فوتو: ۇكىمەتتىڭ ءباسپاسوز قىزمەتى
ولجاس بەكتەنوۆ KGIR جۇمىسىن اشا وتىرىپ, دوڭگەلەك ۇستەل مەملەكەت باسشىسىنىڭ توراعالىعىمەن وتكەن شەتەلدىك ينۆەستورلار كەڭەسى وتىرىسىنىڭ قيسىندى جالعاسى سانالاتىنىن جانە بيزنەس-قوعامداستىقپەن تىعىز ديالوگ قۇرۋعا باعىتتالعانىن اتاپ ءوتتى.
قازاقستان ۇكىمەتى مەملەكەت باسشىسىنىڭ تاپسىرماسىن ورىنداۋ ءۇشىن قولايلى ينۆەستيتسيالىق احۋالدى قالىپتاستىرۋ بويىنشا جۇيەلى جۇمىس جۇرگىزىپ جاتىر. بۇگىندە ەلىمىزدە 14 ارنايى ەكونوميكالىق ايماق جۇمىس ىستەيدى, وندا ينۆەستورلار ءۇشىن سالىقتىق جانە كەدەندىك پرەفەرەنتسيالار كوزدەلگەن, شەتەلدىك جۇمىس كۇشىن جالداۋ ءراسىمى جەڭىلدەتىلگەن, بيزنەس ءۇشىن اكىمشىلىك كەدەرگىلەر ازايتىلعان. كاسىپكەرلەردىڭ ماسەلەلەرىن جەدەل شەشۋ ءۇشىن ۇكىمەت جانىنداعى ينۆەستيتسيالىق شتاب تۇراقتى نەگىزدە جۇمىس ىستەيدى. باسىم ينۆەستيتسيالىق جوبالار ءۇشىن رۇقسات بەرۋ راسىمدەرىنەن ءوتۋدى جەدەلدەتەتىن «جاسىل ءدالىز» نەمەسە Fast-track تەتىگى ىسكە قوسىلادى. وتاندىق جانە شەتەلدىك ينۆەستورلاردىڭ قۇقىقتارى مەن مۇددەلەرىن بارىنشا قورعاۋدى قامتاماسىز ەتۋ ءۇشىن جاعدايلار جاسالعان. ماسەلەن, شەتەلدىك بيزنەسكە احقو-دا اعىلشىن قۇقىعى مەن ۇلتتىق قۇقىقتىق جۇيە اراسىندا تاڭداۋ مۇمكىندىگى بەرىلدى.
ۇكىمەت باسشىسى ەلىمىزدىڭ ماڭىزى باسىم باعىتى ونەركاسىپتى دامىتۋ ەكەنىن اتاپ, شەتەلدىك كومپانيالاردى قازاقستاندىق بيزنەس-قوعامداستىقپەن تىعىز ارىپتەستىككە شاقىردى.
«قازاقستان ۇكىمەتى تۇراقتى جانە بولجامدى ينۆەستيتسيالىق احۋالدى قولداۋ ءۇشىن بار كۇشىن سالادى. جوبانى ىسكە اسىرۋدىڭ ءاربىر كەزەڭىندە ينۆەستورلارمەن تىكەلەي ءوزارا ءىس-قيمىل جاساۋعا ۇلكەن ءمان بەرەمىز, سىزدەردىڭ قۇقىقتارىڭىزدى قورعاۋعا باسىمدىق بەرىلگەن. وتاندىق كومپانيالار ءىرى ينۆەستورلارمەن جەتكىزۋ تىزبەگىندە جۇمىس ىستەي وتىرىپ, تاجىريبە جيناپ, ساپا ستاندارتتارىن ارتتىراتىن بولادى. مۋلتيپليكاتيۆتى ءىرى ينۆەستيتسيالىق جوبالار ارتاراپتاندىرىلعان ەكونوميكالىق ەكوجۇيەنىڭ قالىپتاسۋىنا ىقپال ەتە وتىرىپ, شوب بەلدەۋىنىڭ دامۋىنا اسەر ەتەدى. ءبىز قازاقستانداعى شەتەلدىك وندىرىستەردىڭ دامۋىمەن ونىمدەردەگى قازاقستاندىق قامتۋدىڭ ۇلەسىن ارتتىرۋعا تالپىناتىن بولامىز. قازاقستانداعى كادرلاردى قولداۋ ماسەلەسىنە ەرەكشە كوڭىل بولىنەدى. ءبىز شەتەلدىك ينۆەستورلاردىڭ بارلىق دەڭگەيدە جەرگىلىكتى مامانداردى بەلسەندى تۇردە ەڭبەكپەن قامتۋىن قۇپتايمىز ءارى قولدايمىز. قازاقستان ۇكىمەتى تۇراقتى جانە بولجامدى ينۆەستيتسيالىق احۋالدى قولداۋ ءۇشىن بار كۇشىن سالادى», دەدى ولجاس بەكتەنوۆ.
KGIR–2024 قورىتىندىسى بويىنشا جالپى سوماسى $7 ملرد بولاتىن 32 قۇجات پاكەتىنە قول قويىلدى, ونىڭ ىشىندە پرەمەر-ءمينيستردىڭ قاتىسۋىمەن:
- اقمولا وبلىسى اكىمدىگى, KAZAKH INVEST جانە Dalian Hesheng Holding Group اراسىنداعى بيدايدى تەرەڭ وڭدەۋ بويىنشا قۇنى $650 ملن بولاتىن ستراتەگيالىق ىنتىماقتاستىق تۋرالى كەلىسىم;
- قر ونەركاسىپ جانە قۇرىلىس مينيسترلىگى, KAZAKH INVEST جانە CHN Energy اراسىنداعى كومىر حيميا ونىمدەرىن ءوندىرۋ بويىنشا $4 ملرد-قا ستراتەگيالىق ىنتىماقتاستىق تۋرالى كەلىسىم;
- «Orhun Medical» جشس مەن قازاقستان ۇكىمەتى اراسىنداعى قر دەنساۋلىق ساقتاۋ سالاسىنىڭ مەديتسينالىق قىزمەتتەرى مەن ينفراقۇرىلىمىن جاقسارتۋ بويىنشا $80 ملن-عا ينۆەستيتسيالىق كەلىسىم;
- «SILK WAY ENERGY LTD» مەن قر ۇكىمەتى اراسىنداعى جەتىسۋ وبلىسىنىڭ پانفيلوۆ اۋدانىندا تاۋلىگىنە 1 000 000 نم3 قۋات تۇتىناتىن تابيعي گازدى سۇيىلتۋ زاۋىت سالۋ تۋرالى جالپى قۇنى $305 ملن-دى قۇرايتىن ينۆەستيتسيالىق كەلىسىم;
- «نك «قتج» اق مەن «ترانسپورتەيشن گلوۋبەل ەل-ەل-سي» اراسىنداعى تەمىرجول ماشينا جاساۋ سالاسىندا تسيفرلاندىرۋ مەن جاساندى ينتەللەكت ەلەمەنتتەرىن ەنگىزۋ بويىنشا جوبانى ىسكە اسىرۋ تۋرالى كەلىسىم;
- «Carlsberg Kazakhstan» جشس مەن قازاقستان رەسپۋبليكاسى اۋىل شارۋاشىلىعى مينيسترلىگى اراسىنداعى ەلىمىزدە الكوگولسىز سۋسىندار شىعاراتىن زاۋىت سالۋ بويىنشا جالپى قۇنى $100 ملن بازالىق قاعيداتتار تۋرالى نەگىزدەمەلىك كەلىسىم;
- «شين-لاين» جشس مەن قازاقستان سىرتقى ىستەر مينيسترلىگى اراسىنداعى الەمنىڭ جەتەكشى كومپانيالارىنىڭ قاتىسۋىمەن الماتى وبلىسىندا ازىق-ت ۇلىك كلاستەرىن قۇرۋ تۋرالى بازالىق قاعيداتتار تۋرالى نەگىزدەمەلىك كەلىسىم (35 ءوندىرىس ورنى پىسىقتاۋدا);
- قوستاناي وبلىسىنىڭ اكىمدىگى مەن «Tech Digital» جشس اراسىنداعى اليۋميني قورىتپالارىنان جاسالعان جوعارى ساپالى شىبىقتار مەن پروفيلدەر ءوندىرۋ سالاسىنداعى بازالىق قاعيداتتار تۋرالى كەلىسىم;
- باتىس قازاقستان وبلىسىنىڭ اكىمدىگى مەن «Hyundai Solar KZ 777» جشس اراسىنداعى قۇنى $167 ملن بولاتىن كۇن ەلەكتر ستانساسىن, قالدىقتاردى وڭدەۋ كەشەنىن, قوقىس جاعۋ كەشەنىن, مودۋلدىك جىلىجاي كەشەنىن سالۋ جونىندەگى ىنتىماقتاستىق تۋرالى مەموراندۋم;
- «QazaqGaz» ۇك» اق مەن CNPC اراسىنداعى «سولتۇستىك 1» بلوگىنداعى گەولوگيالىق بارلاۋ جۇمىستارىنىڭ الەۋەتىن زەرتتەۋدىڭ بىرلەسكەن جوسپارى;
- «وتباسى بانكى» اق مەن ازيا دامۋ بانكى اراسىنداعى ەلىمىزدە ينكليۋزيۆتى جانە جاسىل تۇرعىن ءۇيدى قارجىلاندىرۋدى ىلگەرىلەتۋ جوباسى بويىنشا ءوزارا تۇسىنىستىك تۋرالى مەموراندۋم.
