سۋرەتتى تۇسىرگەن – ەرلان ومار, «EQ»
ءداستۇرلى تۇردە وتەتىن ءىس-شاراعا دەنساۋلىق ساقتاۋ, وڭالتۋ ماماندارى جينالدى. ەلدەگى مەديتسينا ماماندارىنان بولەك رەسەي, ازەربايجان, وزبەكستان, تۇركيا, ەۋروپانىڭ بىرنەشە ەلىنەن دەلەگاتتار كەلدى. ولاردىڭ ىشىندە عىلىمي-زەرتتەۋ ينستيتۋتتارىنىڭ, وڭالتۋ ورتالىقتارىنىڭ, ساناتوريلىك-كۋرورتتىق ۇيىمداردىڭ وكىلدەرىمەن قاتار, جەتەكشى فارماتسەۆتيكالىق كومپانيالار, مەديتسينالىق جابدىقتاردى ءوندىرۋشى تاراپتار بار. وسى جولى «شيپاجاي-2024» فورۋمى جامبىل وبلىسىنداعى «مەركى» ساناتوريىندە ءوتتى. ءىس-شاراعا كەلگەن قوناقتارعا پاتسيەنتتەردىڭ ءومىر ءسۇرۋ ساپاسىن ۇزارتۋعا, جاقسارتۋعا ىقپال ەتەتىن ءوڭىردىڭ بىرەگەي تابيعي رەسۋرستارىمەن ەتەنە تانىسۋعا مۇمكىندىك تۋدى. فورۋمنىڭ اشىلۋ سالتاناتىندا دەنساۋلىق ساقتاۋ ءمينيسترى اقمارال ءالنازاروۆا ءسوز سويلەپ, وڭالتۋ ءىس-شارالارىن جەتىلدىرۋگە ۇلەس قوسىپ جۇرگەن مەديتسينا ماماندارىنا تابىس تىلەدى.
«ەلىمىزدە ساناتوريلىك-كۋرورتتىق ەمدەۋ جاڭا دەڭگەيگە كوتەرىلىپ كەلە جاتىر دەپ سەنىممەن ايتۋعا بولادى. ءبىز دەنساۋلىق ساقتاۋ مينيسترلىگىنە قاراستى كۋرورتولوگيا جانە مەديتسينالىق وڭالتۋ عىلىمي-زەرتتەۋ ينستيتۋتىن قۇردىق. بۇگىن فورۋمعا سول ينستيتۋتتىڭ ماماندارىمەن قاتار سالا عالىمدارى, ساراپشىلار جيىلىپ وتىر. باسقوسۋدا ايتىلعان ۇسىنىستار, وي-پىكىرلەر وسى باعىتتاعى جۇمىستاردى شيراتا تۇسەدى», دەدى ا.ءالنازاروۆا.
فورۋمدا ەلىمىزدىڭ دەنساۋلىق ساقتاۋ ستراتەگياسىنا, ونىڭ ىشىندە ساناتوريلىك-كۋرورتتىق سالانىڭ رولىنە باسىمدىق بەرىلدى. پلەنارلىق سەسسيا, ەكى سەكتسيالىق وتىرىستا ساناتوريلىك-كۋرورتتىق ەمدەۋدى دامىتۋدىڭ وزەكتى ماسەلەلەرى, حالىقارالىق وڭالتۋ پراكتيكاسى, تابيعي ەمدىك فاكتورلاردى قولدانۋ مۇمكىندىكتەرى تالقىلاندى. ساۋىقتىرۋدىڭ ءتيىمدى ادىستەرىنە, پاتسيەنتتەردى ەمدەۋدە تابيعي رەسۋرستاردى پايدالانۋعا, سونداي-اق وڭالتۋ ورتالىقتارىندا مەديتسينالىق كومەكتى ۇيىمداستىرۋعا ەرەكشە نازار اۋدارىلدى.
«شيپاجاي» فورۋمى تۋرالى از-كەم اقپارات بەرە كەتسەك, فورۋم العاش 2016 جىلى ۇيىمداستىرىلدى. وعان ەلىمىزدىڭ, شەتەلدەردىڭ ساناتوريلىك-كۋرورتتىق مەكەمەلەرى قاتىستى. سودان بەرى تابىستى باستاما ۇزىلمەي, جىل سايىن ءوتىپ كەلەدى. وسى ارالىقتا فورۋم سالانى جەتىلدىرۋگە ۇلەس قوسىپ جۇرگەن تاراپتارعا قولايلى بىرىڭعاي اقپاراتتىق الاڭعا اينالىپ ۇلگەردى. مۇنى كۋرورتولوگيا جانە مەديتسينالىق وڭالتۋ عزي ديرەكتورى ساياگۇل قايىرگەلدينانىڭ فورۋمدا سويلەگەن سوزىنەن اڭعاردىق. ول ورتاق ماقساتتا كۋرورتولوگيا ينستيتۋتتارىمەن, باسقا دا حالىقارالىق قۇرىلىمدارمەن تىعىز بايلانىس ورناعانىن ايتتى.
باسقوسۋدا فورۋم قاتىسۋشىلارى ۇسىنىس-تالقىلاردى ەسكەرە وتىرىپ, ساناتوريلىك-كۋرورتتىق سالانى دامىتۋدىڭ مەملەكەتتىك ستراتەگياسىن ازىرلەۋ قاجەتتىگى تۋرالى قارار قابىلدادى. قاراردا ينۆەستيتسيا تارتۋعا قولايلى جاعداي جاساۋ, سالانى رەتتەيتىن زاڭنامالىق, نورماتيۆتىك-قۇقىقتىق بازانى جەتىلدىرۋ, تابيعي دارىلىك رەسۋرستاردى پايدالانا وتىرىپ, الدىن الۋ, ەمدەۋ ستاندارتتارىن ازىرلەۋ ماسەلەلەرى جان-جاقتى قاراستىرىلعان. سونداي-اق قىزمەت كورسەتۋدى اۆتوماتتاندىراتىن اقپاراتتىق جۇيەنى ەنگىزۋگە, بىلىكتى كادرلاردى دايارلاۋ ماقساتىندا عىلىمي, ءبىلىم بەرۋ ۇيىمدارىمەن ىنتىماقتاستىقتى نىعايتۋعا باسىمدىق بەرىلەدى.
