وبلىس ورتالىعىنداعى ءبىلىم ۇياسىنىڭ قۇرىلىسى 2023 جىلى باستالعان ەدى. جاڭا مەكتەپكە جوعارىدا اتالعان ءبىلىم ۇيالارىنان ۇستازدار مەن وقۋشىلار اۋىسادى. سونىمەن قاتار كورشى اۋىلدارداعى اتا-انالار دا بالالارىن وسى مەكتەپكە وقىتۋعا نيەتتى. شاعىن اۋدان تۇرعىندارىنىڭ باسىم بولىگى – كوپبالالى وتباسىلار. وقۋشىلارعا ەسىگىن ايقارا اشقان جاڭا №35 جالپى ورتا مەكتەبىندە ءبىلىم الۋعا تولىق جاعداي جاسالعان.
«بۇگىن تۇرعىنداردىڭ وتىنىشتەرى ورىندالىپ, تۇركىستان قالاسىندا جاڭا مەكتەپ اشىلدى. ەندى وسىندا ءبىلىم الاتىن بالالارىمىز ەلدىڭ مىقتى ازاماتتارىنا اينالىپ, مەملەكەتتى دامىتۋعا ۇلەس قوسادى دەپ سەنەمىن», دەدى وبلىس اكىمى دارحان ساتىبالدى اشىلۋ سالتاناتىندا.
جالپى, تۇركىستان قالاسىندا 4 مەكتەپتىڭ قۇرىلىسى جۇرگىزىلدى. وسىعان دەيىن «جايلى مەكتەپ» جوباسى اياسىندا سالىنعان مەكتەپتىڭ قۇرىلىسى اياقتالىپ, پايدالانۋعا بەرىلگەن ەدى. تاعى 2 مەكتەپتىڭ قۇرىلىسى اياقتالۋعا جاقىن.
سارىاعاش اۋدانىندا ءۇش بىردەي جاڭا مەديتسينالىق نىسان اشىلدى. جاڭاتۇرمىس ەلدى مەكەنىندەگى تاۋلىگىنە 25 تۇرعىندى قابىلداي الاتىن مەديتسينالىق العاشقى كومەك كورسەتەتىن دارىگەرلىك امبۋلاتوريا اۋىل تۇرعىندارىنىڭ يگىلىگىنە تابىستالدى. سونداي-اق جەمىستى ەلدى مەكەنىندەگى زاماناۋي ۇلگىدەگى دارىگەرلىك امبۋلاتوريانىڭ اشىلۋ سالتاناتى بولىپ ءوتتى. ءدال وسى ۇلگىدەگى امبۋلاتوريا جەمىستى اۋىلدىق وكرۋگى تىڭ ەلدى مەكەنىندە دە اشىلدى. مەديتسينالىق نىسانداردىڭ قۇرىلىس جۇمىسى «اۋىل – ەل بەسىگى» باعدارلاماسى اياسىندا جۇرگىزىلدى. زاماناۋي اسپاپتارمەن جابدىقتالعان دارىگەرلىك امبۋلاتوريالاردا ءتىس دارىگەرى, زەرتحانالىق كابينەتتەر دە قاراستىرىلعان.
سونداي-اق اۋدانعا قاراستى داربازا ەلدى مەكەنىندە 500 بالاعا ارنالعان زاماناۋي سپورت كەشەنى دە ىسكە قوسىلدى. جاڭا سپورت نىسانىندا فۋتبول الاڭشاسى, بوكس, سامبو, دزيۋدو, ۇستەل تەننيسى, قازاق كۇرەسى, تاەكۆوندو, فۋتبول, شاحمات ۇيىرمەلەرىنە ارنالعان زالدار بار.
جالپى, وبلىستا الەۋمەتتىك ماڭىزى بار جاڭا 10 نىسان اشىلدى. ماقتاارال اۋدانىنداعى وركەنيەت ەلدى مەكەنىندە شاعىن سپورت كەشەنى, ساۋران اۋدانىنداعى وراڭعاي اۋىلىندا №6 ارناۋلى الەۋمەتتىك قىزمەتتەر كورسەتۋ ورتالىعى, كەلەس اۋدانىنداعى جيدەلى اۋىلىندا 75 ورىندىق اۋىلدىق كلۋب ءۇيى پايدالانۋعا بەرىلدى.
تۇركىستان وبلىسى
