واوەى باعدارلاماسى – ازيا دامۋ بانكىنىڭ باستاماسى, جەتەكشى حالىقارالىق قارجى ۇيىمدارىمەن سەرىكتەستىكتە جۇزەگە اسىرىلادى. كونفەرەنتسياعا ازيا دامۋ بانكىنىڭ پرەزيدەنتى ماساتسۋگۋ اساكاۆا, واوەى ينستيتۋتىنىڭ ديرەكتورى كابير دجۋرازودا, ەۋروپالىق كوميسسيانىڭ تاياۋ شىعىس, ازيا جانە تىنىق مۇحيتى بويىنشا ديرەكتورى پەتەريس ۋستۋبس, حالىقارالىق ۆاليۋتا قورىنىڭ, دۇنيەجۇزىلىك بانكتىڭ, يسلام دامۋ بانكىنىڭ جانە باسقا دا قارجى ۇيىمدارىنىڭ وكىلدەرى, سونداي-اق وڭتۇستىك كورەيا, جاپونيا, وزبەكستان, قىرعىزستان, ازەربايجان, گرۋزيا, موڭعوليا, پاكىستان, تاجىكستان, تۇرىكمەنستان ۇكىمەتتىك دەلەگاتسيالارى قاتىستى.
مەملەكەتتەردىڭ ەكونوميكالىق جانە قارجىلىق تۇراقتىلىق, ينفراقۇرىلىمدى دامىتۋ, ساۋدا, ەنەرگەتيكا, سۋ رەسۋرستارى, دەكاربونيزاتسيا جانە باسقا دا سالالارداعى ءوزارا ءىس-قيمىلى تالقىلاندى. پرەمەر-مينيستر ولجاس بەكتەنوۆ باعدارلامانىڭ ورتالىق ازيا ءوڭىرى ءۇشىن وزەكتىلىگىن اتاپ ءوتتى. 20 جىلدان استام ۋاقىت ىشىندە وڭىرگە شامامەن 51 ملرد دوللار ينۆەستيتسيا سالىنسا, ونىڭ 9 ملرد دوللاردان استامى قازاقستانداعى جوبالارعا باعىتتالعان.
ء«بىز ورتاق ماقساتتارعا جەتۋ ءۇشىن حالىقارالىق قارجى ۇيىمدارىمەن جانە واوەى-عا قاتىسۋشى ەلدەرمەن تىعىز ىنتىماقتاستىقتا جۇمىس ىستەۋدى جالعاستىرامىز. ءبىز تەرەڭ وڭدەۋگە جانە قايتا وڭدەلگەن ءونىم ۇلەسىن ارتتىرۋعا, ەكسپورت قۇرىلىمىن بەلسەندى تۇردە وزگەرتۋگە جانە ونىڭ كولەمىن ۇلعايتۋعا باسا نازار اۋدارا وتىرىپ, اگروونەركاسىپ كەشەنىن دامىتۋعا باعىتتالعانبىز. سونداي-اق ءبىز ورتالىق ازيا مەملەكەتتەرىنىڭ كولىك قاتىناسى مەن ەنەرگەتيكالىق تۇراقتىلىعىن قامتاماسىز ەتەتىن اۋقىمدى ينفراقۇرىلىمدىق جوبالاردى ىسكە اسىرۋعا مۇددەلىمىز. ءوڭىر ەلدەرى مەن حالىقارالىق قارجى ۇيىمدارىن بىرلەسكەن جوبالاردى جۇزەگە اسىرۋ ءۇشىن كۇش بىرىكتىرۋگە شاقىرامىن», دەپ اتاپ ءوتتى و.بەكتەنوۆ.
ءوز كەزەگىندە ازيا دامۋ بانكىنىڭ پرەزيدەنتى ماساتسۋگۋ اساكاۆا واوەى باسىم باعىتتارى قاتارىندا كليماتتىڭ وزگەرۋىنە قارسى كۇرەستە شەشۋشى ءىس-قيمىلدار قابىلداۋ, ەرتە ەسكەرتۋ جۇيەلەرىمەن تۇراقتى ينفراقۇرىلىم قۇرۋ, سونداي-اق تسيفرلىق ترانسفورماتسيانى دامىتۋ جانە يننوۆاتسيالار ەنگىزۋ تۇرعانىن باسا ايتتى. كونفەرەنتسياعا قاتىسۋشىلار ادامي كاپيتالدى دامىتۋعا جانە حالىقتىڭ تۇرمىس ساپاسىن جاقسارتۋعا باعىتتالعان باستامالارعا نازار اۋداردى.
جيىن قورىتىندىسى بويىنشا واوەى كليمات جانە ورنىقتى دامۋ جوبالارىن دايىنداۋ قورى تۋرالى كەلىسىمگە قول قويىلدى.
