فوتو: YouTube
ء«ورت بولعان جەردەن دالەلدەر جينالدى. 600-دەن استام ادامنان سۇرالدى. وقيعانىڭ قالاي بولعانىن ناقتى انىقتاۋ ءۇشىن بىرنەشە ساراپتاما تاعايىندالدى. ماماندار ءورتتىڭ ءۇيدىڭ سىرتىنان باستالعانىن, وقىس جاعداي ەمەس ەكەنىن جانە وت سىرتتان قويىلعانىن ايتتى. وقيعا ورنىنان رەزەڭكە قولعاپ پەن كانيسترعا زەرتتەۋلەر جۇرگىزىلىپ جاتىر», دەدى پروكۋرور.
ەسكە سالايىق, 4 قازاندا تالعار قالاسىنداعى توبەلەستەن ءبىر ادام قايتىس بولدى.
اشۋلى تالعارلىقتار ءجاسوسپىرىم ولىمىنە بايلانىستى نارازىلىققا شىققان.
الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە مالىمدەدى.
ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى ءجاسوسپىرىمنىڭ ولىمىنە قاتىستى ءىستى جەكە باقىلاۋىنا الدى.
سونداي-اق, قۇقىق قورعاۋشى ايتبەك امانگەلدى قازا تاپقان ءجاسوسپىرىمنىڭ وتباسىنا ادۆوكاتتار تاۋىپ بەردى.
الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ بەينەباقىلاۋ كامەرالارىنان الىنعان جازبالار زەرتتەلىپ جاتقانىن جەتكىزدى.
12 قازان كۇنى تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.
سونداي-اق, باس پروكۋراتۋرا قىلمىستى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلعانىن حابارلادى.
ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ مارقۇم شەرزات بولاتتىڭ ءۇيىن ورتەۋ وقيعاسىن تەرگەۋ توبىمەن تالعارعا باردى.
كەيىن ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءورت قىلمىسى بويىنشا ايعاقتار الىنىپ, ءتيىستى ساراپتامالار جۇرگىزىلىپ جاتقانىن مالىمدەدى.
قوعامدىق ءتارتىپتى قاداعالاۋ ءۇشىن ۇلتتىق ۇلان اسكەرى جۇمىلدىرىلدى.
