*الماتى
پرەزيدەنت سايلاۋىنا ەلدەگى ەڭ ۇلكەن شاھار الماتىنىڭ قوسقان وزىندىك ۇلەسى بار. وسى ورايدا قۋانىشتى دۇبىردە جۇرگەن قالا تۇرعىندارىمەن پىكىر ءبولىسىپ كوردىك. قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى تۇڭعىشباي ءال-تارازي شىنايى قۋانىشىن جاسىرماي بىلاي دەدى:
– ەلىمىزدە جۇرەكتىڭ تۇبىنەن شىققان ناعىز تازا سايلاۋ ءوتتى. حالىقتىڭ ءدال بۇلاي ءبىر ماقسات جولىندا توپتاسقانىن كوپتەن بەرى كورە الماي جۇرگەن ەدىم. سايلاۋشىلاردىڭ داۋىس بەرۋگە ىنتى-شىنتىمەن بارعانىن دا بايقادىق. مەلدەبەك ەسىمدى باۋىرىم: «داۋىس بەرۋ ءۇشىن 45 مينۋت كەزەكتە تۇردىم», دەيدى. بۇعان قۋانۋىمىز كەرەك, تاۋبە دەۋىمىز كەرەك. بۇل – حالىقتىڭ ابىرويى, ەلدىڭ جەڭىسى!
اباي ەسكەرتكىشى مەن رەسپۋبليكا سارايى الدىنداعى الاڭعا لىق تولعان مەرەكەلىك كوڭىل-كۇيدەگى حالىققا ارناپ «ارناۋ» توبى ءان باستاپ, شاشۋ شاشتى.
تالعات ءسۇيىنباي,
«ەگەمەن قازاقستان».
سۋرەتتى تۇسىرگەن ايتجان مۇرزانوۆ.
*اقتوبە
جەڭىمپازدار فورۋمىنىڭ سالتاناتتى ءساتىن قىسقاشا كىرىسپە ءسوز سويلەپ اشقان وبلىستىق ءماسليحاتتىڭ حاتشىسى ءسانيا قالدىعۇلوۆا قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنىڭ وڭىردە دەموكراتيالىق تالاپتارعا ساي ۇيىمشىلدىقپەن جانە سايلاۋشىلاردىڭ جوعارى بەلسەندىلىگىمەن وتكەنىن تىلگە تيەك ەتتى.
– كاسىپورىنىمىزدا جۇمىسشىلار اۋلەتتەرى كوپتەپ ەڭبەك ەتەدى. ءبىزدىڭ وتباسىنىڭ وسى زاۋىتتاعى جالپى جۇمىس ءوتىلى 50 جىل بولادى. ءبىز اۋلەتىمىزبەن نۇرسۇلتان ءابىش ۇلىن قولداپ داۋىس بەردىك. پرەزيدەنت قازاقستاندى دامۋدىڭ داڭعىل جولىمەن الىپ كەلەدى, – دەدى اقتوبە فەرروقورىتپا زاۋىتىنىڭ بالقىتۋشىسى ەرجان اتىراۋباەۆ ريزاشىلىعىن بىلدىرە.
جەڭىمپازدار فورۋمىن وڭىرگە بەلگىلى ونەر شەبەرلەرى انمەن ادىپتەپ, بيمەن بەدەرلەدى. جاستار ىرعاقتى قيمىلداپ, ساحنا ءتورىنە كوتەرىلىپ, «ەلباسىمەن بىرگە – جاڭا جەڭىستەرگە!» دەپ ۇرانداتتى.
ساتىبالدى ءساۋىرباي,
«ەگەمەن قازاقستان».
سۋرەتتى تۇسىرگەن قايرەدين راۋشانوۆ.
*كوكشەتاۋ
«كوكشەتاۋ» مادەنيەت سارايىندا «نۇر وتان» پارتياسى اقمولا وبلىستىق ۇيىمىنىڭ مۇرىندىق بولۋىمەن جەڭىمپازدار فورۋمى وتكىزىلدى. سالتانات جيىنىنىڭ شىمىلدىعى «دوستار» تريوسىنىڭ ورىنداۋىنداعى «قازاق ەلى وسىنداي!» انىمەن اشىلدى. زال پاتريوتتىق رۋحتى اسقاقتاتار انگە تىك تۇرىپ قوسىلدى.
ءسوز قازاقستان رەسپۋبليكاسى پرەزيدەنتىنىڭ سەنىمدى وكىلى بولعان سەرىك اياعانوۆقا بەرىلدى.
26 ءساۋىر كۇنى ءبىز تاۋەلسىز قازاقستان جىلناماسىنداعى تاعدىرشەشتى ساياسي ماڭىزدى تاڭداۋىمىزدى جاسادىق, – دەدى ول. مەن جەرلەستەرىمدى نۇرسۇلتان نازارباەۆتىڭ سايلاۋداعى لايىقتى ءارى ءبىز كۇتكەن جەڭىسىمەن قۇتتىقتايمىن. بۇل جەڭىس بولاشاعىمىزدى, تاۋەلسىز قازاقستاننىڭ بولاشاعىن ايقىندايدى.
بۇل بارشامىزدىڭ, قازاقستاندىقتاردىڭ ورتاق جەڭىسى. وسى ورايدا, اقمولالىقتارعا نۇرسۇلتان نازارباەۆقا ءوزىنىڭ باسىم داۋىسىن, ياعني 98 پايىزعا جۋىق داۋىسىن بەرگەنىنە ريزاشىلىعىمدى بىلدىرەمىن, دەدى ول.
باقبەرگەن امالبەك,
«ەگەمەن قازاقستان».
*قاراعاندى
ەلىمىزدەگى ماڭىزدى ساياسي ناۋقاننىڭ قۇتتى اياقتالۋىنا بايلانىستى وبلىس ورتالىعىنداعى ەڭ ءزاۋلىم «قاراعاندى-ارەنا» مۇز ايدىنىندا وتكەن جەڭىمپازدار فورۋمىنا قالا جۇرتشىلىعى وكىلدەرى كوتەرىڭكى كوڭىل-كۇيدە باس قوستى. جۇزدەسۋدى وبلىس اكىمى نۇرمۇحامبەت ابدىبەكوۆ اشىپ, جينالعانداردى ن.ءا.نازارباەۆتىڭ جەڭىسىمەن قۇتتىقتادى.
تەمىرتاۋ قالاسى ارداگەرلەر قوعامىنىڭ ءتورايىمى نينا ۆاحيتوۆا, قاراعاندى ەكونوميكالىق ۋنيۆەرسيتەتىنىڭ رەكتورى ەرقارا ايماعامبەتوۆ, 2004 جىلعى جازعى وليمپيادا ويىندارىنىڭ قولا جۇلدەگەرى دميتري كارپوۆ جانە باسقالارى سويلەگەن سوزدەرىندە بۇل سايلاۋ مەملەكەت باسشىسىن حالىق قاشاندا اسا قادىر تۇتاتىندىعىن,قازاقستاننىڭ ءوسىپ-وركەندەۋى مەن بىرلىكتىڭ كەپىلى بولىپ تابىلاتىندىعىن تاعى ءبىر پاش ەتكەنىن ايتتى.
فورۋمدا ونەرپازدار ءان-كۇيدەن شاشۋ شاشىپ, ءىس-شارانىڭ ءسان-سالتاناتىن اسىردى.
ايقىن نەسىپباي,
«ەگەمەن قازاقستان».
سۋرەتتى تۇسىرگەن د.كۋزميچەۆ.
*قوستاناي
فورۋمدا «نۇر وتان» پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى ءا.ساپاروۆا سايلاۋ بىرلىك پەن ابىرويدىڭ كورىنىسى بولعانىن ايتتى. مۇنان كەيىن ەلباسىنىڭ ساياساتىن قوستاناي ءوڭىرىندە جۇزەگە اسىرۋشى وكىلى بولىپ سانالاتىن وبلىس اكىمى نۇرالى سادۋاقاسوۆ ءسوز الدى.
ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى رەكتورىنىڭ كەڭەسشىسى ميحايل داۋەنوۆ, قازاقستان حالقى اسسامبلەياسىنىڭ مۇشەسى, وبلىستىق ارحيۆ ديرەكتورى ۆالەري ۆيشنيچەنكو, ن.نازارباەۆتىڭ قوستاناي قالالىق شتابىنىڭ مۇشەسى ەۆگەني ۆيليامس ەلباسى جەڭىسى – قازاقستان جەڭىسى, حالىقتىڭ جەڭىسى دەگەن لەبىزىن ءبىلدىردى. حالىق اقىنى ءاسيا بەركەنوۆا قۋانىشىن: «جەلبىرەيدى بەيبىت كۇننىڭ جالاۋى, ىنتىماقتىڭ لاۋلاپ جاتىر الاۋى», دەپ باستالاتىن جىر جولدارىمەن جەتكىزدى.
ءنازيرا جارىمبەتوۆا,
«ەگەمەن قازاقستان».
*قىزىلوردا
قىزىلوردادا ەلباسىنىڭ سەنىمدى وكىلدەرى, سىر جاستارى باس قوسقان «تاريح تاڭداعان, حالىق قولداعان» اتتى جەڭىمپازدار فورۋمى ءوتتى. جينالعان 2 مىڭ ادام پرەزيدەنتتىك سايلاۋدا جەڭىسكە جەتكەن نۇرسۇلتان نازارباەۆقا وسىلايشا ءوز قۇرمەتتەرىن كورسەتتى. ءىس-شارادا ءسوز العان ءوڭىر باسشىسى قىرىمبەك كوشەرباەۆ:
– سىر جۇرتشىلىعىن ورتاق جەڭىسپەن شىن جۇرەكتەن قۇتتىقتايمىن. سايلاۋدى ۇيىمداستىرىپ, ونى وتكىزۋگە اتسالىسقان بارلىق ازاماتتارعا, اسىرەسە جاستارعا, ءاربىر جەرلەسكە ەلباسىنىڭ اتىنان ريزاشىلىعىمدى ءبىلدىرىپ, راحمەت ايتامىن. سىزدەر قوسقان ءۇن تاۋەلسىز قازاقستاننىڭ تولاعاي تابىستارى بولىپ جاڭعىراتىنىنا كامىل سەنەمىن, – دەدى.
وسىدان كەيىن مادەني ءىس-شارا باستالدى.
ەرجان بايتىلەس,
«ەگەمەن قازاقستان».
*ورال
كەشە ورال قالاسىندا جەڭىمپازدار فورۋمى وتكىزىلىپ, وندا باتىس قازاقستان وبلىسىنىڭ اكىمى نۇرلان نوعاەۆ پرەزيدەنت سايلاۋى كۇنى بارشا قازاقستاندىقتار ءوز تاڭداۋلارىن جاساعانىن اتاپ كورسەتتى. بۇل – بەيبىتشىلىك پەن كەلىسىمنىڭ جانە بىرلىك پەن تۇراقتىلىقتىڭ تاڭداۋى بولدى دەدى بۇدان ءارى وبلىس باسشىسى.
فورۋمدا وبلىستاعى ەتنومادەني بىرلەستىكتەردىڭ وكىلدەرى اتىنان ورال قالالىق ءماسليحاتىنىڭ دەپۋتاتى, كاسىپكەر ليانا تۇرسىنوۆا, جاستار اتىنان جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ ستۋدەنتى سەرىكبولسىن جەكسەنباەۆ جانە وزگەلەرى قۇتتىقتادى.
تەمىر قۇسايىن,
«ەگەمەن قازاقستان».
سۋرەتتى تۇسىرگەن رافحات حالەلوۆ.
*وسكەمەن
كەشە ەلباسى جەڭىسىنە شىنايى قۋانعان شىعىسقازاقستاندىقتار وبلىس ورتالىعىنداعى اباي ەسكەرتكىشىنىڭ الدىنا جينالدى. 8 مىڭنان استام تۇرعىن باس قوسقان كوڭىلدى كەش, سالتاناتتى جيىن اسقاقتاعان ەل مەرەيىنىڭ كورىنىسى ىسپەتتى بولدى. مەرەكەلىك جيىندا سايلاۋدىڭ ءادىل وتۋىنە اتسالىسقان وبلىستىق جانە قالالىق شتابتاردىڭ مۇشەلەرى مەن جاس كاسىپكەرلەر, ۆولونتەرلەر مەرەكەلىك كوڭىل-كۇيلەرىمەن ءبولىستى.
فورۋم سوڭى ايتۋلى كونتسەرتكە ۇلاستى. شىعىسقازاقستاندىق جەرگىلىكتى جەزتاڭداي انشىلەرمەن قاتار بۇل كەشكە ارنايى كەلگەن «وردا» جانە «كەشيۋ» توبىنىڭ مۇشەسى كامشات جولدىباەۆا وسكەمەندىكتەردى ونەرىمەن تامساندىردى.
دۋمان اناش,
«ەگەمەن قازاقستان».
*پاۆلودار
وبلىس ورتالىعىنداعى «استانا» مۇز ايدىنى سارايىندا وتكەن جەڭىمپازدار فورۋمى كەزەكتەن تىس پرەزيدەنتتىك سايلاۋدا جەڭىسكە جەتكەن نۇرسۇلتان نازارباەۆقا ارنالدى. ءزاۋلىم بيىك اسەم سارايعا پرەزيدەنتتىڭ سايلاۋداعى جەڭىسىنە اق نيەت اق كوڭىلدەن تىلەك ءبىلدىرۋشى مەتاللۋرگتەر, مۇنايشىلار, تەمىرجولشىلار, ارداگەرلەر, كاسىپكەرلەر, ستۋدەنت جاستار جينالدى.
– مەن پرەزيدەنت سايلاۋىنا ءبىرىنشى رەت قاتىستىم. قوبالجىدىم, تولقىدىم. ەسەيگەنىڭدى سەزىنەسىڭ. ەلىڭ ءۇشىن كەرەك ەكەنىڭدى ءتۇسىنەسىڭ. ءوز داۋىسىمدى نۇرسۇلتان نازارباەۆقا بەردىم. بارلىق قازاقستاندىقتار سياقتى مەن دە ەلباسى ساياساتىن قولدايمىن, الداعى جاقسى ءومىر, جاقسى كۇندەرگە سەنىمدىمىن, – دەدى ستۋدەنت اقەركە يماشحان.
جەڭىمپازدار فورۋمىنا جينالعاندار ەلىمىزدە تاتۋلىق پەن تىنىشتىق, بىرلىك تۋىنىڭ اسقاقتاي بەرۋىنە تىلەكتەستىگىن ءبىلدىردى.
فاريدا بىقاي,
«ەگەمەن قازاقستان».
سۋرەتتى تۇسىرگەن ۆالەريي بۋگاەۆ.
*پەتروپاۆل
ارداگەرلەر, جاستار وكىلدەرى, ۇكىمەتتىك ەمەس ۇيىمدار, ەتنومادەني بىرلەستىك جەتەكشىلەرى, حالىق قالاۋلىلارى, سايلاۋ بەلسەندىلەرى اتىنان ورتالىق الاڭعا جينالعان 10 مىڭعا جۋىق ادام «پرەزيدەنتتىڭ جەڭىسى – مەملەكەت تۇراقتىلىعىنىڭ كەپىلى!» اتتى جەڭىمپازدار فورۋمىنا قاتىسىپ, ءىس-شارا سالتاناتتى جاعدايدا ءوتتى.
جيىندى ايماق باسشىسى ەرىك سۇلتانوۆ اشىپ, وبلىس تۇرعىندارىن ساياسي شارانىڭ اشىق, ەركىن جانە دەموكراتيا تالاپتارىنا ساي وتۋىمەن قۇتتىقتاپ, ەل دامۋىنىڭ ماڭىزدى كەزەڭىنە جول اشىلعانىن جەتكىزدى.
جەڭىمپازدار فورۋمىندا سولتۇستىك قازاقستان وبلىسىنىڭ قۇرمەتتى ازاماتى, تىل ارداگەرى قۇدايبەرگەن قاليەۆ, پەتروپاۆل اۋىر ماشينا جاساۋ زاۋىتىنىڭ باس ديرەكتورى قۋانىش ءبيشىموۆ, قازاقستان حالقى اسسامبلەياسى وبلىستىق بولىمشە حاتشىلىعىنىڭ مەڭگەرۋشىسى نايل ساليموۆ سويلەدى.
ءومىر ەسقالي,
«ەگەمەن قازاقستان».
سۋرەتتى تۇسىرگەن تالعات تانىباەۆ.
*تاراز
كەشە تاراز قالاسىنىڭ «دوستىق» الاڭىندا وتكەن «ەلباسى جەڭىسى – ەلدىكتىڭ جەمىسى!» اتتى جەڭىمپازدار فورۋمىندا مەملەكەت باسشىسى مەرەيىن جامبىلدىقتار دا ەرەكشە قۋانىشپەن اتاپ ءوتتى.
«مەملەكەت باسشىسى تاۋەلسىزدىكتىڭ 24 جىلىندا ەلىمىزدى زور جەتىستىككە جەتكىزدى. جاڭا ەكونوميكا. ءبىرتۇتاس قوعام. قۋاتتى مەملەكەت. ەندى الدىمىزدا ەلباسىمەن بىرگە – جاڭا جەتىستىكتەر تۇر! ۇلى ماقساتتار, ۇلى باستامالاردىڭ ارقاسىندا ەرتەڭگى كۇنىمىزگە سەنىمدى قادامدار جاسايمىز!», دەدى جيىندا ءسوز العان جامبىل وبلىسىنىڭ اكىمى كارىم كوكىرەكباەۆ.
شىنىندا بۇل جەڭىس – كوپ ۇلتتى حالقىمىزدىڭ ەلباسىنا دەگەن ىستىق ىقىلاسى, شەكسىز قۇرمەتىنىڭ كورىنىسى. الاڭعا جينالعان جاستار بۇل كۇنى ءان سالىپ, بي بيلەپ, ەلباسىنىڭ ەرەن جەڭىسى – قازاقستاننىڭ كەزەكتى بيىك بەلەسى ەكەنىن ماقتانىشپەن جەتكىزە ءبىلدى.
ورالحان ءداۋىت,
«ەگەمەن قازاقستان».
سۋرەتتى تۇسىرگەن التىنبەك قارتاباي.
*شىمكەنت
كەشە شىمكەنتتەگى «ناۋرىز» الاڭىندا جەڭىمپازدار فورۋمى ءوتتى. ون مىڭنان استام ادام قاتىسقان ايتۋلى شارادا ازاماتتار قۋانىشتارىن رياسىز ءبىلدىرىپ, ءبىر-ءبىرىن قۇتتىقتادى.
جۇرتشىلىق الدىندا وبلىس اكىمى اسقار مىرزاحمەتوۆ ءسوز الدى. ءوڭىر باسشىسى 1 ميلليون 260 مىڭعا جۋىق سايلاۋشىلارى بار وڭتۇستىك قازاقستانداعى 1 ميلليون 230 مىڭنان استام ازاماتتىڭ ساياسي ناۋقانعا قاتىسقانىنا ەرەكشە توقتالدى. بۇل – 97,78 پايىزدى قۇراپ وتىر. وڭتۇستىكقازاقستاندىقتار تەك قانا ءوزىنىڭ سول سايلاۋعا قاتىسۋدا بەلسەندىلىگى ەمەس, ەڭ باستىسى – اتقارىلىپ جاتقان ساياساتقا, اتقارىلار ساياساتقا بەرىلەتىن باعادا وزدەرىنىڭ ءادىل ەكەندىگىن كورسەتتى.
سالتاناتتى شارادا وبلىستاعى ونەرپازدار قاۋىمى پاتريوتتىق اندەردى شىرقاپ, حالىقتار دوستىعىنا ارنالعان سازدى حورەوگرافيكالىق كومپوزيتسيا قويىلدى.
باقتيار تايجان,
«ەگەمەن قازاقستان».
سۋرەتتى تۇسىرگەن قايسار شەرىم.
