جالاعاش اۋدانىنداعى «ەر-ءالى» شارۋا قوجالىعى 3 500 گەكتارعا اۋىل شارۋاشىلىعى داقىلدارىن ەگىپتى. شارۋالار 1 300 گەكتارعا ەگىلگەن كۇرىشتىڭ ءار گەكتارىنان قازىر ورتاشا ەسەپپەن 89 تسەنتنەردەن ءونىم الىپ وتىر.
وسى اۋدانداعى وزات شارۋاشىلىقتىڭ ءبىرى «تاڭ لتد» جشس وسى جىلى 3 000 گەكتار جەرگە ەگىن ەككەن. سەرىكتەستىك ديقاندارى مىڭ جارىم گەكتارلىق القاپتاعى كۇرىشتىڭ ءار گەكتارىنان 85 تسەنتنەردەن ءونىم الىپ, كوپ جىلدان بەرى قول جەتپەگەن تابىسقا كەنەلدى.
القاپقا سەبىلگەن كۇرىش ءدانىنىڭ باسىم بولىگى شەتەلدىك «كاۋريس», «ليدەر» جانە «اليانس» سورتتارى. جاڭالىقتى جاتسىنبايتىن شارۋاشىلىق 80 گەكتارعا قانت قۇمايىن, 800 گەكتارعا جوڭىشقا, 150 گەكتارعا تۇيەجوڭىشقا ەگىپتى. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ مالىمەتىنشە, وسى جىلى 189 مىڭ گەكتار جەرگە اۋىل شارۋاشىلىعى داقىلدارى ەگىلگەن. وسىنىڭ 85,6 مىڭ گەكتارى – كۇرىشتىك القاپتار.
سۋ تاپشى بولعانمەن دە مەملەكەت تاراپىنان كورسەتىلگەن قولداۋ ناتيجەسىندە وسى جىلى ديقاندار اسا قينالا قويعان جوق. ەگىنىن كۇتىپ-باپتاعان ەڭبەكشى قاۋىم ەگىن جيناۋ جۇمىستارىنا قاجەتتى اۋىل شارۋاشىلىعى تەحنيكالارمەن, جانار-جاعارمايمەن, مينەرالدى تىڭايتقىشپەن تولىق قامتاماسىز ەتىلدى.
وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى تالعات دۇيسەباەۆتىڭ ايتۋىنشا, بۇگىندە ەگىلگەن 85,6 مىڭ گەكتار كۇرىشتىڭ 27,7 مىڭ گەكتارى ورىلىپ, 19,2 مىڭ گەكتارى باستىرىلدى. وبلىس بويىنشا ەگىلگەن ءار گەكتاردان ورتاشا ەسەپپەن 49,6 تسەنتنەردەن ءونىم الىنىپ وتىر.
سۋ تاپشىلىعىنا بايلانىستى «تاڭ لتد» جشس قىتايلىق كومپانيامەن بىرلەسىپ تامشىلاتىپ سۋارۋ ادىسىمەن جۇگەرى ەگۋگە كىرىستى. بيىل وسىنداي ادىسپەن 800 گەكتارعا جۇگەرى ەككەن ديقاندار جوبانىڭ بولاشاعىنان ءۇمىتتى. «ەر-ءالى» شارۋا قوجالىعى قولعا العان 6 گەكتارلىق الما باعى دا تامشىلاتىپ سۋارىلىپ وتىر.
قىزىلوردا وبلىسى,
جالاعاش اۋدانى
