ءوڭىر باسشىسى ەربول قاراشوكەەۆتىڭ باسشىلىعىمەن وزگە دە ينۆەستيتسيالىق جوبالار قولعا الىنىپ جاتىر.
ەكى جىل بۇرىن پرەزيدەنت ۇكىمەتتىڭ كەڭەيتىلگەن وتىرىسىندا اكىمدەردىڭ جىل سايىن ءار 10 مىڭ تۇرعىنعا 100 جاڭا جۇمىس ورنىن قۇرۋى كەرەكتىگىن شەگەلەپ تاپسىرعانى بەلگىلى. مەملەكەت باسشىسىنىڭ تاپسىرماسىن جۇزەگە اسىرۋ ماقساتىندا وڭىردە اۋقىمدى جوبالار جۇزەگە اسىرىلا باستادى. جامبىل وبلىسىندا «Super Pharm» فارماتسەۆتيكالىق زاۋىتى قاسىنان «ەرساد – 2021» زاۋىتى اشىلعانى ءمالىم. ءوندىرىس وشاعى توقىما ەمەس, ماتەريال وندىرۋگە باسا دەن قويعان ەدى. اتالعان زاۋىت وندىرىسكە قاجەتتى شيكىزاتتى وزدەرى وندىرۋگە قاۋقارلى.
ءوڭىر باسشىسى ەربول قاراشوكەەۆتىڭ ايتۋىنشا, العاشقى 8 ايدىڭ بەدەرىندە وڭىرگە 247,3 ملرد تەڭگە ينۆەستيتسيا تارتىلدى. جىل سوڭىنا دەيىن بۇل كورسەتكىشتى 702 ملرد تەڭگەگە جەتكىزۋ جوسپارلانعان. سونىمەن قاتار وبلىستىڭ ينۆەستيتسيالىق قورجىنىندا جالپى سوماسى 2,5 ترلن تەڭگەنى قۇرايتىن 70 جوبا بار. بۇل جوبالار جۇزەگە اسقان جاعدايدا 6,3 مىڭ جاڭا جۇمىس ورنى قۇرىلماق. بۇگىن قورداي اۋدانىندا جىلىنا 1,3 ملن توننا تسەمەنت وڭدەۋگە قاۋقارلى زاۋىتتىڭ قۇرىلىس جۇمىسى اياقتالىپ, رەسمي تۇردە اشىلدى. سينگاپۋر كومپانياسى قولعا العان ءوندىرىس وشاعى وتاندىق نارىقتى قامتىپ قانا قويماي, وندىرگەن ءونىمدى ەكسپورتقا شىعارۋدى, سول ارقىلى تابىسىن ەسەلەۋدى جوسپارلاپ وتىر.
وبلىس اكىمدىگى ءباسپاسوز قىزمەتى كەلتىرگەن دەرەككە جۇگىنسەك, سينگاپۋرلىق «Alacem» كومپانياسى قۇرىلىسىن جۇرگىزگەن جاڭا زاۋىت ورتالىق ازياداعى ەڭ ءىرى ءوندىرىس وشاقتارىنىڭ ءبىرى ءارى بىرەگەيى بولماق. زاماناۋي ۇلگىدە سالىنىپ جاتقان تسەمەنت زاۋىتى قالدىقسىز كاسىپورىن ساناتىنا جاتادى. جالپى, قورداي اۋدانى اۋماعىنان سۋ جاڭا تسەمەنت زاۋىتىن سالۋ تۋرالى ەكىجاقتى كەلىسىم نەگىزىندە سينگاپۋر كومپانياسى وكىلدەرى قىزىعۋشىلىق تانىتقان. ورتالىق ازياداعى ءىرى ءوندىرىس وشاعىنا اينالاتىن جاڭا زاۋىتقا 50 ملرد تەڭگە كولەمىندە ينۆەستيتسيا تارتىلعان.
جەرگىلىكتى اتقارۋشى بيلىك كەلتىرگەن دەرەككە جۇگىنسەك, بۇگىن عانا اشىلعان تسەمەنت زاۋىتى تولىق قۋاتىندا جۇمىس ىستەگەن كەزدە 400-گە جۋىق ازاماتتى جۇمىسپەن قامتيدى. كاسىپورىن باسشىلارى نەگىزىنەن جەرگىلىكتى ازاماتتاردى جۇمىسپەن قامتۋعا باسىمدىق بەرەمىز دەگەندى العا تارتىپ وتىر.
قازىر زاۋىتتىڭ تسەحتارىن كەزەڭ-كەزەڭىمەن ىسكە قوسۋ جۇمىستارى جۇرگىزىلىپ جاتىر. كاسىپورىن باسشىلارى 2025 جىلى اتالعان تسەمەنت زاۋىتىن تولىق قۋاتىندا جۇمىس ىستەتۋدى قولعا الۋعا بەكىنىپ وتىر. اتقارىلعان ناقتى جۇمىستىڭ ناتيجەسىندە كاسىپورىن ىشكى نارىقتى وتاندىق ونىممەن قامتيدى. سونىمەن قاتار اتالعان كاسىپورىن باسشىلارى تسەمەنت وندىرىسىندەگى باسەكەگە قابىلەتتىلىكتى ارتتىرىپ, ءونىمدى جۋىق ارادا ەكسپورتقا شىعارۋدى دا ماقسات تۇتادى.
وسى جىلدىڭ 8 ايىنىڭ قورىتىندىسىنا سايكەس, جالپى سوماسى 139 ملرد تەڭگەنى قۇرايتىن 12 جوبا ىسكە قوسىلعان. ناتيجەسىندە, 405 جاڭا جۇمىس ورنى قۇرىلعان. سونداي-اق بيىل جالپى قۇنى 228,5 ملرد تەڭگەنى قۇرايتىن 19 جوبانى ىسكە اسىرۋ كوزدەلسە, جوعارىدا جازعانىمىزداي ونىڭ ەداۋىر بولىگى رەتىمەن ىسكە اسىپ جاتىر. 19 جوبا ىسكە قوسىلعان جاعدايدا 1432 جاڭا جۇمىس ورنى قۇرىلماق. جىل سوڭىنا دەيىن بىرقاتار ءىرى ءوندىرىس ورنى اشىلادى دەپ جوسپارلانعان. ولاردىڭ قاتارىندا «Korkem» تسەمەنت ءوندىرۋ زاۋىتى, «Karatau Chemicals» پيروسۋلفيت ءوندىرۋ كاسىپورنى سەكىلدى ءوندىرىس ورىندارى بار.
جامبىل وبلىسى
