فوتو: egemen.kz/ ەرلان ومار
ءادىل قۇسمانوۆ ليبەراليزاتسيا باعىتىنداعى جوسپارلى جۇمىستىڭ الدىن الا ناتيجەسى رەتىندە قر پرەزيدەنتى قاسىم-جومارت توقاەۆتىڭ «ەكونوميكانى ليبەراليزاتسيالاۋ شارالارى تۋرالى» جارلىعىنا نازار اۋدارادى.
وندا كاسىپكەرلەردىڭ ەركىن جۇمىس ىستەۋىن قامتاماسىز ەتۋگە باعىتتالعان باستامالار كورسەتىلگەن. ولارعا باسەكەلەستىكتى دامىتۋ, مەملەكەتتىڭ ەكونوميكاعا قاتىسۋىن ازايتۋ جانە بيزنەستىڭ شىعىندارىن تومەندەتۋ كىرەدى.
«مۇندا مەملەكەتتىك ساتىپ الۋلاردا «سارى بەتتەر» قاعيداسىن ەنگىزۋدى, جەكەشەلەندىرۋ جونىندەگى ۇلتتىق كەڭسەنى قۇرۋدى جانە جەكەشەلەندىرۋگە جاتاتىن مەملەكەتتىك نىساندارعا ناقتى تالاپتاردى ازىرلەۋدى اتاپ ءوتۋ قاجەت. ەسەپتىلىكتى قامتاماسىز ەتۋ بويىنشا, مەملەكەت باسشىسىنىڭ «ۇلتتىق قور – بالالارعا» باستاماسىنا نازار اۋدارۋ ماڭىزدى. ونىڭ تىكەلەي ەكونوميكالىق جانە الەۋمەتتىك باعىتىنا قاراماستان, بۇل باستامانىڭ نەگىزگى ماعىنالارىنىڭ ءبىرى – ۇلتتىق قوردىڭ قىزمەتىنىڭ اشىقتىعى جانە قوعامدىق باقىلاۋى. تاعى ءبىر وڭ اسەرى – قور قاراجاتىن تيىمدىرەك پايدالانۋ جانە ونىڭ تابىستىلىعىن ارتتىرۋ بولىپ تابىلادى», دەيدى ادىل قۇسمانوۆ.
بارشا ازاماتتاردىڭ مۇمكىندىك تەڭدىگىن قامتاماسىز ەتۋ ماسەلەسىندە مەملەكەت بازالىق مۇمكىندىكتەر دەڭگەيىن كوتەرۋ ساياساتىن ۇستانىپ وتىر.
«بۇل ساپالى ءبىلىم مەن دەنساۋلىق ساقتاۋعا تەڭ قولجەتىمدىلىكتى (مىسالى, «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى, مەكتەپكە دەيىنگى جانە مەكتەپتەگى بىلىممەن قامتۋدى كەڭەيتۋ جانە ت.ب.), نەگىزگى ينفراقۇرىلىمعا قولجەتىمدىلىكتى ارتتىرۋدى جانە تۇرعىن ءۇي-كوممۋنالدىق قىزمەتتەردى ۇزدىكسىز جەتكىزۋدى قامتيدى. مەملەكەت ءوسىپ كەلە جاتقان سايىن, «جىلدام جەڭىستەر» ءداۋىرى اياقتالىپ, كەيىنگى مەملەكەتتىك وزگەرىستەردىڭ سيپاتتامالارى نەگىزدىلىك پەن ۇزاق مەرزىمدىلىككە اينالىپ جاتىر. قازىرگى ۋاقىتتا پرەزيدەنت ق. توقاەۆتىڭ نەگىزگى رەفورمالارى ءدال وسى جولمەن جۇزەگە اسىرىلىپ جاتىر», دەيدى «ەكونوميكالىق زەرتتەۋلەر ينستيتۋتى» اق باسقارما توراعاسىنىڭ ورىنباسارى.
