سۋرەت: ru.freepik.com
ءۇش كۇندە قاتىسۋشىلار مۇگەدەكتىگى بار ادامداردى قورعاۋ جۇيەلەرىن ەنگىزۋدىڭ ءساتتى مىسالدارىمەن بولىسەدى. ينكليۋزيا سالاسىندا ءتۇرلى ەلدىڭ الدىندا تۇرعان سىن-قاتەرلەردى تالقىلايدى. ءارى ولاردى شەشۋ ءۇشىن ۇسىنىمدار ازىرلەيدى. وسىلايشا, بۇۇ مەن ەڭبەك جانە حالىقتى الەۋمەتتىك قورعاۋ مينيسترلىگى ۇيىمداستىرعان سەمينار مۇگەدەكتىگى بار ادامداردىڭ قۇقىن قورعاۋ ماسەلەلەرىن تالقىلاۋ, ينكليۋزيۆتى ساياساتتى جاقسارتۋ جولىندا وڭ شەشىم تاباتىن نەگىزگى الاڭعا اينالادى.
حالىقارالىق مۇگەدەكتەر ۇيىمدارى وداعىنىڭ توراعاسى ۆاسيلي نازارەنكو سەمينارعا جوعارى باعا بەرىپ, ەلىمىزدە ازىرلەنىپ جاتقان 2030 جىلعا دەيىنگى ينكليۋزيۆتى ساياسات تۇجىرىمداماسىنىڭ مۇگەدەكتىگى بار ادامداردىڭ بۇكىل قاۋىمداستىعى ءۇشىن ماڭىزدىلىعىن اتاپ ءوتتى. ال سەميناردىڭ ءۇشىنشى سەسسياسىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا حالىقارالىق مۇگەدەكتەر ۇيىمدارى وداعىنىڭ مۇشەلەرىمەن كەزدەستى. تالقىلاۋدىڭ باستى تاقىرىبى قازاقستاننىڭ بۇۇ مۇگەدەكتەردىڭ قۇقىقتارى تۋرالى كونۆەنتسياسىنىڭ ورىندالۋى تۋرالى ءبىرىنشى بايانداماسىن قورعاۋ قورىتىندىلارى بولدى. سۆەتلانا جاقىپوۆا مۇگەدەكتىگى بار ادامدار ۇيىمدارىنىڭ حالىقارالىق وداعىنىڭ وكىلدەرىنە ۇزاقمەرزىمدى ىنتىماقتاستىعى ءۇشىن العىس ايتىپ, سەمينار شەڭبەرىندە جوسپارلانعان كەزدەسۋلەرگە تابىس تىلەدى.
«2015 جىلى ەلىمىز مۇگەدەكتەردىڭ قۇقىقتارى تۋرالى كونۆەنتسيانى راتيفيكاتسيالادى. قولدانىستاعى زاڭنامانى تۇگەندەۋ ناتيجەلەرى بويىنشا 2015 جىلى 3 جەلتوقساندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مۇگەدەكتەردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى. مۇگەدەكتىگى بار ادامدارعا الەۋمەتتىك جانە كولىك ينفراقۇرىلىمىنىڭ قولجەتىمدىلىگىن قامتاماسىز ەتۋگە قاتىستى 24 زاڭعا تۇزەتۋلەر ەنگىزىلدى. بىلتىر كونۆەنتسياعا فاكۋلتاتيۆتىك حاتتاما راتيفيكاتسيالاندى, الەۋمەتتىك كودەكس قابىلداندى», دەدى مينيستر س.جاقىپوۆا.
كەزدەسۋ بارىسىندا گەرمانيانىڭ فەدەرالدى ەڭبەك جانە الەۋمەتتىك ىستەر دەپارتامەنتىنىڭ باسشىسى تورستەن ەينستمانن ينكليۋزيۆتى ەڭبەك نارىعى جانە مۇگەدەكتەر تەڭدىگى تۋرالى زاڭ جايىندا ايتتى. ال ارمەنيانىڭ بىرىڭعاي الەۋمەتتىك قىزمەت ءبولىمىنىڭ باسشىسى ريمما ەگانيان ارمەنياداعى مۇگەدەكتىكتى باعالاۋدىڭ جاڭا جۇيەسىنىڭ تيىمدىلىگى تۋرالى حاباردار ەتتى. ەندى 11 قازاندا سەمينار قورىتىندىسى بويىنشا حالىقارالىق جانە مەملەكەتتىك ۇيىمدار مۇشەلەرى بىرنەشە ەلدىڭ ۇكىمەتتىك ورگاندارىنا ۇسىنىمدارىن ۇسىنادى.
