فوتو: قر تۋريزم جانە سپورت مينيسترلىگى
تۋريزم جانە سپورت مينيسترلىگىنىڭ مالىمەتىنشە, Neo Nomad ۆيزاسىن الۋ ءۇشىن وزگە ەل ازاماتى قازاقستاننان تىس جەردە تۇراقتى كىرىسىنىڭ بار ەكەنىن دالەلدەۋى كەرەك. سونداي-اق ونىڭ مولشەرى ايىنا كەمىندە 3 000 اقش دوللارىن قۇراۋى قاجەت. سونىمەن قاتار نەگىزگى كىرىس تالاپتارىنان باسقا, شەتەلدىك ءوتىنىش بەرۋشىگە مەديتسينالىق ساقتاندىرۋ جانە سوتتىلىعىنىڭ جوقتىعى تۋرالى انىقتاما تالاپ ەتىلەدى.
ايتا كەتەيىك, اتالعان ۆيزا قاشىقتان جۇمىس ىستەيتىن تۋريستەرگە, ياعني باعدارلامالاۋ, ماركەتينگ, قارجى, كونسالتينگ, ديزاين جانە ەلەكتروندى كوممەرتسيا سياقتى ءتۇرلى سالالاردا قىزمەت ەتەتىن شەتەلدىك ازاماتتارعا ارنالعان.
ۆيزا يەلەرىنىڭ ءبىر جىلعا دەيىن قازاقستاندا تۇرۋعا مۇمكىندىگى بار. وسى ۋاقىت ىشىندە ولار شەتەلدىك كومپانيالاردا جۇمىس ىستەي الادى. بۇل شەتەلدىك تۋريستەرگە قازاقستان مادەنيەتى مەن تۇرمىسىن جاقىنىراق تانۋعا مۇمكىندىك بەرسە, ەلگە ەكونوميكالىق پايدا اكەلەدى دەپ كۇتىلەدى.
ۆيزا ەنگىزىلگەن جاعدايدا جىلىنا 500 ادام ونى السا, ەكونوميكالىق اسەر شامامەن 3,6 ملرد تەڭگەنى قۇرايدى دەپ بولجانىپ وتىر. Neo Nomad ۆيزاسىن پايدالاناتىن شەتەلدىك ازاماتتار قازاقستاندا تۇرىپ, قاراجاتىن وسىندا جۇمسايدى, بىراق وتاندىق ەڭبەك نارىعىنا اسەر ەتپەيدى. بۇل باعدارلامانىڭ ماڭىزدى اسپەكتىسى.
«تۋريزم جانە سپورت, سىرتقى ىستەر, ىشكى ىستەر مينيسترلىكتەرى جانە باسقا دا مۇددەلى مەملەكەتتىك ورگانداردىڭ بىرلەسكەن جۇمىسىنىڭ ناتيجەسىندە قازاقستان زاماناۋي كوشپەندىلەردىڭ ساياحات كارتاسىنا ەندى. ولاردىڭ الەمدەگى سانى 35 ميلليوننان اسادى, ءبىز ولاردى ەلىمىزگە تارتۋ ءۇشىن بارلىق جاعدايدى جاساۋدى كوزدەپ وتىرمىز. اسىرەسە الماتى مەن استانا قالالارى نەو-كوشپەندىلەر ءۇشىن تارتىمدى 150 قالانىڭ قاتارىنا كىرەدى», دەدى تۋريزم جانە سپورت ءمينيسترى ەربول مىرزابوسىنوۆ.
