سۋرەت: primeminister.kz
حالىقارالىق كورمەنىڭ سالتاناتتى اشىلۋ راسىمىنە قىتاي حالىق رەسپۋبليكاسى مەملەكەتتىك كەڭسەسى پرەمەرى لي تسيان, مالايزيا پرەمەر-ءمينيسترى انۆار يبراگيم, وزبەكستان پرەمەر-ءمينيسترى ابدۋللا اريپوۆ, موڭعوليا پرەمەر-ءمينيسترى لۋۆساننامسراين ويۋن-ەردەنە, سەربيا پرەمەر-ءمينيسترى ميلوش ۆۋچەۆيچ قاتىستى.
وتكەن جىلدىڭ قورىتىندىسى بويىنشا قىتايدىڭ ورتالىق ازيا ەلدەرىمەن تاۋار اينالىمىنىڭ جارتىسىنان استامى قازاقستانعا تيەسىلى بولىپ وتىر. پرەمەر-مينيستر ولجاس بەكتەنوۆ مەملەكەتتەر اراسىنداعى كەدەرگىسىز ساۋدا-ساتتىق, ەلەكتروندى كوممەرتسيا, كولىك پەن لوگيستيكانى دامىتۋ, وزىق جي تەحنولوگيالارىن ەنگىزۋدە ءوزارا ءىس-قيمىلدى نىعايتۋدىڭ ماڭىزدىلىعىن اتاپ ءوتتى.
«جىبەك جولى ەلەكتروندى كوممەرتسياسى» قاناتقاقتى ايماعىن قۇرۋداعى ىنتىماقتاستىقتى نىعايتۋ كەلەشەگى زور بولىپ سانالادى. قازاقستاندىق پاۆيلوندار «Alibaba» جانە «JD.com» ءىرى ساۋدا پلاتفورمالارىندا تابىستى جۇمىس ىستەپ تۇر. «Douyin» الاڭىندا پاۆيلون اشۋ, ەلىمىزدە تسيفرلىق ساۋدا ارنالارى ارقىلى لوگيستيكانى جەڭىلدەتۋ ءۇشىن بوند قويمالارى مەن كەشەندى قويما ينفراقۇرىلىمىن سالۋ بويىنشا جۇمىس جۇرگىزىلىپ جاتىر. قازاقستان قىتايدان ەۋروپاعا جەرۇستى تاسىمالىنىڭ 80%-دان استامىن قامتيدى. «باتىس ەۋروپا – باتىس قىتاي» حالىقارالىق ترانزيتتىك ءاۆتودالىزى, ليانيۋنگان پورتىنداعى لوگيستيكالىق ورتالىق, سيان قۇرعاق پورتىنداعى جۇك تەرمينالى, قىتايمەن شەكاراداعى ءۇشىنشى تەمىرجول وتكىزۋ پۋنكتى جانە باسقا دا ءىرى ينفراقۇرىلىمدىق جوبالار ترانسقۇرلىقتىق ەكونوميكالىق دالىزدەر جۇيەسىن جەتىلدىرۋگە, تاۋار اينالىمىن ۇلعايتۋعا جانە ەكى ەل حالقىنىڭ ءال-اۋقاتىن ارتتىرۋعا باعىتتالعان. قازاقستان تسيفرلاندىرۋ سالاسىندا ەلەكتروندىق ۇكىمەتتىڭ دامۋ يندەكسى بويىنشا 24-ورىن, ونلاين قىزمەتتەر بويىنشا 10-ورىن, سونداي-اق دۇنيەجۇزىلىك بانك رەيتينگىنە سايكەس مەملەكەتتىك تەحنولوگيالاردىڭ جەتىلۋ يندەكسىندە 6-ورىن الادى. جاساندى ينتەللەكتىنى قولدانۋ ماسەلەلەرى بويىنشا تاجىريبە الماسۋ ەكونوميكالىق پروگرەستىڭ قوزعاۋشى كۇشى بولا الادى», دەدى ولجاس بەكتەنوۆ.
قحر مەملەكەتتىك كەڭەسىنىڭ پرەمەرى لي تسيان جانە حالىقارالىق كورمەگە قاتىسۋشى ەلدەر دەلەگاتسيالارىنىڭ باسشىلارى تسيفرلاندىرۋ تاقىرىبىنا باعىتتالعان قازاقستاننىڭ «جاڭا ءداۋىر, ورتاق بولاشاق» ۇلتتىق پاۆيلونىندا ۇسىنىلعان ونىمدەرمەن تانىستى. ساۋدا جانە ينتەگراتسيا ءمينيسترى ارمان شاكقاليەۆ, «ۇلتتىق اقپاراتتىق تەحنولوگيالار» اق, «Kazakh Invest», احقو, «QazTrade», «Kaspi Bank» وكىلدەرى ەلىمىزدەگى تابىستى جوبالاردى, ونىڭ ىشىندە ەلەكتروندىق جانە قارجىلىق قىزمەتتەردى, ترانسشەكارالىق ساۋدانى دامىتۋ, ينۆەستيتسيالار تارتۋ بويىنشا جەتىستىكتەرىن تانىستىردى. سونىمەن قاتار وتاندىق ازىرلەۋشىلەردىڭ ستارتاپتارى كورسەتىلدى.
قازاقستاننىڭ كوممەرتسيالىق پاۆيلونىندا بيىلعى جاڭالىق وتاندىق ءونىمدى ونلاين ساتۋ بولدى. 260 شارشى مەتر الاڭدا وتاندىق وندىرۋشىلەردىڭ 50-گە جۋىق تاۋارىنىڭ – ەت, ءسۇت, ماي, استىق ونىمدەرى, كونديتەرلىك ونىمدەر, شىرىندار مەن سۋسىندار, بال, توقىما جانە باسقا دا ونىمدەر كورمەسى ۇيىمداستىرىلدى. «TikTok» پلاتفورماسى ارقىلى ستريمينگ ىسكە قوسىلدى, بۇل ستەندكە كەلۋشىلەرگە عانا ەمەس, سونىمەن قاتار بۇكىل الەمدەگى كورەرمەندەرگە ونىمدەردىڭ اسسورتيمەنتىمەن تانىسۋعا, ولاردى ناقتى ۋاقىت رەجىمىندە ساتىپ الۋعا مۇمكىندىك بەرەدى. كورمەنىڭ العاشقى ساعاتتارىندا عانا ونلاين رەجىمدە 22 مىڭ دوللارعا جۋىق سوماعا وتاندىق تاۋار ساتىلدى. سونداي-اق پاۆيلون بيىل 2 ەسە كەڭەيتىلدى. قاتىسۋشىلاردىڭ 80%-دان استامى – شوب وكىلدەرى. جىل سايىن حالىقارالىق كورمەگە 300 مىڭنان استام قىتايلىق كاسىبي ساتىپ الۋشى قاتىسادى, بۇل قحر-عا ەكسپورتتى ۇلعايتۋعا جاعداي جاسايدى.
