بايقاۋدىڭ اشىلۋ سالتاناتىندا وبلىس اكىمىنىڭ ءبىرىنشى ورىنباسارى زۇلپىحار جولداسوۆ حالىقارالىق «Voice of Turan» قازاق اندەرىن ورىنداۋشىلار بايقاۋى از عانا ۋاقىتتا الەمدىك دەڭگەيدەگى تانىمال جوبالاردىڭ قاتارىنا ەنگەنىن اتاپ ءوتتى. بيىلعى بايقاۋعا مەملەكەتتىك سىيلىقتىڭ لاۋرەاتى, تانىمال كومپوزيتور تولەگەن مۇحامەدجانوۆ باستاعان ونەر قايراتكەرلەرى تورەلىك ەتتى. ەكى كۇن قاتارىنان وتكەن بايقاۋدىڭ العاشقى كۇنىندە شەتەلدىك انشىلەر ەلىمىزدىڭ ونەر شەبەرلەرىمەن بىرگە دۋەت ورىندادى. ال «Voice of Turan – 2023» حالىقارالىق قازاق اندەرى فەستيۆالىنىڭ جەڭىمپازى, ازەربايجاننىڭ تانىمال ءانشىسى لاەليا اليەۆا قوناق رەتىندە ءان شىرقادى. ال ەكىنشى كۇنى قاتىسۋشىلار ءوز تاڭداۋىنداعى قازاق ءانىن شىرقاپ, باق سىنادى.
ارمەنيادان كەلگەن ءانشى Cيۋزاننا مەلكونيان قازاقستان اۆتورلارىنىڭ ۇزدىك شىعارمالارىن, قازاق ءتىلىن ناسيحاتتاۋ, ءان ارقىلى الەمگە حالقىمىزدىڭ مۋزىكا مادەنيەتىنىڭ سان الۋاندىعىن, ۇلى دالا ەلى شىعارمالارىندا ايقىن ساقتالعان مۋزىكالىق ەرەكشەلىكتەردى كورسەتۋ ماقساتىنداعى حالىقارالىق بايقاۋدىڭ گران-پري يەگەرى اتاندى. قازىلار القاسىنىڭ شەشىمىمەن ءى دارەجەلى ديپلومدى ديميترينا گەرمانوۆا (بولگاريا), ءىى دارەجەلى ديپلومدى سامير يولچيەۆ (بەلارۋس), ءىىى دارەجەلى ديپلومدى برايم (كۋبا) مەن دارلەاني پەرنيا (ۆەنەسۋەلا) يەلەندى. سونىمەن قاتار فارو (ازەربايجان), اەلين يەليز (تۇركيا), سايدا مۋحامەتزيانوۆا (تاتارستان), مۋكادداس ۋسمونوۆا (وزبەكستان), تاررارين (يندونەزيا) بايقاۋ ديپلومانتتارى اتاندى. ال تىۆا رەسپۋبليكاسىنان كەلگەن يشكين وگلۋ «ەڭ ۇزدىك ارانجيروۆكا» ارنايى جۇلدەسىمەن ماراپاتتالدى. وزگە دە قاتىسۋشىلارعا ىنتالاندىرۋ سىيلىقتارى بەرىلدى.
تۇركىستان
