فوتو: mail.kz
كوميتەت توراعاسى ءالي بەكتاەۆ ءوز سوزىندە پرەزيدەنت قاسىم-جومارت توقاەۆتىڭ 2023 جىلعى قىركۇيەكتەگى جولداۋىندا اگروونەركاسىپ سەكتورىنىڭ ونىمدەرىن قايتا وڭدەۋ ۇلەسىن ءۇش جىل ىشىندە 70%-عا دەيىن ارتتىرۋ مىندەتى قويىلعانىن اتاپ ءوتتى. الايدا, ۇكىمەتتىڭ قولداۋىنا قاراماستان, ءجۇن مەن تەرىنى قايتا وڭدەۋ دەڭگەيى تومەن كۇيىندە قالىپ كەلەدى.
«بۇگىنگى تاڭدا وندىرىلگەن ءجۇننىڭ جالپى كولەمىنىڭ تەك 21%-ى جانە تەرىنىڭ 12-13%-ى عانا قايتا وڭدەلەدى. ال جىل سايىن 2 ميلليوننان استام ءىرى قارا تەرىسى وڭدەۋگە جىبەرىلمەيدى جانە كوبىنەسە پوليگونعا تاستالادى. بۇل ەكونوميكا ءۇشىن جىل سايىن شامامەن 7 ميلليارد تەڭگە مولشەرىندە تىكەلەي شىعىندى كورسەتەدى. ەجەلدەن مال شارۋاشىلىعى شيكىزاتىنا ۇقىپتى قارايتىن حالىق داستۇرىنە مۇنداي شىعىن ءتان ەمەس. الەمدىك تاجىريبەدە ءجۇن مەن تەرىنى قايتا وڭدەۋ ءىسى اگروونەركاسىپ كەشەنىنىڭ ماڭىزدى بولىگى بولىپ وتىرسا دا, بۇل سالا ءبىزدىڭ ەلىمىزدە قوسىمشا نازار اۋدارۋ مەن قولداۋدى قاجەت ەتەدى», دەپ اتاپ ءوتتى سەناتور بەكتاەۆ.
سەناتورلار تالقىلاۋ كەزىندە مۇددەلى مەملەكەتتىك ورگاندارمەن بىرلەسە وتىرىپ شيكىزاتتى قايتا وڭدەۋ پروبلەمالارىن شەشۋ جونىندەگى بىرقاتار شارالاردى تالقىلادى. اتاپ ايتقاندا, قايتا وڭدەۋ كاسىپورىندارىن قولداۋ ءۇشىن قوسىمشا زاڭنامالىق شارالاردىڭ قاجەتتىگى مەن سالانى سۋبسيديالاۋ ماسەلەلەرىن قاراۋ تۋرالى ايتىلدى. ەكى جىل بۇرىن تەرى مەن ءجۇندى قايتا وڭدەۋ ءىسى اۋىل شارۋاشىلىعى مينيسترلىگىنە بەرىلگەن بولاتىن. بۇل بەلگىلى ءبىر سۋبسيديا شارالارىن ەنگىزۋگە مۇمكىندىك بەردى. سەناتورلار سالانى قولداۋدى زاڭنامالىق تۇردە بەكىتۋ جانە شيكىزاتتى تەرەڭ وڭدەۋدى ىنتالاندىرۋ ءۇشىن ەرەجەلەر قاراستىرۋدى كەلەسى قادام رەتىندە ۇسىندى.
كەزدەسۋگە قاتىسۋشىلار قايتا وڭدەۋ سالاسىنىڭ دامۋىن تەجەيتىن نەگىزگى پروبلەمالاردى جان-جاقتى تالقىلاۋ جانە شيكىزاتتى تەرەڭدەتىپ وڭدەۋ ءۇشىن كەدەرگىلەردى جويۋ تۋرالى پىكىر الماسۋ قاجەتتىگىن اتاپ ءوتتى.
