اۋداندا ماقتا تەرىم ناۋقانىن العاشقى بولىپ باستاعانداردىڭ ءبىرى – قىزىلقۇم اۋىلدىق وكرۋگىندە ورنالاسقان «ايدار» شارۋا قوجالىعى. يەلىگىندەگى 14 گەكتار جەرگە قىتايدىڭ «60» سورتىنىڭ ءشيتىن سەپكەن شارۋا بيىل گەكتارىنان ورتا ەسەپپەن 50 تسەنتنەردەن ءونىم الۋدى جوسپارلاپ وتىر. ديقاندار اگروتەحنيكالىق شارالار دۇرىس جۇرگىزىلسە, مول ءونىم الۋ مۇمكىندىگى دە جوعارى ەكەنىن ايتادى. «اعىن سۋدان, مينەرالدى تىڭايتقىشتان قيىندىق كورمەۋىمىزدىڭ ناتيجەسىندە ونىمدىلىك جاقسى. بۇرىن «سۇلتان», «ماقتاارال», «بۇقارا» سورتتارىن ەگەتىن ەدىك. ءونىم 20-25 تسەنتنەردى قۇرايتىن, قۇرت جەيتىن. بيىل قىتايدىڭ «60» دەگەن سورتىن ەكتىك, قۇرت جەمەدى. گەكتارىنان 50 تسەنتنەرگە دەيىن ءونىم الامىز دەپ جوسپارلاپ وتىرمىز. جاڭا سورتتىڭ مول ونىمىنە سەنىپ, وتكەن جىلى ليزينگكە 1 كومباين مەن 3 تراكتور الدىق», دەيدى شارۋا قوجالىعىنىڭ توراعاسى ەربول ايتۋعانوۆ.
بىلتىر 45 مىڭ گەكتارعا ماقتا ءشيتىن سەۋىپ, 122 مىڭ توننا اق ۇلپا جيناعان جەتىسايلىق شارۋالار بيىل دا سول مەجەنى ورىنداۋعا نيەتتى. ياعني سالا ماماندارىنىڭ الدىن الا جاساعان بولجامى بويىنشا, 40,8 مىڭ گەكتار القاپقا ەگىلگەن ماقتا شيتىنەن 105,2 مىڭ توننا «اق التىن» الىنىپ, ورتاشا ونىمدىلىك گەكتارىنا 25,8 تسەنتنەردى قۇرايدى. ءونىم ساپاسىن ارتتىرىپ, اعىن سۋدى ۇنەمدەۋدىڭ ءتيىمدى تەحنولوگياسى سانالاتىن تامشىلاتىپ سۋعارۋ ءادىسى بيىلدىڭ وزىندە 2 مىڭ گەكتارعا ارتقان. ونىڭ 300 گەكتاردان استامى ماقتا داقىلىن وندىرۋشىلەردىڭ ەنشىسىندە.
اۋدان اكىمى سەرىك مامىتوۆتىڭ ايتۋىنشا, شارۋالاردىڭ ەرتە كوكتەمنەن قارا كۇزگە دەيىنگى ەڭبەگى زايا كەتپەۋى ءۇشىن مۇمكىندىگىنشە دۇرىس باعا شىعارۋ, ماقتا قابىلداۋ بەكەتتەرىندەگى تارازىدان الداۋ, زەرتحانالاردا ماقتا ساپاسىن قاساقانا تومەندەتۋ سەكىلدى جاعدايلارعا جول بەرىلمەۋ كەرەك. ايماق باسشىسى زاۋىت يەلەرىنە ماقتانى تازالاۋمەن قاتار, قايتا وڭدەۋمەن اينالىسۋدى ۇسىندى.
بۇگىندە 7 ماقتا وڭدەۋ زاۋىتى مەن 77 ماقتا قابىلداۋ بەكەتىنىڭ 45-ءى – اۋدان اۋماعىندا ورنالاسقان ماقتا وڭدەۋ زاۋىتتارىنا, 32-ءسى – ماقتارال اۋدانى اۋماعىنداعى وڭدەۋ زاۋىتتارىنا تيەسىلى. ماقتا وڭدەۋ زاۋىتتارى وكىلدەرىنىڭ ايتۋىنشا, ءار كومپانيا تىكەلەي حالىقارالىق ماقتا ساۋداگەرلەرىمەن جۇمىس ىستەيدى. ال ولار ماقتا تالشىقتارىن ساتىپ الۋ بويىنشا الدىن الا كەلىسىمشارت جاساپ, قارجىلاندىرادى. سول سەبەپتى ماقتانى شيكىزات كۇيىندە ساتىپ الۋعا قاجەتتى قاراجاتتى جەكە ينۆەستيتسيا دەۋگە بولادى. سونداي-اق زاۋىت باسشىلارى قازىر سۇرانىستىڭ جوقتىعىن العا تارتىپ, باعا ماقتا ساپاسىنا بايلانىستى دەپ مالىمدەدى.
تۇركىستان وبلىسى
