فوتو: ەرلان ومار
ايماعامبەتوۆتىڭ پىكىرىنشە, مەملەكەتتىك بيۋدجەتتىڭ تاپشىلىعى تاعى بىرنەشە ماسەلەمەن تىعىز بايلانىستى: مەملەكەتتىك قارىز, ءارتۇرلى قورلاردىڭ «ەكىنشى بيۋدجەت» رەتىندە پايدا بولۋى, ءتيىمسىز بيۋدجەتارالىق قارىم-قاتىناستار جانە بيۋدجەتتىك ءتارتىپتىڭ السىزدىگى.
«مەملەكەتتىك قارىز جانە ونى قوعام تاراپىنان باقىلاۋ ماسەلەسى ءالى دە شەشىلمەگەن كۇيدە قالىپ وتىر. بىزگە سىرتقى جانە ىشكى قارىزداردىڭ قاتاڭ اشىقتىعىن جانە باقىلاۋىن قامتاماسىز ەتەتىن جۇيە قاجەت. قارىزدىڭ ءارى قاراي ءوسۋى ءبىزدى بيۋدجەت داعدارىسىنا اكەلۋى مۇمكىن. كودەكس جوباسىندا ءبىزدىڭ تۇزەتۋلەرگە قاراماستان, بۇل ماسەلە جۇيەلى تۇردە شەشىلمەي تۇر», دەپ جازدى اسحات ايماعامبەتوۆ Telegram پاراشاسىندا.
سونىمەن قاتار دەپۋتات كۆازيمەملەكەتتىك قۇرىلىمدار كوبىنەسە پارلامەنتتىك جانە قوعامدىق باقىلاۋسىز ءىرى كولەمدە قارىز الاتىنىن تىلگە تيەك ەتتى.
«بۇل جاعداي مەملەكەتتىك ورگاندارعا وسىنداي قارىزداردى پارلامەنتپەن كەلىسۋسىز جۇزەگە اسىرۋعا مۇمكىندىك بەرەتىن تەتىككە اينالدى. جاڭا بيۋدجەت كودەكسى بۇل تەتىكتەردى تولىق جاپپايدى جانە مۇنداي باقىلاۋسىز قارىزداردى شەكتەمەيدى. ۇكىمەت قارىزدىڭ قاۋىپسىز دەڭگەيى تۋرالى مالىمدەمەلەرمەن تىنىشتاندىرۋعا تىرىسادى, بىراق بۇل جاعداي ودان دا ۇلكەن الاڭداۋشىلىق تۋدىرادى», دەدى ول.
ونىڭ ايتۋىنشا, «ەكىنشى بيۋدجەت» رەتىندە جۇمىس ىستەيتىن ءارتۇرلى قورلار پارلامەنتتىڭ جانە ءتىپتى جوعارعى اۋديت پالاتاسىنىڭ جالپى قارجىلىق باقىلاۋىنان تىس قىزمەت ەتەدى.
«قارجىلىق جوسپارلاۋدىڭ بىرتۇتاستىعىن قالپىنا كەلتىرۋ ءۇشىن ولار جالپى ستراتەگيانىڭ ءبىر بولىگى بولىپ, پارلامەنتكە ەسەپ بەرۋگە مىندەتتى بولۋى كەرەك. بيۋدجەت بىرىڭعاي بولۋى ءتيىس, ال بۇل ماسەلەگە قاتىستى ءبىزدىڭ تۇزەتۋلەرىمىز ءالى دە تالقىلاۋ كەزەڭىندە تۇر», دەدى ايماعامبەتوۆ.
دەپۋتات سامۇرىق-قازىنادان ديۆيدەندتەردى بيۋدجەتكە اۋدارۋ ماسەلەسىنە دە نازار اۋداردى. سامۇرىق-قازىنادان بيۋدجەتكە ديۆيدەندتەر اۋدارۋ ماسەلەسى ءالى شەشىمىن تاپپاعان. ديۆيدەندتەر بيۋدجەتكە ءتۇسىپ, قاجەت بولعان جاعدايدا سامۇرىق-قازىنا كومپانيالارىنىڭ ينفراقۇرىلىمدىق جوبالارىن قايتا ينۆەستيتسيالاۋعا باعىتتالۋى ءتيىس.
«ەڭ باستىسى, بارلىق قاراجات بيۋدجەت ارقىلى ءوتۋى كەرەك. قازىرگى تاڭدا, جۇزدەگەن ميلليارد, ءتىپتى تريلليونعا جۋىق قاراجات بيۋدجەتتەن تىس قالىپ وتىر دەۋگە بولادى. بۇل قاراجاتتىڭ ءبىر بولىگى ۇكىمەتتىڭ تاپسىرماسى بويىنشا الەۋمەتتىك-مادەني نىسانداردى سالۋعا جانە باسقا دا الەۋمەتتىك باعىتتارعا جۇمسالادى, الايدا بۇل قاراجاتتىڭ جۇمسالۋى اشىق ەمەس, بيۋدجەتتىڭ جالپى ماقساتتارىمەن بايلانىستى ەمەس جانە قوعامدىق ءارى بيۋدجەتتىك باقىلاۋدان تىس وتەدى. بۇل جەردە دە ناقتى شارالار قاجەت», دەپ قورىتىندىلادى اسحات ايماعامبەتوۆ.
