وسىعان وراي ۇيىمداستىرىلعان سالتاناتتى ءىس-شارا بارىسىندا اۋدان اكىمى ازيزحان يسمايلوۆ قارىمدى قالامگەردىڭ قازاق ادەبيەتىنە قوسقان ۇلەسى تۋرالى باياندادى. قالاۋبەك تۇرسىنقۇلوۆ اتىنداعى مەكتەپتەن الداعى ۋاقىتتا ەلىمىزدى جاڭا دەڭگەيگە كوتەرەتىن ءبىلىمدى دە ۇلتجاندى ۇرپاق تاربيەلەنىپ شىعاتىنىنا سەنىم ءبىلدىردى. سونىمەن قاتار جازۋشىلار وداعى كەڭەسىنىڭ مۇشەسى, اقىن-جازۋشى سلامحات سەيىتحامزا ۇلى, اۋداندىق ارداگەرلەر كەڭەسىنىڭ توراعاسى امانباي وماروۆ, شاربۇلاق اۋىلدىق وكرۋگىنىڭ توبە ءبيى امانتاي قۇتتىمبەتوۆ قۇتتىقتاۋ ءسوز سويلەپ, قازىعۇرتتىڭ تۋماسى قالاۋبەك تۇرسىنقۇلوۆتىڭ ءومىر جولىنان اڭگىمە ءوربىتتى. جازۋشىنىڭ شىعارماشىلىق ەرەكشەلىكتەرىمەن قاتار «قۇرمەت بەلگىسى» وردەنىمەن, «ەڭبەكتەگى ەرلىگى ءۇشىن» مەدالىمەن ماراپاتتالعانى, ساحا رەسپۋبليكاسىنىڭ ەڭبەك سىڭىرگەن قايراتكەرى, ساحا رەسپۋبليكاسى مەملەكەتتىك سىيلىعى مەن ەرليك ەريستين اتىنداعى ادەبي سىيلىعىنىڭ, قازاقستان جازۋشىلار وداعى س.سەيفۋللين اتىنداعى سىيلىعىنىڭ لاۋرەاتى ەكەنى ايتىلدى. سالتاناتتى راسىمنەن سوڭ كوپشىلىك قاۋىم اتاۋلى مەكتەپتە اشىلعان قالاۋبەك تۇرسىنقۇلوۆتىڭ مۋزەيى مەن سىنىبىن ارالاپ, شىعارماشىلىعىنان بىرقاتار تىڭ دەرەكپەن تانىستى.
سونداي-اق قالاۋبەك تۇرسىنقۇلوۆتىڭ 90 جىلدىعى اياسىندا اۋداندىق مادەنيەت سارايىندا «قازىعۇرت بەرەكە, بىرلىك باستاۋى» اتتى رەسپۋبليكالىق اقىندار ايتىسى ءوتتى. جىر سايىسىنا ەلىمىزدىڭ قالا جانە وبلىستارىنان كەلگەن وت اۋىزدى, وراق ءتىلدى 10 اقىن قاتىستى. قوعام ءومىرىن, وزەكتى ماسەلەلەردى, ايتۋلى جەتىستىكتەردى جىر جولدارىمەن ءوربىتىپ, كوپشىلىككە وي سالۋمەن اسەرلى كەش سىيلاعان رەسپۋبليكالىق ايتىستىڭ قورىتىندىسىندا قازىلار القاسىنىڭ شەشىمىمەن قاراعاندى وبلىسىنان كەلگەن ماقسات احانوۆ باس جۇلدەنى يەلەنسە, جۇلدەلى ءى ورىنعا تۇركىستاندىق اقىن بەكارىس شويبەكوۆ لايىق دەپ تانىلدى. ال ءىى ورىندى الماتى وبلىسىنىڭ اقىنى ايىم ءامىرحانوۆا, ءىىى ورىندى استانا قالاسىنان يران-عايىپ ايقىنباي ۇلى, قىزىلوردا وبلىسىنان نۇرمات ابدۋللا ۇلى جانە الماتى قالاسىنان نۇرزات تالعاتقىزى ەنشىلەدى. تۇركىستان وبلىسىنان نۇرلىبەك مەيىرمانوۆ, نۇرماحان ءارىپجان ۇلى, شىمكەنت قالاسىنان مەيىرجان جارىلقاپ پەن قازىعۇرت اۋدانىنىڭ اقىنى ەراسىل جاقسىبەك ارنايى جۇلدەلەردى قانجىعالارىنا بايلادى.
تۇركىستان وبلىسى
