كوللاجدى جاساعان – قونىسباي شەجىمباي, «EQ»
باتىر جۇرەك وزىنە تىقىر تايانعانىن سەزسە دە قوبالجىمادى. اقىن جۇرەك تەك جاقسىلىقتان ۇمىتتەنىپ, جاماندىقتىڭ بولارىنا سەنەر ەمەس.
قاراويداعى جالعىز ءۇي كەك قۋعان, ساسىق پيعىلىنىڭ ق ۇلىنا اينالعان دۇشپان جۇمساعان جاندايشاپتار ءۇشىن الىنباس قامال سەكىلدى. ويتكەنى ءۇيدىڭ ىشىندە باتىر وتىر. قارۋىن كەزەنىپ بارۋعا باتىل جۇرەك, جىگەر كەرەك. ال جاندايشاپتار ايلانى قارۋ ەتتى. كۇشتىگە جاعىنىپ, سونىڭ قولىنان جۋىندى ءىشۋدى كوزدەگەن يتتەردە ەرىك-جىگەر, باتىلدىق قايدان بولسىن؟
ماحامبەت قاپىدا كەتتى. قاراويدىڭ قاسيەتتى توپىراعىنا اقىننىڭ قانى توگىلدى. اسىلدىڭ قانى قابىرشاقتانا قاتقان قاراوي قاسىرەت مەكەنىنە اينالدى, بوزارىپ, كۇڭگىرتتەندى.
كۇرەسكەردىڭ ەرلىگىمەن كەلگەن داڭقىن تومەندەتۋ, وت اۋىزدى اقىننىڭ ۋىتتى ولەڭىن ءوشىرۋ مۇمكىن ەمەس ەكەنىن سان ايلالى دۇشپانى جاقسى بىلەدى. ەندى قايتپەك؟ ءبىر عانا جول بار, ول – ءولتىرۋ. ءولتىرۋ ارقىلى ەسەپ ايىرىسۋ. بۇل – رۋحى ءالسىزدىڭ عانا امالى... وسى امالعا جۇگىنۋدىڭ سوڭى قارعىس ارقالاۋ, قارعىس ەستۋ, قارعىستىڭ استىندا ءبۇرىسىپ, تىرىسىپ, قورلىقپەن كۇن كەشۋ. مۇنى ءناپسى ۇقتىرسىن با؟
ماحامبەتتىڭ بۇل دۇنيەدەگى سوڭعى كۇنى اي تۇتىلعان دەسەدى... ماڭگىلىك ءومىر باستالدى. باتىر ءۇشىن, اقىن ءۇشىن.
ماحامبەت ەرلىگىمەن دە, ولەڭىمەن دە, ولىمىمەن دە قازاققا وي سالىپ كەتتى. جاتتىڭ ەمەس, جاقىنىڭنىڭ, قانداسىڭنىڭ, باۋىرىڭنىڭ قولىنان قازا تابۋدىڭ ايانىشتى, قورلىق, قاسىرەت ەكەنىن قاراوي وقيعاسى قازاققا ماڭگىلىككە ەسكەرتىپ تۇر. بۇل ەسكەرتپەنى ەسەپكە الار, وعان ەلەڭ ەتەر ەل بار ما؟
قاراوي. كۇز. اسپاندا سۇرعىلت بۇلت سىزدايدى. مىسىقتابانداپ كەلىپ «مىقتىلىعىن» كورسەتكەن ساتقىندىقتىڭ قاسىرەتتى تاڭباسى ماڭگىلىككە وشپەستەي باسىلىپ قالدى.
