سۋرەتتى تۇسىرگەن – ەرلان ومار, «EQ»
وبلىستاعى 492 380 داۋىس بەرۋشىنىڭ الدىڭعى لەگىندە ۋچاسكەگە 103 جاستاعى سوعىس ارداگەرى ياحيا تاسىروۆ اقساقال جەتىپ, تاڭداۋ جاساپ, باتاسىن بەرىپ كەتتى.
«العا تارتقان وزادى, كەيىن تارتقان توزادى» دەگەندى بۇرىنعىلار تەگىن ايتپاعان. ەلدىڭ العا جىلجۋى بىرلىككە بايلانىستى. ال بىرلىك وسىندايدا بايقالادى. سوندىقتان دا وسىنداي ناۋقاندا تاڭداۋىمىزدى جاساپ, ورتاق ىسكە ءۇن قوسۋىمىز كەرەك», دەيدى عاسىر عۇمىر يەسى.
تاڭەرتەڭنەن باستالعان داۋىس بەرۋ ءتۇس اۋا قىزا ءتۇستى. ساعات 16.00-دەگى كورسەتكىش بويىنشا قىزىلوردا وبلىسى ەل وڭىرلەرىنەن كوپ ىلگەرى تۇردى. وسى جولعى داۋىس بەرۋدە ازاماتتىق ۇستانىمىن تانىتۋعا جاسى جەتكەن 7 038 ازامات العاش رەت تاڭداۋ جاسادى. قاي ناۋقاندا دا بەرەكە-بىرلىگىمەن ەرەكشەلەنەتىن ءوڭىر جۇرتى بۇل جولى دا جولدان تايعان جوق.
ء«بىز جاستاردىڭ بويىنا بولاشاققا دەگەن سەنىم قالىپتاستىرۋىمىز كەرەك. وندايدا ۇلگى بولىپ جۇرت الدىندا جۇرمەسەك, ۇلكەندىگىمىز قايدا قالادى. مەن ەل ەرتەڭىنىڭ بۇدان دا نۇرلى بولارىنا كامىل سەنەمىن», دەيدى جاڭاقورعان اۋدانى جايىلما اۋىلىنداعى «جايىلما جاۋھارلارى» ءانسامبلىنىڭ مۇشەسى سىرعالى تۇراباەۆ.
ونەر ۇجىمى دا جۇبىن جازباي كەلىپ تاڭداۋ جاساپ, ەلدى ونەرىمەن ءسۇيسىنتىپ كەتتى.
«بۇگىنگى رەفەرەندۋم كەلەلى ەستى كەڭەسىن شەشەتىن ءداستۇرىمىزدى تاعى ءبىر تانىتتى. ەل پىكىرىن ەكشەيتىن ساتتەن سىرت قالۋ بارىمىزگە سىن بولار ەدى. ءار تۇرعىن وسى داۋىس بەرۋدىڭ ەل ءۇشىن ماڭىزىن ءتۇسىنۋى كەرەك», دەيدى بەلگىلى قوعام قايراتكەرى يبراگيم ابيبۋللاەۆ.
وبلىستاعى بارلىق ۋچاسكە تالاپقا ساي جابدىقتالدى. داۋىس بەرۋ كۇنى قىزىلوردا قالاسىندا – 16, اۋدانداردا 29 ينۆاتاكسي جۇمىس ىستەدى. قاجەتتىلىككە قاراي ۋچاسكەلەردە 48 ىم ءتىلىنىڭ مامانى قىزمەت اتقاردى. سونداي-اق 72 ۋچاسكەدە 105 ازاماتقا برايل قارپىمەن جازىلعان ترافارەت قولجەتىمدى بولدى.
قىزىلوردا
