فوتو: قر وقۋ-اعارتۋ مينيسترلىگى
وقۋ-اعارتۋ مينيسترلىگىنىڭ ءباسپاسوز قىزمەتى مالىمدەگەندەي, مەكتەپ ءبىر اۋىسىمدا وقيتىن 1 200 ورىنعا ارنالعان. اتالعان ءبىلىم بەرۋ ۇيىمىندا 93 كابينەت قاراستىرىلعان, ونىڭ ىشىندە 4 كومپيۋتەرلىك, 7 مامانداندىرىلعان, 2 سپورت, اسحانا, كىتاپحانا, حورەوگرافيا زالدارى بار.
عاني بەيسەمباەۆ مەملەكەت باسشىسىنىڭ باستاماسىمەن قولعا الىنعان «جايلى مەكتەپ» ۇلتتىق جوباسىنىڭ ءبىلىم بەرۋ ساپاسىن ارتتىرۋداعى جانە قالالىق, اۋىلدىق مەكتەپتەر اراسىنداعى الشاقتىقتى ازايتۋداعى ماڭىزدىلىعىن اتاپ ءوتتى.
«پەداگوگ كادرلار ءبىلىم بەرۋ ساپاسىن ارتتىرۋدا نەگىزىگى ءرول اتقارادى. وتكەن جىلدان باستاپ ەلىمىزدە جاڭا فورماتتاعى باسشىلاردى ىرىكتەۋ جانە دايارلاۋ بويىنشا ء«بىلىم بەرۋدەگى وزگەرىستەردىڭ 1000 كوشباسشىسى» باعدارلاماسى ىسكە اسىرىلۋدا. بۇگىنگى تاڭدا باعدارالاما شەڭبەرىندە ءبىلىم العان 130-دان استام ۇمىتكەر جايلى مەكتەپتەرگە ديرەكتور بولىپ تاعايىندالدى. اسىرەسە, تاربيە جۇمىسىنا باسىمدىق بەرىلەدى. بالالاردى وقىتۋ مەن تاربيەلەۋ ءۇشىن قولايلى جاعداي جاساۋ كەرەك, سونداي-اق ء«بىرتۇتاس تاربيە» باعدارلاماسى اياسىندا اتا-انالارمەن بىرلەسىپ الدىن الۋ, اقپاراتتىق جۇمىستاردى ءتيىمدى جالعاستىرۋ ماڭىزدى», دەدى مينيستر.
سونداي-اق مينيستر عاني بەيسەمباەۆ مەكتەپتە بالالاردى تاماقتاندىرۋدىڭ ۇيىمداستىرىلۋى مەن بالالاردىڭ قاۋىپسىزدىگىن قامتاماسىز ەتۋ جۇيەسىنىڭ ساپاسىن قارادى. مينيسترگە ء«بىرتۇتاس تاربيە» باعدارلاماسى اياسىندا جۇزەگە اسىرىلىپ جاتقان اتا-انالاردى پەداگوگيكالىق قولداۋ ورتالىعى, اكەلەر كەڭەسىنىڭ كلۋبى جانە «دانالىق مەكتەبى» تانىستىرىلدى. ولاردىڭ اشىلۋى ەڭ الدىمەن ءپوزيتيۆتى اتا-انا مادەنيەتىن, مەكتەپ پەن وتباسىنىڭ بالالاردى تاربيەلەۋدەگى ءوزارا ءىس-قيمىلىن دامىتۋعا جانە ءپاتريوتيزمدى نىعايتۋعا باعىتتالعان.
ايتا كەتەيىك, ۇلتتىق جوبا بويىنشا 2025 جىلعا دەيىن بارلىعى 217 جايلى مەكتەپتى قولدانىسقا بەرۋ جوسپارلانعان. جوبادا ءبىلىم بەرۋ ورتاسىنىڭ فۋنكتسيونالدىعى مەن قاۋىپسىزدىگىنە ەرەكشە نازار اۋدارىلادى. باستاۋىش جانە جوعارى سىنىپ وقۋشىلارى بولەك بلوكتاردا وقيدى. تالاپتاردىڭ قاتارىندا قازىرگى تەحنيكالىق قۇرالداردى ەنگىزۋ ەسەبىنەن قاۋىپسىزدىك شارالارىن ارتتىرۋ, ەرەكشە قاجەتتىلىكتەرى بار بالالار ءۇشىن كەدەرگىسىز ورتا قۇرۋ جانە مەكتەپتەردى زاماناۋي پاندىك كابينەتتەرمەن جابدىقتاۋ قاراستىرىلعان.
