فوتو: Shutterstock
ءماجىلىستىڭ قارجى جانە بيۋدجەت كوميتەتى «قازاقستان رەسپۋبليكاسى مەن ازيا دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى بويىنشا قورىتىندى ازىرلەيدى.
دەپۋتات تاتيانا ساۆەلەۆانىڭ ايتۋىنشا, زاڭ جوباسى 2024 جىلعى 23 قازاندا ماجىلىسكە ۇكىمەتتىڭ قاۋلىسىمەن ەنگىزىلگەن. كەلىسىمگە بيىل 23 تامىزدا استانادا قول قويىلدى.
«ازيا دامۋ بانكى قازاقستان رەسپۋبليكاسىنا 52,3 ملرد يەن قارىز بەرەدى. وتەۋ مەرزىمى – ون بەس جىل, جەڭىلدىك مەرزىمى 2027 جىلدىڭ ءبىرىنشى ماۋسىمىنا دەيىن. قارىز رەسپۋبليكالىق بيۋدجەت تاپشىلىعىنىڭ جوسپارلى كەزەڭگە بەكىتىلگەن مولشەرى اياسىندا ەل ەكونوميكاسىنىڭ تۇراقتىلىعىن قولداۋ ءۇشىن تارتىلادى», دەدى ول ءماجىلىستىڭ جالپى وتىرىسىندا.
سونىمەن قاتار قازاقستان ازيا ينفراقۇرىلىمدىق ينۆەستيتسيالار بانكىنەن دە قارىز الماق. وسى زاڭ جوباسى بويىنشا دا قارجى كوميتەتى قورىتىندى ازىرلەيدى. كەلىسىم بيىل تامىز ايىندا بەكىتىلگەن.
«حالىقارالىق قارجى ۇيىمى قازاقستانعا 52,7 ملرد يەن قارىز بەرەدى. بۇل اقشا دا رەسپۋبليكالىق بيۋدجەت تاپشىلىعىنىڭ جوسپارلى كەزەڭگە بەكىتىلگەن مولشەرى اياسىندا ەل ەكونوميكاسىنىڭ تۇراقتىلىعىن قولداۋ ءۇشىن تارتىلادى», دەپ اتاپ ءوتتى ساۆەلەۆا.
