فوتولار: ۇكىمەتتىڭ ءباسپاسوز قىزمەتى
ەكى ەل ۇكىمەتتەرى باسشىلارىنىڭ كەزدەسۋىندە ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋ بويىنشا ەكى مەملەكەت باسشىلارى دەڭگەيىندە قول جەتكىزىلگەن ۋاعدالاستىقتاردى جۇزەگە اسىرۋ بارىسى تالقىلانىپ, بيدايدى تەرەڭ وڭدەۋ, قۇرىلىس يندۋسترياسى, كولىك, IT سالاسى, تۋريزم جوبالارىنا ەكپىن بەرە وتىرىپ, ونەركاسىپ كووپەراتسياسى مەن اۋىل شارۋاشىلىعىنا باسا نازار اۋدارىلدى.
قازاقستان-بەلارۋس اراسىندا ءوزارا ساۋدا كولەمى بيىل 8 ايدا $600 ملن-دى قۇراعان. قازاقستاننىڭ (ەكسپورتتاعى ۇلەسى 10,2%) ۇن جانە باسقا دا ونىمدەرى بەلارۋس نارىعىندا سۇرانىسقا يە. سونداي-اق بيىل 9 ايدا اۆتوموبيل تاسىمالى كولەمى 19%-عا ارتىپ, 450,6 مىڭ تونناعا جەتكەن, سالادا وڭ ديناميكا بايقالادى.
قازاقستان مەن بەلارۋس ۇكىمەتتەرى ونەركاسىپ كووپەراتسياسىن دامىتۋ بويىنشا بىرلەسىپ جۇمىس ىستەپ وتىر. جالپى پۋلعا 1,8 مىڭ جۇمىس ورنىن اشۋعا مۇمكىندىك بەرەتىن, قۇنى $277,5 ملن-دى قۇرايتىن 14 جوبا كىرەدى. ونىڭ ىشىندە قازاقستان وڭىرلەرىندە $200 ملن-نان استام سوماعا 11 بىرلەسكەن كاسىپورىن ىسكە قوسىلىپ, 1,6 مىڭ جۇمىس ورنى اشىلدى. زاۋىتتاردا تراكتورلاردى, استىق جانە جەمشوپ جينايتىن كومباينداردى, تىركەلمەلى اۋىلشارۋاشىلىق تەحنيكالارىن قۇراستىرادى. تاعى 3 جوبا ىسكە اسىرۋ ساتىسىندا تۇر.
تەمىر جول ونىمدەرىن شىعاراتىن جانە بەلارۋس ەلىنە رەلستەرگە بەكىتىلگەن شپالدار, فيتينگتىك پلاتفورمالار, تەمىر جول دوڭگەلەكتەرى, توراپتار جانە اگرەگاتتار جەتكىزۋدى ۇيىمداستىرۋ مۇمكىندىگى بار قازاقستان كومپانيالارىنىڭ ەكسپورتتىق الەۋەتىنە ەرەكشە نازار اۋدارىلدى.
كەلىسسوزدەر ناتيجەسىندە ەكىجاقتى بىرقاتار قۇجاتقا, اتاپ ايتقاندا, قازاقستان مەن بەلارۋس ۇكىمەتتەرى اراسىنداعى بىرلەسكەن جوبالار پۋلىن تولىقتىرۋعا جانە ىسكەر توپتار اراسىندا تىعىز بايلانىس ورناتۋعا باعىتتالعان 2025-2029 جىلدارعا ارنالعان ساۋدا-ەكونوميكالىق ىنتىماقتاستىقتى دامىتۋ جونىندەگى جول كارتاسى; «Kazakh Tourism» ۇك» اق مەن بەلارۋس رەسپۋبليكانىڭ ۇلتتىق تۋريزم اگەنتتىگى اراسىنداعى ەكولوگيالىق, مەديتسينالىق, تاۋ شاڭعىسى, اۋىل ءتۋريزمى جانە بالالار مەن جاسوسپىرىمدەر ءتۋريزمى سالاسىندا تاجىريبە الماسۋدى كوزدەيتىن ىنتىماقتاستىق تۋرالى كەلىسىم; مادەني-گۋمانيتارلىق ىنتىماقتاستىق سالاسىنداعى ءوزارا ءىس-قيمىل جونىندەگى 2025-2026 جىلدارعا ارنالعان ءىس-شارالار جوسپارىنا قول قويىلدى.
سونداي-اق مينسك قالاسىنداعى جوعارى تەحنولوگيالار پاركىنە بارعان ساتتە ولجاس بەكتەنوۆكە «بۇلتتى» تەحنولوگيالاردا, كيبەرقاۋىپسىزدىك, قارجى سەكتورى جانە باسقا دا سالالاردا جۇزەگە اسىرىلاتىن تسيفرلى جوبالار ۇسىنىلدى.
