋرستارى قامتىلعان 4 تۋريستىك اقپاراتتىق تەرمينال حالىق كوپ شوعىرلاناتىن ورىندارعا قويىلعان.
تۋريزم سالاسىن دامىتۋداعى نەگىزگى مىندەتتەردىڭ ءبىرى – كاسىبي ماماندار دايارلاۋ. وتكەن جىلى گيدتەر مەن ەكسكۋرسوۆودتار كۋرسى ۇيىمداستىرىلىپ, 30 مامان حالىقارالىق دارەجەدەگى سەرتيفيكات الدى. بيىل «جاندى ساباقتار» جوباسى, «Taraz City bus» ەكسكۋرسيالىق باعدارلاماسى, «كوكتەم كوركى – قىزعالداق» ءىس-شاراسى جۇزەگە اسىرىلدى.
2024 جىل – قىتايداعى قازاقستان ءتۋريزمى جىلى بولىپ جاريالاندى. اتالعان باستاما اياسىندا جامبىل وبلىسىنىڭ تۋريستىك الەۋەتى مەن مۇمكىندىكتەرى تانىستىرىلدى.
ايتا كەتەلىك, تاراز قالاسى دۇنيەجۇزىلىك قولونەرشىلەر قالالارىنىڭ تىزىمىنە 56-قالا بولىپ ەنگىزىلىپ, ەلىمىزدىڭ العاشقى قولونەرشىلەر قالاسى مارتەبەسىنە يە بولدى. وسى مارتەبەنى ءارى قاراي بەكىتۋ ماقساتىندا جىل سايىن «تاراز – قولونەرشىلەر قالاسى» حالىقارالىق قولونەرشىلەر كورمەسى ۇيىمداستىرىلىپ تۇرادى.
