«جاسىل ەل – تاراز» كاسىپورنىندا تاجىريبەسى تولىسقان ماماندار جۇمىس اتقارىپ جاتىر. ولار قالا تازالىعىنا جاناشىرلىقپەن قارايدى. جۇمىسشىلاردىڭ جۇزىنەن ءوز ىسىنە دەگەن ادالدىق بايقالىپ تۇرادى. وبلىس ورتالىعىن اباتتاندىرۋ, كوگالداندىرۋ, سانيتارلىق تازالىق جۇمىسىن تالاپقا ساي اتقارىپ جۇرگەن ۇجىمنىڭ ەڭبەگى ەسەلى ەكەنىن ەرەكشە اتاپ وتكەن ءجون. ناقتىراق ايتار بولساق, مەكەمە تاراپىنان شاھارداعى تۇرمىستىق قاتتى قالدىقتاردى شىعارۋ, ساياباقتار مەن سكۆەرلەردى, گۇل باقتارىن, جاياۋ جۇرگىنشى جولدارىن كۇتىپ ۇستاۋ, قىس مەزگىلىندە قار تازالاۋ, مۇز قاتپاۋ ءۇشىن جولدارعا قۇم, تۇز سەبۋ, تال ەگۋ جۇمىسى جۇيەلى تۇردە اتقارىلىپ جاتىر. سوندىقتان كەيىنگى بىرەر جىلدىڭ بەدەرىندە سەرىكتەستىكتى جاڭا تەحنيكالارمەن قامتاماسىز ەتۋ قولعا الىندى», دەيدى تاراز قالاسىنىڭ اكىمى باقىتجان ورىنبەكوۆ.
شاھار باسشىسىنىڭ ايتۋىنشا, تاراز قالاسىنىڭ تازالىعى جەرگىلىكتى اتقارۋشى بيلىكتىڭ نازارىنان تىس قالمايدى. سول تۇرعىدا «جاسىل ەل – تاراز» كاسىپورنىنىڭ تەحنيكالىق بازاسىن تولىقتىرۋ جۇمىستارى الداعى ۋاقىتتا دا جالعاسىن تابادى.
تاراز قالاسىنىڭ اكىمى ب.ورىنبەكوۆ بۇل كۇنى ۇجىمعا سۋ جاڭا توعىز جۇك كولىگىنىڭ كىلتىن تاپسىردى. قالالىق اكىمدىكتىڭ ءباسپاسوز قىزمەتى كەلتىرگەن دەرەككە جۇگىنسەك, تابىستالعان تەحنيكانىڭ جەتەۋى قوقىس شىعارۋعا ارنالعان «كاماز-65115» ماركالى كولىك بولسا, ەكەۋى قىس مەزگىلىندە جول شەتىندەگى قاردى تازالاۋعا ارنالعان «امكودور-37» ماركالى تەحنيكا ەكەن. وسىلايشا, كاسىپورىنداعى تەحنيكا تاپشىلىعى جىل وتكەن سايىن ازايدى.
دەرەكتەرگە جۇگىنسەك, «جاسىل ەل – تاراز» كاسىپورنىنا وتكەن جىلى 8 تەحنيكا بەرىلىپتى. ەكى جىلدى قوسا ەسەپتەسەك, سەرىكتەستىكتىڭ تەحنيكالىق بازاسى 17 كولىكپەن تولىققانىن بايقايمىز. ارينە, قالا تازالىعىنا جاۋاپتى ۇجىمعا بۇل – ۇلكەن قامقورلىق.
«وبلىس ورتالىعىن كوگالداندىرۋ, اباتتاندىرۋ جۇمىستارى وڭاي شارۋا ەمەس. ىلگەرىدە تەحنيكانىڭ جوقتىعىنان جۇمىس باياۋلاپ قالعان كەز دە بولدى. الايدا كەيىنگى جىلدارى جەرگىلىكتى اتقارۋشى بيلىكتىڭ قامقورلىعىمەن جاڭا تەحنيكالار الىنىپ جاتىر. بۇل سەرىكتەستىكتىڭ جۇمىسىنا سونى سەرپىن بەرەدى. البەتتە, وسى ورايدا باسشىلارعا ايتار العىسىمىز شەكسىز», دەيدى كاسىپورىن قىزمەتكەرلەرى.
كەيىنگى 2-3 جىلدىڭ بەدەرىندە «جاسىل ەل – تاراز» كاسىپورنىنىڭ جۇمىسى جاندانا ءتۇستى. قالا تازالىعىنا جاۋاپ بەرەتىن ۇجىمعا جەرگىلىكتى اتقارۋشى بيلىك تاراپىنان ايتارلىقتاي قولداۋ كورسەتىلىپ جاتقانى كوڭىل قۋانتادى.
تاراز قالاسى
