قوردايداعى قۋانىش
تاۋەلسىزدىك العالى بەرى جامبىل ءوڭىرىنىڭ جامپوزدارى ساپىنان بوكسشىلار ەرماحان ىبىرايىموۆ, باقتيار ارتاەۆ, دزيۋدوشى ەلدوس سمەتوۆتىڭ وليمپيادا ويىندارىندا اتوي سالعانى بارشاعا بەلگىلى. ءۇش ساڭلاق تا التىن بەسىك اۋىلدا تۋعان سايىپقىراندار ەكەنىن مۇقىم ەل جاقسى بىلەدى. اۋىلدا تۋىپ الەمدى مويىنداتقان وعلانداردىڭ ءىزباسارلارىن دايىنداۋدا ءبىرىنشى كەزەكتە بۇقارالىق سپورتقا باسىمدىق بەرۋ كەرەك. ويتكەنى ءبارى دە اۋىل, اۋلا سپورتىنان باستالادى. مۇنى مەملەكەت باسشىسى قاسىم جومارت توقاەۆ «ادىلەتتى مەملەكەت. ءبىرتۇتاس ەل. بەرەكەلى قوعام» اتتى جولداۋىندا دا اتاپ ءوتتى.
«بارشاڭىزعا ءمالىم, مەن بۇقارالىق سپورتتى دامىتۋعا ەرەكشە ءمان بەرىپ وتىرمىن. جاستارىمىز دەنى ساۋ, مىقتى ازامات بولىپ ءوسۋى كەرەك. سوندىقتان ۇلت ساۋلىعىن ساقتاۋدا بۇقارالىق سپورتتىڭ ماڭىزى ايرىقشا. شىن مانىندە, بۇل سالاداعى زاڭنامانى جاڭارتاتىن كەز كەلدى دەپ ويلايمىن. زاڭعا ەنگىزىلەتىن وزگەرتۋلەر بۇقارالىق سپورت پەن بالالار سپورتىن دامىتۋعا زور سەرپىن بەرەدى. سونداي-اق بولاشاق جەڭىمپازدار شوعىرىن دايارلاۋعا جول اشادى», دەگەن مەملەكەت باسشىسىنىڭ ءسوزى بۇقارالىق سپورتتى دامىتۋدىڭ ماڭىزى زور ەكەنىن ايعاقتاپ تۇر.
پرەزيدەنت تاپسىرماسى جامبىل وبلىسىندا دا ساتىمەن ىسكە اسىرىلىپ جاتىر. وڭىردەگى حالىق ەڭ تىعىز ورنالاسقان قورداي اۋدانىندا مەرەكە قارساڭىندا ءتورت سپورت نىسانى پايدالانۋعا بەرىلدى. وسىلايشا, تۇرعىنداردىڭ جەرگىلىكتى اتقارۋشى بيلىككە جىلدار بويى ايتىپ كەلگەن ءوتىنىشى قاناعاتتاندىرىلدى.
شالعايدا ورنالاسقان نوعايباي اۋىلىنىڭ بالالارى العاشقىلاردىڭ ءبىرى بولىپ مەرەكەنىڭ شاراپاتىن سەزىنىپ وتىر. نوعايبايلىق بالالار ەندى زاماناۋي ستاندارتقا ساي سالىنعان شاعىن فۋتبول الاڭىندا جاتتىعادى. سونداي-اق ەلدى مەكەن تۇرعىندارىنىڭ يگىلىگىنە «Street workout» الاڭى دا پايدالانۋعا بەرىلدى.
قوردايلىقتاردىڭ قۋانىشى مۇنىمەن تولاستاعان جوق. اۋدان ورتالىعى قورداي اۋىلىنىڭ شاعىن اۋداندارىندا ەكى جاڭا شاعىن فۋتبول الاڭى اشىلدى. بۇل كۇنى جەرگىلىكتى اتقارۋشى بيلىكتىڭ ۇيىتقى بولۋىمەن جاس سپورتشىلارعا ارنايى سپورتتىق قۇرال-جابدىقتار تابىس ەتىلىپ, شاعىن فۋتبولدان جولداستىق كەزدەسۋ ۇيىمداستىرىلدى.
وبلىس اكىمدىگىنىڭ ءباسپاسوز قىزمەتى كەلتىرگەن دەرەككە جۇگىنسەك, شاعىن فۋتبول الاڭدارىنىڭ قۇرىلىسى جەرگىلىكتى بيۋدجەت ەسەبىنەن ىسكە اسقان. جىل سوڭىنا دەيىن تاعى 5 شاعىن فۋتبول الاڭىنىڭ قۇرىلىسى تولىقتاي اياقتالىپ, پايدالانۋعا بەرىلەدى.
وڭىردە جىل سوڭىنا دەيىن 12 سپورت كەشەنىنىڭ قۇرىلىسىن اياقتاۋ جوسپارلانعان بولسا, قازىرگى كەزگە دەيىن 4 نىسان ەل يگىلىگىنە پايدالانۋعا بەرىلدى. بۇدان بولەك, وبلىستا بۇگىنگى كۇنگە دەيىن 45 سپورت الاڭى اشىلعانىن ايتا كەتكەن ءجون.
جالپى العاندا وڭىردە وتكەن جىلى بۇقارالىق سپورتپەن قامتىلعان ازاماتتاردىڭ سانى 40,2 پايىزدان اسقان بولسا, وسى جىلى سالاعا جاۋاپتى ازاماتتار بۇل كورسەتكىشتى 41 پايىزعا جەتكىزۋدى جوسپارلاپ وتىر. كورسەتكىشتى ارتتىرۋعا جاڭادان اشىلعان سپورت نىساندارى ءوز سەپتىگىن تيگىزەتىنى انىق.
قايىڭدىدا فاپ اشىلدى
پرەزيدەنت جولداۋىندا بيلىك تاراپىنان مەديتسينا سالاسىن دامىتۋعا ايرىقشا باسىمدىق بەرىلەتىنىن اتاپ ءوتتى. مەملەكەت باسشىسى ءوز سوزىندە ەلدى مەكەندەردە مەديتسينالىق, فەلدشەرلىك-اكۋشەرلىك بولىمشەلەر سالۋدىڭ كەزەك كۇتتىرمەس ءىس ەكەنىن دە شەگەلەپ تاپسىردى.
«بۇگىندە ەلىمىزدەگى 650 ەلدى مەكەندە ەمدەۋ مەكەمەسى جوق. الداعى ەكى جىلدا بۇل اۋىلداردا مەديتسينالىق, فەلدشەرلىك-اكۋشەرلىك بولىمشەلەر سالىنىپ, قاجەتتى قۇرال-جابدىقپەن تولىق قامتاماسىز ەتىلەدى. وسىلايشا, مەملەكەت ءبىر ميلليوننان استام ادامنىڭ العاشقى مەديتسينالىق-سانيتارلىق كومەك الۋىنا مۇمكىندىك جاسايدى», دەگەن پرەزيدەنت تاپسىرماسىن جەرگىلىكتى اتقارۋشى بيلىك دەر كەزىندە ورىنداپ جاتىر.
تۇرار رىسقۇلوۆ اۋدانىنا قاراستى قايىڭدى اۋىلى – اۋدان ورتالىعىنان شالعايدا ورنالاسقان. اۋدان ورتالىعىنان جىراقتا جاتقان اۋىل تۇرعىندارى ەلدى مەكەنگە فەلدشەرلىك-اكۋشەرلىك پۋنكت كەرەكتىگىن جىلدار بويى ايتىپ جۇرەتىن. جەرگىلىكتى تۇرعىنداردىڭ ءوتىنىشى نازاردان تىس قالماعانى كوڭىل قۋانتادى.
سونداي-اق قايىڭدى اۋىلىندا جاڭا مەديتسينالىق مەكەمە پايدالانۋعا بەرىلدى. وسىلايشا تۇرعىندار ءوتىنىشى قاعاناتتاندىرىلدى. جالپى قۇنى 249,2 ملن تەڭگەگە سالىنعان جاڭا مەكەمە 15 كەلۋشىگە ارنالعان.
جەرگىلىكتى اتقارۋشى بيلىك كەلتىرگەن دەرەككە جۇگىنسەك, اۋداندا بۇعان دەيىن ەكى فەلدشەرلىك-اكۋشەرلىك پۋنكت (فاپ) سالىنعان ەكەن. بۇدان بولەك, قازىرگى ۋاقىتتا قوراعاتى ستانساسى مەن اقبۇلاق ەلدى مەكەندەرىندە دە ءدال وسىنداي عيماراتتىڭ قۇرىلىس جۇمىسى جۇرگىزىلىپ جاتىر. اۋداننىڭ دامۋ جوسپارىنا سايكەس, الداعى ءۇش جىلدىڭ بەدەرىندە تاعى 5 مەديتسينالىق مەكەمە سالۋ جوسپارلانعان.
جالپى العاندا, وبلىستاعى توزىعى جەتكەن دەنساۋلىق ساقتاۋ ۇيىمدارىنىڭ سانىن 40,3 پايىزدان 39 پايىزعا تومەندەتۋ جونىندە جەرگىلىكتى اتقارۋشى بيلىك قولدان كەلگەنشە قامدانىپ جاتىر. جوسپارلى جۇمىستى ۋاقتىلى جۇزەگە اسىرۋ ماقساتىندا 26 دەنساۋلىق ساقتاۋ نىسانىن سالۋ كوزدەلگەن. ونىڭ ىشىندە 20 نىسان «اۋىلدىق دەنساۋلىق ساقتاۋدى جاڭعىرتۋ» جوباسى اياسىندا بوي كوتەرەدى. ال بۇگىنگى كۇنگە دەيىن ءۇش نىسان ەل يگىلىگىنە پايدالانۋعا بەرىلگەن.
كوكتالدىقتار كوپ كۇتكەن كلۋب
ءوڭىردىڭ مادەنيەت سالاسىن دامىتۋعا وبلىس اكىمى ەربول قاراشوكەەۆتىڭ ءوزى ايرىقشا نازار اۋدارىپ وتىر. سوڭعى ۋاقىتتا ءوڭىر باسشىسىنىڭ باستاماسىمەن وبلىس اۋماعىندا بىرقاتار جاڭا جوبالار قولعا الىنىپ جاتىر. اسىرەسە ءوڭىر رۋحانياتىن وركەندەتۋگە قاتىستى كوپتەگەن ىلكىمدى ىستەر اتقارىلىپ كەلەدى. جاڭا باستامالاردىڭ بىرقاتارى اۋىلدىق جەرلەردە ۇيىمداستىرىلىپ جاتقانىن ەسكەرسەك, ەلدى مەكەندەرگە جاسالاتىن قامقورلىق تولاستامايتىنى انىق ەكەنىن تۇسىنە تۇسەمىز.
تالاي تالانتتىڭ كىندىك قانى تامعان تالاس اۋدانىنا قاراستى كوكتال ەلدى مەكەنىنىڭ تۇرعىندارى دا مەملەكەتتىك مەرەكەنىڭ شاراپاتىن سەزىنىپ وتىر. ءيا, كوكتالدىقتاردىڭ باس اۋرۋىنا اينالعان اۋىلدىق كلۋب ماسەلەسى رەسپۋبليكا كۇنى مەرەكەسى اياسىندا شەشىمىن تاپتى.
جاڭا نىساننىڭ اشىلۋ سالتاناتىنا ارنايى بارعان وبلىس اكىمىنىڭ ورىنباسارى سەرىك سالەموۆ كوكتالدىق تۇرعىنداردى كوپتەن كۇتكەن ايتۋلى قۋانىشىمەن قۇتتىقتاپ, اۋىل حالقىنىڭ رۋحاني سۇرانىسىن تولىق قاناعاتتاندىرۋ ماقساتىندا اۋىلدىق كلۋبتا بىرقاتار جۇمىس اتقارىلاتىنىن تىلگە تيەك ەتتى.
«اۋىلدا مادەنيەت وشاعىنىڭ اشىلۋى – رۋحانياتتى وركەندەتۋگە جاسالعان ناقتى قادام. وسەتىن ەل ەڭ الدىمەن مادەنيەتى مەن رۋحانياتىنا ايرىقشا ءمان بەرەتىنى بارشامىزعا ءمالىم. مادەنيەتى جوعارى ۇلت قانا الەمدەگى وركەنيەتتى ەلدەردىڭ قاتارىنا قوسىلادى. مەملەكەت باسشىسى قاسىم-جومارت توقاەۆ مادەنيەت پەن ونەردى دامىتۋ مەملەكەتىمىزدىڭ نەگىزگى باسىمدىقتارىنىڭ ءبىرى ەكەنىن ۇدايى ايتىپ ءجۇر. ەلدى مەكەندەردە مادەنيەت ۇيلەرى مەن اۋىلدىق كلۋبتاردىڭ اشىلۋى – پرەزيدەنت تاپسىرماسىن ىسكە اسىرۋدىڭ ناقتى كورىنىسى. ءوڭىر مادەنيەتىن جۇمىلعان جۇدىرىقتاي وركەندەتە بەرەيىك», دەدى س.سالەموۆ.
سوڭعى بىرنەشە جىلدىڭ بەدەرىندە ءوڭىر مادەنيەتىن وركەندەتۋگە قاتىستى اۋقىمدى جۇمىس اتقارىلىپ جاتقانىن ايتا كەتكەن ءجون. ماسەلەن, 2021 جىلدان بەرى وبلىستا 18 مادەني نىساننىڭ قۇرىلىس جۇمىسى جۇرگىزىلىپ, دەر كەزىندە پايدالانۋعا بەرىلگەن. ال وسى جىلى 16 نىساننىڭ قۇرىلىسى باستالعان. جىل سوڭىنا دەيىن 8 نىسان پايدالانۋعا بەرىلەدى دەپ جوسپارلانعان.
جامبىل وبلىسى
