حالقىنىڭ 80 پايىزدان استامى اۋىلداردا تۇراتىن ءوڭىر ءۇشىن «اۋىل اماناتى» جوباسىنىڭ ماڭىزى زور. وڭىردە جاساندى جولمەن بالىق ءوسىرۋ سالاسىنىڭ الەۋەتى جوعارى. بۇگىندە جاساندى جولمەن بالىق ءوسىرۋ شارۋاشىلىقتارىن قۇرۋعا قاتىستى قىزىعۋشىلىق تانىتقان بيزنەس وكىلدەرى, جەكە تۇلعالارعا جەرگىلىكتى اتقارۋشى ورگان مەن بالىق شارۋاشىلىعى ينسپەكتسياسى بىرلەسىپ شارۋاشىلىق قۇرۋ الگوريتمىن ءتۇسىندىرۋ جۇمىستارىن تۇراقتى جۇرگىزىپ كەلەدى. وبلىس بويىنشا تاۋارلى بالىق وسىرۋمەن 224 كاسىپكەرلىك سۋبەكتىسى اينالىسادى.
«اۋىل اماناتى» باعدارلاماسى شەڭبەرىندە وتكەن جىلى 24 كاسىپكەرگە 168,9 ملن تەڭگە جەڭىلدەتىلگەن نەسيە بەرىلگەن بولاتىن. بيىل «ىرىس ميكرو قارجى ۇيىمى» جشس ارقىلى 232 شارۋاشىلىققا 1020,0 ملرد تەڭگە قاراستىرىلعان. وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ مالىمەتىنە قاراعاندا, «بالىق شارۋاشىلىعىن دامىتۋدىڭ وڭىرلىك 2021–2030 جىلدارعا ارنالعان» ارنايى باعدارلاماسىنا سايكەس 10 جىل ىشىندە تاۋارلىق بالىق ءوسىرۋ كولەمىن 20 مىڭ تونناعا, بالىق ونىمدەرى ەكسپورتىنىڭ ءوسىمىن 2 ەسە, قايتا وڭدەۋ كاسىپورىندارىنىڭ جۇكتەمەسىن 100%-عا كوتەرۋ كوزدەلىپ وتىر. بۇگىندە وبلىس اۋماعىنداعى 110-عا جۋىق بالىق ءوسىرۋ شارۋاشىلىقتارى اشىلعان, بيىل 7000 توننا تاۋارلى بالىق ءوسىرۋ جوسپارلانعان. سەگىز ايدىڭ قورىتىندىسىمەن 1 645 تونناعا جەتكەن.
جاۋاپتىلار بالىق اۋلاۋ مەرزىمى قازان-قاراشا ايلارى بولۋىنا بايلانىستى جوسپار جىل سوڭىندا تولىق ورىندالاتىنىن ايتادى. ال اكۆاوسىرۋ بويىنشا جەرگىلىكتى بيۋدجەتتەن بيىل 500 ملن تەڭگە ءبولىنىپ, 61 بالىق شارۋاشىلىعى سۋبەكتىسىنىڭ شىعىستارى وتەلگەن. ينۆەستيتسيالىق سۋبسيديالاۋعا 2024 جىلعا 237,5 ملن تەڭگە ءبولىنىپ, ءتيىستى جۇمىستار اتقارىلىپ جاتىر.
شاردارا اۋدانىندا «اۋىل اماناتى» اياسىندا سۋبسيديا الىپ, بالىق شارۋاشىلىعىن وركەندەتۋگە ءوز ۇلەسىن قوسىپ جۇرگەندەر كوپ. سونىڭ ءبىرى – تۇرىسبەكوۆ اۋىل وكرۋگىندە ورنالاسقان ء«مولدىر» شارۋا قوجالىعى. اۋماعى 10 گەكتار بولاتىن توعاندى بالىق وسىرۋمەن اينالىساتىن شارۋا قوجالىعى بىلتىر ىسكە قوسىلعان. قازىر 6 جاساندى كول جۇمىس ىستەپ تۇر, تاعى 4-ەۋى جاقىندا اشىلماق. ارقايسىسى 1 گەكتار اۋماقتى قۇرايدى. ءار گەكتاردان 10 تونناعا دەيىن بالىق الۋعا مۇمكىندىك بار. جىلىنا 100 توننا بالىق وسىرۋگە قاۋقارلى. شارۋا قوجالىعى بيىل 60 توننا بالىق ءوندىرىپ, الداعى ۋاقىتتا 100 تونناعا جەتكىزۋدى كوزدەپ وتىر.
مۇندا تۇقى, اق امۋر, سازان سەكىلدى بالىق تۇرلەرى وسىرىلەدى. وندىرىلگەن بالىق ونىمدەرى شىمكەنتتەگى مەيرامحانالارعا جەتكىزىلىپ جاتىر. وتكەن جىلى 5 سەرىكتەس بىرىگىپ, «اۋىل اماناتى» باعدارلاماسى اياسىندا مەملەكەتتەن 30 ملن تەڭگەگە جۋىق نەسيە الىپ, شارۋاشىلىقتى باستاعان. قوجالىق يەسى بەكارىستانالى ءسۇيىنباي ونىمدەرىن الداعى ۋاقىتتا ەلىمىزدىڭ كەز كەلگەن وبلىسىنا جىبەرۋدى, شەتەلگە ەكسپورتتاۋدى جوسپارلاپ وتىرعانىن ايتادى.
ء«الىباي» بالىق شارۋا قوجالىعى بىلتىر «اۋىل اماناتى» باعدارلاماسى اياسىندا 2,5 پايىزدىق جەڭىلدەتىلگەن نەسيە الىپ, جاساندى كول قازىپ, بالىق شارۋاشىلىعىن قولعا العان. كاسىپ يەسىنىڭ ايتۋىنشا, شاردارا اۋدانىندا بالىقتى وڭدەپ, ەكسپورتتاۋمەن اينالىسىپ كەلە جاتقان «حاميت» اۋىل شارۋاشىلىعى وندىرىستىك كووپەراتيۆى بار. وسى مەكەمەنىڭ بالىق شارۋاشىلىعىن دامىتۋ ماقساتىنداعى وقىتۋ كۋرسىنا بارىپ, ءبىلىم الىپ, تاجىريبە جيناعان.
«وتكەن جىلى 2,8 گەكتار جەر تەلىمىندەگى توعانعا 15 مىڭ دانا شاباق جىبەرىلدى. بىلتىر 17 تونناعا جۋىق تاۋارلى بالىق الساق, بيىل بۇل كولەمدى كوبەيتۋدى جوسپارلاپ وتىرمىز. بۇگىندە جاساندى كولدەردىڭ سانىن ۇلعايتۋ ماقساتىندا جۇمىستار اتقارىلىپ جاتىر. جالپى, 6 گەكتار اۋماقتا جاساندى 3 كولدى قازۋ جۇمىستارى باستالدى. جىل سوڭىندا جاساندى كول قۇرىلىسى اياقتالىپ, جىلدىق قۋاتتىلىقتى 100 تونناعا جەتكىزۋدى كوزدەپ وتىرمىن», دەدى اسان الىباەۆ.
شاردارا اۋدانى بويىنشا 33 بالىق ءوسىرۋشى كاسىپكەر تىركەلگەن. ولار 951,35 توننا بالىق وسىرگەن.
وبلىستا جەرگىلىكتى ماڭىزى بار 104 سۋ ايدىنى زاڭداستىرىلعان. كونكۋرستىق نەگىزدە 82 سۋ ايدىنى, ونىڭ ىشىندە 69 سۋ ايدىنى كولدە تاۋارلى بالىق شارۋاشىلىعىن جۇرگىزۋ ءۇشىن, 13 سۋ ايدىنى كاسىپشىلىك بالىق شارۋاشىلىعىن جۇرگىزۋ ءۇشىن تابيعات پايدالانۋشىلارعا بەكىتىلىپ بەرىلگەن, 22 سۋ ايدىنى رەزەرۆتە. قازىر وڭىردە 137 توعاندى, 5 شارباقتى بالىق ءوسىرۋ, 2 تۇيىق قوندىرعىمەن جابدىقتالعان بالىق ءوسىرۋ شارۋاشىلىقتارى جۇمىس ىستەيدى.
وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆتىڭ ايتۋىنشا, 2023 جىلى رەسپۋبليكالىق بيۋدجەتتەن باعدارلامانى جۇزەگە اسىرۋعا 19,8 ملرد تەڭگە ءبولىنىپ, 3 256 جوبا قارجىلاندىرىلعان. جوباعا قاناتقاقتى رەجىمدە 64 اۋىلدىق وكرۋگى قاتىستى. ناتيجەسىندە, 3 413 جاڭا جۇمىس ورىندارى قۇرىلدى, اتاۋلى الەۋمەتتىك كومەك الۋشىلار سانى 340 ادامعا قىسقاردى. ورتاشا جالاقى 20 پايىزعا ۇلعايىپ, شاعىن كاسىپكەرلەر سانى 2 544 بىرلىككە ارتقان. سونداي-اق 64,2 مىڭ مال ساتىپ الىنىپ, 19 قايتا وڭدەۋ كاسىپورنى اشىلدى, 16,4 گەكتار القاپقا 328 جىلىجاي سالىنعان. وسى جوبالار ەسەبىنەن 30 ملرد تەڭگەنىڭ ءونىمى وندىرىلگەن.
تۇركىستان وبلىسى
