كەنتتەگى سوڭعى جاڭالىقتىڭ ءبىرى – «جاستار» اللەياسى. اۋدان ورتالىعىنا كىرەبەرىستە ورىن تەپكەن اللەيا قۇنى 83,2 ملن تەڭگە. جاستار بيىل اۋداندىق بيۋدجەتتەن قارجىسى ءبولىنىپ, جۇمىس باستالعان اۋماقتا ارىقتاردى تازالادى.
«بۇل اللەيا جاستاردىڭ سەرۋەندەپ, بوس ۋاقىتىن ءتيىمدى پايدالانۋى ءۇشىن جاسالىپ جاتىر. ەرىكتى جاستار مەن «جاسىل ەڭبەك جاساعى» ساربازدارى اكتسياعا اۋقىمدى ۇلەس قوسىپ كەلەدى. اۋداندا «تازا قازاقستان» باستاماسى اياسىندا ۇيىمداستىرىلعان ءىس-شارالارعا 3 مىڭعا جۋىق جاس قاتىستى. كەنت پەن 13 اۋىلدىق وكرۋگتە ەرىكتىلەر شتابى قۇرىلىپ, تۇراقتى جۇمىس ىستەپ كەلەدى. ودان بولەك, كەنتتەگى «جاسىل ەڭبەك جاساعى» ەكى جىل قاتارىنان وبلىستاعى ۇزدىك ۇيىم بولىپ تانىلىپ وتىر. بىلتىر 220, بيىل 110 جاستى تۇراقتى جۇمىسپەن قامتىدىق», دەيدى اۋدانداعى جاستار قوزعالىسىنىڭ جەتەكشىسى نۇرجان سەيىتجانوۆ.
تەرەڭوزەكتىڭ قاي كوشەسىنەن دە تىنىمسىز جۇمىس بايقالادى. ورتالىق الاڭعا كىشى ارحيتەكتۋرالىق فورمالار قويىلىپ, جالپى قۇنى 106 ملن تەڭگە بولاتىن جوباعا سايكەس «تاعزىم» الاڭى دا جاڭعىرتىلىپ جاتىر. ۇزاق جىلدار بويى كەنتتەگى كوپقاباتتى ۇيلەردى جاڭعىرتىپ, اۋلالارىن اباتتاندىرۋعا مۇمكىندىك بولماي كەلگەن ەدى. بيىل وسى جۇمىسقا رەسپۋبليكا بيۋدجەتىنەن 167,2 ملن تەڭگە قارالىپ, ونىڭ 60 ملن تەڭگەسى ءبولىنىپتى. قازىر مەردىگەر مەكەمە «سپ بىرلىك ينجينيرينگ» جشس كوپقاباتتى تۇرعىن ۇيلەر اۋلاسىنداعى جول جيەكتەرىنە بورديۋر قويىپ, بالالار ويىن الاڭدارىنىڭ قورشاۋلارىن قالىپقا كەلتىرىپ, تۇرعىنداردىڭ اۋلادا تىنىعۋىنا جاعداي جاسادى.
«شيەلى جولشى» جشس كەنتتەگى ورتالىق كوشەلەرگە جاياۋ جۇرگىنشىلەر جولىن سالىپ جاتىر. بەس كوشە بويىنا تروتۋار سالۋ جوباسىنىڭ قۇنى – 366 ملن تەڭگە. كەنت اكىمى ەرجان باقتياروۆ جالپى تەرەڭوزەكتەگى جول, قۇرىلىس سالاسىنداعى جوبالارعا شولۋ جاساي كەلىپ, اۋدان ورتالىعىنا كىرەبەرىس اۋماقتى كوركەيتۋ-كوگالداندىرۋ كوپتىڭ كومەگىمەن بولىپ جاتقانىن ايتتى.
«تازا قازاقستان» اكتسياسىنىڭ اياسىندا تۇرعىنداردىڭ كومەگىمەن 11 پارك, سكۆەر اباتتاندىرىلدى. الداعى ۋاقىتتا كۇرە جولدان كەنتكە جەتكىزەتىن جول بويىنا «جاسىل بەلدەۋ» قالىپتاستىرۋ جوسپاردا بار», دەيدى كەنت اكىمى.
اۋدان ورتالىعىنىڭ ىرگەسىندەگى اسقار توقماعامبەتوۆ اۋىلىنا وسىدان 20 جىلداي بۇرىن عانا تازا اۋىزسۋ قۇبىرى تارتىلعان ەدى. مۇندا دا قاربالاس تىرلىك. ون التى كوشەسىنىڭ ون ۇشىنە اسفالت تۇسكەن. ەندى كوشەدەگى ەلەكتر جەلىلەرىن جاڭعىرتۋعا بيۋدجەتكە ۇسىنىس بەرىلىپتى. اۋىل تۇرعىندارى بۇگىن-ەرتەڭ تابيعي گازعا قول جەتكىزگەلى تۇر. مەردىگەر مەكەمە «اەS and Limited» جشس وكىلى رۋسلان ماقسىموۆ 20 شاقىرىمنان اساتىن گاز قۇبىرىن تارتۋ اياقتالىپ, اۋىلداعى 356 ءۇيدىڭ 104-ءى مونتاجىن جۇرگىزىپ, «كوگىلدىر وتىن» يگىلىگىن كورۋگە دايىن وتىرعانىن ايتادى.
قىزىلوردا وبلىسى,
سىرداريا اۋدانى
