تەاتر ءساۋىر ايىندا قازاقستان جازۋشىلار وداعىمەن بىرلەسە وتىرىپ, قازاقستاننىڭ حالىق ءارتىسى, كومپوزيتور ءشامشى قالداياقوۆتىڭ ءومىرى مەن شىعارماشىلىعىنا ارنالعان رەسپۋبليكالىق دراماتۋرگيا بايقاۋىن جاريالاعان. بايگەگە تۇسكەن شىعارمالار ىشىنەن ءبايدىلدا ايداربەكتىڭ ء«ان-عۇمىر» اتتى پەساسى ۇزدىك دەپ تانىلعان. ماۋسىم اشىلار الدىندا وتكەن ءباسپاسوز ءماسليحاتىندا تەاتردىڭ كوركەمدىك جەتەكشىسى ءارى يدەيا اۆتورى شىنار وماروۆا اۆتوردىڭ كەلىسىمىمەن, كومپوزيتوردىڭ حالىق بەرگەن مارتەبەسىن ۇلىقتاۋ ماقساتىندا, قويىلىم اتاۋى «ۆالس كورولى» بولىپ وزگەرتىلگەنىن اتاپ وتكەن بولاتىن. سپەكتاكلدى قويۋعا حالىقارالىق دەڭگەيدەگى كوپتەگەن تاجىريبەلى مامان اتسالىسقان. قويۋشى رەجيسسەرى – كارلو شاكاللۋگا «ۆالس كورولى» اتانعان داڭقتى كومپوزيتور ءشامشى قالداياقوۆتىڭ اۋەلەگەن انمەن ورىلگەن تاعدىرىنان سىر شەرتەتىن قويىلىمدى ساحنالاۋ, قازاق ءان ونەرىمەن تانىسۋ قىزىق ءارى جاڭا دەڭگەي بولعانىن ايتادى. ال تەاتر باسشىسى ءالىمحان مىرزاحان ەلىمىزدىڭ تەاترلارىندا ءشامشى تۋرالى سپەكتاكلدەر بىرنەشە رەت قويىلعانىن, بۇل جولى ولاردان وزگەشە دايىندالىپ جاتقانىن جەتكىزگەن ەدى. راسىندا دا, بۇل قويىلىم كورەرمەندى وزگەشە ءبىر اسەرگە بولەدى.
سپەكتاكل كەيىپكەرلەرىن تولىعىمەن تۇركىستان مۋزىكالىق دراما تەاترىنىڭ اكتەرلەرى سومدادى. تەاتردىڭ جاڭادان قۇرىلعان مۋزىكالىق ءانسامبلى جاندى داۋىستا سۇيەمەلدەپ, حور ۇجىمى ءشامشى قالداياقوۆتىڭ ۇزدىك اندەرىن ورىندادى. كورەرمەن تاراپىنان وتە جوعارى باعالانىپ جاتقان قويىلىمدا كومپوزيتوردىڭ سەزىمگە تولى شابىتتى شاقتارى, ومىردەگى جان كۇيزەلىسى مەن وتانعا دەگەن شەكسىز ماحابباتى شەبەر سۋرەتتەلگەن. تۇركىستاندىق ونەر ۇجىمى ءشامشىنىڭ جۇمەكەن ناجىمەدەنوۆ, مۇحتار شاحانوۆ, مۇزافار الىمباەۆ سىندى تانىمال اقىندارمەن شىعارماشىلىق بايلانىسىن كورەرمەن جۇرەگىنە جەتكىزە ءبىلدى. كومپوزيتوردىڭ بوزبالا, جىگىت, ەل اعاسى كەزىن سومداعان ءۇش ءارتىس تە جۇرتشىلىق كوڭىلىنەن شىقتى. كورەرمەن ءان الەمىنە ەنىپ, ءتۇرلى سەزىمدى باستان كەشىردى. قويىلىمدا زاعيپ جاننىڭ ايتقان: «ول ادام ولگەنىمەن, اتى دا, اندەرى دە ولمەيدى» دەگەن ءسوزى دە كوپشىلىكتىڭ ويىمەن ۇندەسىپ جاتتى. «وسى كۇنگە دەيىن مەنى بىرەۋ باقىتتى ەتتى دەسەم, وتىرىك بولار. ەشكىم رەنجىتپەدى دەسەم, ول دا وتىرىك. مەن قانشا ءان جازسام, سونشا رەت جىلاعان بولۋىم كەرەك» دەگەن ءان پاديشاسىنىڭ سوزىنەن دە كوپ سىردى ۇقتىق. قويىلىم بارىسىندا شىرقالعان اندەر جۇرەكتەرگە جەتىپ, كوڭىل پەرنەلەرىن قوزعادى, قوسىلا شىرقاعان كورەرمەن دە كوپ. قايتالانباس ونەر يەسىنىڭ دۇنيەگە كەلگەن ساتىنەن باستاپ, شىعارماشىلىق جولداعى كورگەن قيىندىعى مەن قىزىقتارى, «مەنىڭ قازاقستانىم», «اقماڭدايلىم», «اق بانتيك» سياقتى ولمەس اندەردىڭ شىعۋ تاريحى كوركەم بەينەلەنگەن قويىلىم كورەرمەندى ەرىكسىز ەلىتىپ وتىردى. سوندىقتان كوپشىلىك جاس ۇرپاققا ءشامشى قالداياقوۆ سىندى ۇلى كومپوزيتوردىڭ ومىرىمەن قاتار, شىعارماشىلىعىن تەرەڭ تۇسىندىرەتىن ءساتتى قويىلىم رەتىندە باعالادى. بۇگىندە سۇرانىستىڭ كوپتىگىن ەسكەرگەن تەاتر باسشىلىعى «ۆالس كورولى» الداعى قاراشا ايىندا دا قويىلاتىنىن حابارلادى. سونداي-اق استانانىڭ تەاترسۇيەر قاۋىمىنا دا ۇسىنىلماق.
قويىلىمنىڭ ستسەنوگرافياسىن قويعان – يتاليانىڭ «Architizer Prize and A.I.A Middle East» ماراپاتتارىنىڭ جەڭىمپازى «Gio Forma» ستۋدياسى, جارىق جونىندەگى سۋرەتشىسى – Gaetano La Mela. قويۋشى حورەوگراف – تەاتردىڭ تالانتتى باس بالەتمەيستەرى ءمادينا مۇراتبەكوۆا. قويىلىم سوڭىندا وبلىس اكىمى دارحان ساتىبالدى تەاتر ۇجىمىنا ىقىلاس گ ۇلىن سىيلاپ, ساحنا تورىندە شىعارماشىلىق توپپەن ارنايى كەزدەستى. جاس تەاتر ۇجىمىنىڭ ونەرىن جوعارى باعالادى. سونداي-اق كورەرمەن قاۋىم وتىرار اۋدانىنداعى ءشامشى مۋزەي-ۇيىنەن اكەلىنگەن ءان پاديشاسىنىڭ مۋزىكالىق اسپاپتارىمەن تانىستى.
تۇركىستان
