مىسالى, ورداباسى اۋدانىنىڭ «ش.ءۋاليحانوۆ اتىنداعى مەكتەپ-گيمنازياسىنىڭ» اعىلشىن ءتىلى ءپانىنىڭ مۇعالىمى ابيبۋللا جاكۋداەۆ مەملەكەت باسشىسىنىڭ قولىنان «قازاقستاننىڭ ەڭبەك سىڭىرگەن ۇستازى» توسبەلگىسىمەن ماراپاتتالدى. پەداگوگيكا سالاسىندا 40 جىلدان استام ەڭبەك ەتكەن ۇستازدىڭ وقۋشىلارى حالىقارالىق, رەسپۋبليكالىق ءبىلىم شىڭىن باعىندىرىپ, بۇگىندە تۇركىستان وبلىسىن كوپكە تانىتىپ كەلەدى. ال تۇركىستاندا وتكەن «ۇستازىما مىڭ العىس!» سالتاناتتى ءىس-شاراسىندا وبلىستىق وليمپيادا جانە سپورت جارىستارىنىڭ جەڭىمپازدارىن دايىنداعان 30 مۇعالىم ماراپاتتالىپ, ارنايى سىيلىقتارعا يە بولدى. ناقتىراق ايتساق, 10 ۇستاز «ى.التىنسارين» توسبەلگىسىمەن, 20 پەداگوگ «قۇرمەت گراموتاسىن» الىپ, 200 مىڭ تەڭگە كولەمىندە اقشالاي سىياقىمەن ىنتالاندىرىلدى.
مەرەكەلىك جيىندا وبلىس اكىمى دارحان ساتىبالدى ءبىلىم سالاسىندا ايانباي ەڭبەك ەتكەن ۇستازدار قاۋىمىن كاسىبي مەرەكەسىمەن قۇتتىقتاپ, ماراپاتتاردى تابىس ەتتى. سونداي-اق دارحان امانگەلدى ۇلى شاكىرتى 42 ەلدىڭ وقۋ ورىندارىنان شاقىرتۋ العان «تۇركىستان ءبىلىم-يننوۆاتسيا» ليتسەيى گەوگرافيا ءپانىنىڭ مۇعالىمى ارعىن باستاميگە وبلىستىڭ اتىن الەمگە تانىتقان ەرەن ەڭبەگى ءۇشىن كولىك كىلتىن تابىس ەتتى. ونىڭ شاكىرتى يسلام ءابدىراحمانوۆ قازىر اقش-تا وقىپ جاتىر. بۇدان بولەك, وقۋشىلارى رەسپۋبليكالىق وليمپيادانىڭ جەڭىمپازدارى بولعان, ءوزى ىسكەر, بەلسەندى, وبلىستىق, رەسپۋبليكالىق بايقاۋلاردىڭ جۇلدەگەرى تولەبي اۋدانى, قوسان مامىتوۆ اتىنداعى مەكتەبىنىڭ بيولوگيا ءپانىنىڭ مۇعالىمى, 6 بالانىڭ اناسى نۇريللا بايماحانقىزىنا نوۋتبۋك تارتۋ ەتىلدى.
تۇركىستان وبلىسى
