نۇرسۇلتان نازارباەۆ داۋىسىن نۇرسۇلتان نازارباەۆقا بەردى

سەمەيلىك سايلاۋشىلار بوز-الا تاڭنان سايلاۋ ۋچاسكەلەرىنە جارىسا كەلدى دەسەك ارتىق ەمەس. تاڭعى ساعات 7-دەن باستاپ قالا ىشىندەگى بارلىق باعىتتاعى اۆتوبۋس, باعىتتى تاكسيلەر تۇرعىندارعا تەگىن قىزمەت كورسەتكەندىكتەن سايلاۋعا بەلسەندىلىك ەرەكشە بولدى. ازاماتتاردىڭ ماڭىزدى ناۋقانعا قاتىسۋ بەلسەندىلىگىن ارتتىرۋ ماقساتىندا جولاۋشىلار تاسىمالىمەن اينالىساتىن كاسىپورىندار باسشىلىعى تەگىن تاسىمالدايىق دەگەن شەشىمگە كەلگەن ەكەن. وسىلايشا ولار ازاماتتاردىڭ ءوز سايلاۋ ۋچاسكەلەرىنە ەش كەدەرگىسىز جەتۋىن قامتاماسىز ەتىپ, ساياسي ناۋقاندى ۇيىمداستىرۋعا ۇلەس قوسپاق نيەتتەرىن ءبىلدىرىپ, بۇعان جەرگىلىكتى حالىق ريزا بولدى. كوتەرىڭكى كوڭىل كۇيدە تاڭمەن تالاسا سايلاۋ ۋچاسكەلەرىنە كەلگەندەردىڭ ەڭ العاشىقىسى №42 مەكتەپتىڭ وقۋشىسى, 18 جاسقا ەندى تولعان نۇرسۇلتان نازارباەۆ بولدى. تاڭعى ساعات 7.00-دە №164 سايلاۋ ۋچاسكەسىندە داۋىس بەرگەن نۇرسۇلتان نازارباەۆ بۇل ءوزىنىڭ تۇڭعىش رەت داۋىس بەرۋى ەكەندىگىن ايتىپ, قۋانىشىمەن ءبولىستى. – وتباسىمىزدا بارلىعىمىز سايلاۋعا بەلسەنە قاتىسامىز دەپ كەشە ناقتى شەشىم قابىلدادىق, – دەدى نۇرسۇلتان نازارباەۆ, – انام كۇلاندا توكەنباەۆا ەكەۋمىز مىنە, وسى سەبەپتى ساعات تاڭعى جەتىدەن العاشقى بولىپ سايلاۋ ۋچاسكەمىزگە كەلىپ داۋىس بەردىك. مۇندا بارلىق جاعداي جاسالعان, اۋەزدى ءان, ۇلكەندى سىيلاپ, كىشىگە ىزەت كورسەتۋ سياقتى ادەپتىلىكتى بارلىعى ساقتاۋعا تىرىسىپ جاتىر. اركىم ءوز تاڭداۋىن جاساۋدا. مەن, ارينە, ءوزىمنىڭ اتى-ءجونىم نۇرسۇلتان نازارباەۆ بولعاندىقتان, بۇل سايلاۋدىڭ حالىق بولاشاعى ءۇشىن ماڭىزدى ەكەندىگىن تولىعىمەن ۇقتىم. مەكتەپتەگى ۇستازدارىم دا, اسىرەسە, دەنە تاربيەسى ءپانىنىڭ مۇعالىمى باتىر مىرزابەكوۆتى ەرەكشە اتاپ وتۋىمە بولادى, سايلاۋدىڭ ءمان-ماعىناسىن ءبىز سياقتى جاستارعا كەڭىنەن ءتۇسىندىردى. سوندىقتان دا مىنە, وزدەرىڭىز بايقاساڭىز, سايلاۋعا قاتىسۋشى 18-19 جاستاعى جاستاردىڭ دا قاتارى قالىڭ. مەن ءوز داۋىسىمدى ەلباسى نۇرسۇلتان نازارباەۆقا بەردىم. – اركىم ءوز قالاۋىنشا داۋىس بەرۋدە, – دەيدى سەنىمدى وكىل, ارداگەر-اقساقال ساعىندىق بەيسەنباەۆ, – №160 سايلاۋ ۋچاسكەسىنە ەڭ العاشقىلاردىڭ ءبىرى بولىپ «قازاقستان بارىسى» ايبەك نۇعىماروۆ كىرىپ كەلگەندە, داۋىس بەرۋشىلەردىڭ بارلىعى ريزا بولىپ, قول سوعىپ, قوشەمەتتەدى. تەك ەل الدىندا جۇرگەن تانىمال, بەدەلدى ادامدار عانا ەمەس, دەمالىس ۇيلەرىندە, ەمحانالاردا, قاتىناۋى قيىن ەلدى مەكەندەردە جاتقان قاراپايىم ەڭبەك ادامدارىن دا وسى سايلاۋعا اتسالىسۋلارى ءۇشىن ۇيىمداستىرۋ شارالارىن تىڭعىلىقتى جۇرگىزدىك. بارلىق ماسەلە جان-جاقتى قاراستىرىلعان. سونداي-اق, اۋرۋ-سىرقاۋلى, ءجۇرىپ-تۇرۋى قيىن ادامدار ءۇشىن كوشپەلى جاشىكتەر جۇمىس ىستەۋدە. №160 سايلاۋ ۋچاسكەسىندەگى بىرنەشە كابينالاردا ەشقانداي ىركىلىس, كىدىرىس, بوگەت جوق. سونداي-اق, ءبىز بولعان №22 مەكتەپتە ورنالاسقان №175 سايلاۋ ۋچاسكەسىندە دە سايلاۋشىلاردىڭ قاتارى تولاستامادى. سولاردىڭ ءبىرى وبلىستىق اباي اتىنداعى امبەباپ كىتاپحانا قىزمەتكەرى شولپان ۇبىعوجاقىزى سايلاۋعا بەلسەنە قاتىسۋشىلاردىڭ ءبىرى رەتىندە وسىنداعى ۇيىمشىلدىققا ريزا بولدى. ال سەمەي قالاسىنىڭ اكىمى ايبەك كارىموۆ سەمەيدەگى №260 سايلاۋ ۋچاسكەسىندە ءوزى قالاعان كانديداتقا داۋىس بەردى. – ءبىز ءۇشىن قازاقستاننىڭ تۇراقتىلىعى مەن گۇلدەنۋى ەڭ ماڭىزدى ماسەلە. جىلدان-جىلعا وركەندەپ كەلە جاتقان ەلىمىزدىڭ ەرتەڭگى دامۋىن قامتاماسىز ەتە الاتىن كانديداتقا داۋىس بەردىم, ول مەنىڭ ازاماتتىق پارىزىم, – دەپ قالا اكىمى ءوز ويىمەن ءبولىستى. راۋشان نۇعمانبەكوۆا. سەمەي