باعانى زاڭسىز كوتەرۋدىڭ زاردابى

باسەكەلەستىكتى قورعاۋ جانە دامىتۋ اگەنتتىگى جامبىل وبلىسى بويىنشا دەپارتامەنتىنىڭ باسشىسى جاندوس ءازىموۆ ادام شوشىرلىق دەرەكتەر كەلتىرەدى. دەپارتامەنت قىزمەتكەرلەرى باسەكەلەستىكتى قورعاۋ سالاسىندا بىر­نەشە مارتە زاڭنامانى بۇزىلعانىن انىقتاپتى. ءتىپتى ۇيات ۇعىمىن كەرى ىسىرىپ قويىپ, باعانى الدەنەشە ەسە ءوسىرىپ جىبەرگەندەر دە بار.

«ەسەپتى مەرزىم ىشىندە باسەكەلەستىكتى قورعاۋ سالاسىنداعى زاڭنامانى بۇزعا­نى ءۇشىن 5 اكىمشىلىك ءىس قوزعالدى. ناتي­جە­سىندە, 8 749 475 تەڭگە كولەمىندە مونوپو­ليالىق كىرىس تاركىلەنىپ, 2 888 438 تەڭگە ايىپپۇل سالىنعانىن ايتا كەتكەن ءجون. تەرگەپ-تەكسەرۋ بارىسىندا سۇيىق وتتەگىن ءوندىرۋ جانە وتكىزۋ كەزىندە «قازفوسفات» جشس ءوزىنىڭ ۇستەمدىگىن تەرىس پايدالانىپ, باعانى 36 460 تەڭگەدەن 102 320 تەڭگەگە دەيىن نەمەسە 180 پايىزعا كوتەرگەنى انىقتالدى. ناتيجەسىندە, سۋبەكتىگە قاتىستى 8 344 170 تەڭگە مونوپوليالىق كىرىس تاركىلەنىپ, 1 203 300 تەڭگە ايىپپۇل سالىندى. قاراجات تولىقتاي بيۋدجەتكە قايتارىلدى. سونداي-اق باعانى تۇراقتاندىرۋ بويىنشا ءتيىستى نۇسقاما بەرىلدى», دەيدى دەپارتامەنت باسشىسى.

باسەكەلەستىكتى قورعاۋ سالاسىنداعى زاڭ­نامانى بۇزۋدىڭ الدىن الۋ ماق­سا­تىن­دا 6 تەرگەپ تەكسەرۋ تاعايىندالعان. ونىڭ 5-ەۋى اياقتالعان. تاۋار نارىعىن­دا­عى باسەكەلەستىكتىڭ جاي-كۇيىن زەردەلەۋ ماقساتىندا 10 مارتە تالداۋ جۇ­مى­سى قولعا الىنعان. دەپارتامەنت قىز­مەت­كەرلەرى اگروونەركاسىپ, وتىن-ەنەر­گەتيكا كەشەنى, وندىرىستىك جانە باسقا دا سالالار بويىنشا زەردەلەۋ جۇمى­سىن جۇرگىزگەن. جالپى, اتقارىلعان جۇ­مىس قو­رىتىندىسىنا سايكەس باعانى تۇراق­تان­دىرۋ بويىنشا ءتيىستى نۇسقاما ەنگىزىلگەن.

«سۋدىڭ دا سۇراۋى بار» دەگەن ءسوز بەكەر ايتىلماسا كەرەك. الايدا سالانى اشسا الاقانىندا, جۇمسا جۇدىرىعىندا ۇستاپ وتىرعان مەكەمە دە زاڭدى بەلدەن باساتىن كورىنەدى. دەپارتامەنت وكىلدەرى ولاردىڭ دا كەمشىلىكتەرىن انىقتاعان.

«مونوپوليالىق جاعدايدى تەرىس پايدالانۋ ارقىلى جەكە, زاڭدى تۇتى­نۋشىلارعا «سۋدى قوسۋ مەن اجى­راتۋ» قىزمەتى بويىنشا جوعارى باعا بەلگىلەگەنى ءۇشىن «جامبىل سۋ» شارۋا­شىلىق جۇرگىزۋ قۇقىعىنداعى كمك-نا تەرگەپ-تەكسەرۋ جۇمىسى جۇرگىزىلدى. ناتيجەسىندە, مونوپولياعا قارسى زاڭنامانى بۇزۋ دەرەكتەرى انىقتالىپ, 429 043 تەڭگە ايىپپۇل سالىنىپ, بيۋجەتكە قايتارىلدى», دەيدى دەپارتامەنت باسشىسى ماسەلەنىڭ ءمانىسىن ءتۇسىندىرىپ.

جالپى, جول جوندەۋ, جول سالۋ دەگەندى تەندەردەن العان قارجىعا «قول سالۋ» دەپ تۇسىنەتىندەر از ەمەس سەكىلدى. قۋلىعىنا قۇرىق بويلامايتىن ونداي سەرىكتەستىكتەردىڭ ءبىرازىنىڭ الدەنەشە جىل بۇرىن تامىرىنا بالتا شابىلعان ەدى. ايتكەنمەن, سالادا ءالى دە بولسا باسەكەلەستىك زاڭدىلىعىنا شەكەدەن قارايتىندار بار سياقتى. مۇنى جاۋاپتى دەپارتامەنت باسشىسى ۇسىنعان دەرەكتەن دە اڭعارعانداي بولدىق.

«اۆتوموبيل جولدارىن جوندەۋ جانە كۇتىپ ۇستاۋ قىزمەتىمەن اينالىساتىن «بەرىكبولسىن جولدارى» مەن «كوپبوسىن» جشس-عا قاتىستى تەرگەپ-تەكسەرۋ جۇمىسى جۇرگىزىلدى. اتالعان قىزمەتتەرگە مەملەكەتتىك ساتىپ الۋ كونكۋرسى ناتيجەلەرىن بۇرمالاۋ بولىگىندە باسەكەلەستىككە قارسى كارتەلدىك كەلى­سىمنىڭ بەلگىلەرى راستالدى. ناقتىراق ايتساق, «بەرىكبولسىن جولدارى» مەن «كوپبوسىن» جشس 2019-2023 جىلدار ارالىعىندا 14 لوتقا بىرگە قاتىسىپ, جالپى سوماسى 337 496 504,98 تەڭگەنىڭ جۇمىسىن جەڭىپ العان. «كوپبوسىن» جشس 9 لوت بويىنشا جەڭىسكە جەتسە, «بەرىكبولسىن جولدارى» جشس 5 لوتتى جەڭىپ العان. ەكى سۋبەكتىنىڭ قاي جەڭگەنى تاپسىرىس بەرۋشىنىڭ باعاسىنان ءسال تومەن باعا قويسا, ەكىنشىسى تاپسىرىس بەرۋشىنىڭ باعاسىن قويۋ ارەكەتىمەن ءوزارا جالعان باسەكەلەستىك تۋدىرىپ وتىرعان. اتقارىلعان جۇمىس ناتيجەسىندە, «بەرىكبولسىن جولدارى» جشس-عا قاتىستى 2 435 576 تەڭگە مونوپوليالىق كىرىس تاركىلەنىپ, 598 156 تەڭگە كولەمىندە ايىپپۇل سالىنادى. ال «كوپبوسىن» جشس-دان 12 657 000 تەڭگە مونوپوليالىق كىرىس تاركىلەنىپ, 2 915 214 تەڭگە كولەمىندە ايىپپۇل ارقالايدى», دەيدى.

ماتەريالداردىڭ ناتيجەسى نەگىزىندە سوتقا دەيىنگى تەرگەپ-تەكسەرۋ جۇرگىزۋ ماقسا­تىندا قارجىلىق مونيتورينگ اگەنت­تىگىنىڭ جامبىل وبلىسىن­داعى ەكونو­ميكالىق تەرگەپ-تەكسەرۋ دەپار­تامەن­تىنە جولداندى. سەرىكتەستەردىڭ ءىس-ارەكەت­تەرىنەن قىلمىستىق جازا بەلگىلەرى انىق­تال­ماعان جاعدايدا سۋبەكتىلەرگە قاتىس­تى اكىمشىلىك ءىس قوزعالىپ, نۇسقاما ەنگىزىلەدى.

قالاي الىپ قاراساق تا, باسەكەلەستىكتى قورعاۋدىڭ ماڭىزى زور. دەگەنمەن باعانى زاڭسىز كوتەرەتىن ءتۇرلى مەكەمە مەن سەرىكتەستىكتەر ارەكەتى حالىقتىڭ شىمبايىنا باتاتىنى انىق.«كەلىسكەن جەردە جەڭىس تەڭ» ۇستانىمىن ۇستانۋ ارقىلى تابىسىن ەسەلەگىسى كەلەتىندەردىڭ تامىرىنا بالتا شاباتىن كەز دە كەلگەن شىعار. كىم ءبىلسىن...

جامبىل وبلىسى