وسىعان بايلانىستى وبلىس اكىمى نۇرلىبەك نالىباەۆتىڭ توراعالىعىمەن وتكەن ماجىلىستە ايماق باسشىسى وپەراتورلاردان ساتىلىم ءليميتىن الىپ تاستاۋدى تالاپ ەتىپ, گاز تاپشىلىعىن قولدان جاساۋعا تىيىم سالدى.
«وپەراتورلاردىڭ گازدى تالونمەن ساتۋىنىڭ سەبەبىن جاقسى بىلەمىز. ولار جەكە جانە زاڭدى تۇلعالارمەن كەلىسىمگە كەلىپ, سولاردى گازبەن تولىق قامتاماسىز ەتۋگە جۇمىس جاساپ وتىرعانى ەشكىمگە قۇپيا ەمەس. الەۋمەتتىك گازدى تەك حالىققا ساتۋ كەرەكتىگىن بىلتىر دا قاتاڭ ەسكەرتكەنبىز. بۇل ماسەلەدە مەن حالىقتى قولدايمىن, قاراپايىم تۇرعىن گاز تاپشىلىعىنان زارداپ شەكپەۋى كەرەك. گاز قۇيۋ بەكەتتەرىندە كەزەك بولماۋىن قاداعالاپ, قازىرگى قويىلعان ءليميتتى الىپ تاستاڭىزدار», دەدى وبلىس باسشىسى.
ەنەرگەتيكا مينيسترلىگىنىڭ 26 ماۋسىمداعى №233 بۇيرىعىنا سايكەس سۇيىتىلعان گازدىڭ باعاسى 1 شىلدەدەن باستاپ وسكەنى بەلگىلى. وسى كۇنى وڭىردە 1 ليتر ءۇشىن شەكتى بولشەك ساۋدا باعاسى 70, ال وبلىس ورتالىعىنان 200 شاقىرىمنان استام قاشىقتا ورنالاسقان شالعاي اۋدانداردا 75 تەڭگە بولىپ تۇر. جاز ايلارىندا تۇركىستان وبلىسى مەن شىمكەنت قالاسىندا گاز تاپشىلىعى قاتتى بايقالدى. ۇلىتاۋ وبلىسىندا باعا بۇرىن 76-81 تەڭگە بولسا, قازىر 84-89 تەڭگەگە جەتىپ, ءبىزدىڭ وڭىرمەن سالىستىرعاندا ەداۋىر كوتەرىلگەن. وسىدان-اق قىزىلورداداعى ارزان گازدىڭ قايدا جىلىستاپ جاتقانىن شامالاۋعا بولادى.
جيىندا جاۋاپتى باسشىلارعا گازدىڭ باسقا وڭىرلەرگە تاسىمالدانباۋىنا تۇركىستان, ۇلىتاۋ, اقتوبە وبلىستارىنىڭ شەكاراسىنا تاۋلىك بويى كەزەكشىلىك قويۋ تاپسىرىلدى. باسەكەلەستىكتى قورعاۋ جانە دامىتۋ دەپارتامەنتى قىزىلوردا قالاسى جانە اۋدان اكىمدەرىمەن بىرلەسىپ, بارلىق وپەراتوردىڭ گاز قورىنا مونيتورينگ جۇرگىزىپ, تالونمەن ساتۋ بارىسىن, ونىڭ باعاسىن زەرتتەۋگە ءتيىس. ەگەر زاڭناما تالاپتارى بۇزىلسا, ناقتى شارا قولدانىلادى.
وبلىستىق كاسىپكەرلىك جانە ونەركاسىپ باسقارماسىنىڭ باسشىسى بەكبولات شارىپبەكوۆ ماسەلەگە وراي حابارلاما جاسادى. وسى كۇنى وبلىس اۋماعىندا 25 وپەراتور 210 اۆتوگاز قۇيۋ بەكەتى ارقىلى سۇيىتىلعان مۇناي گازىن ساتىپ وتىر. قىركۇيەك ايىنا ايماققا 7 184 توننا گاز بولىنگەن.
وپەراتورلار كوممەرتسيالىق گازدى ءوز قاراجاتىنا الۋى كەرەك. ال الەۋمەتتىك گازدى جوعارى باعامەن ساتقاندار جاۋاپكەرشىلىككە تارتىلادى. ايماق باسشىسى وپەراتورلارمەن كەزدەسۋىندە وسىنى قاتاڭ ەسكەرتىپ, جەڭىلدىكپەن ساتىلاتىن جانار-جاعارمايدان پايدا كورۋدى كوزدەيتىندەرمەن كەلىسىمشارت بۇزىلاتىنىن ەسكەرتتى.
«مەملەكەت قولداۋىمەن تومەن باعادا اكەلىنگەن گازدى پايدا كورۋ ءۇشىن بيزنەس وكىلدەرىنە, جۇك كولىكتەرىنە, سىرتقا ساتاتىن كومپانيالار كەسىرىنەن گاز تاپشىلىعىن قولدان جاساپ وتىرمىز. جەڭىلدىكپەن ساتىلاتىن گاز الەۋمەتتىك تاۋار بولعاندىقتان ونىڭ يگىلىگىن الدىمەن قاراپايىم حالىق كورۋى كەرەك. كاسىپكەرلەردى قولدايمىز ارينە, بىراق ولاردى جۇرتشىلىق ەسەبىنەن جارىلقاۋدىڭ ءجونى جوق. تۇرعىنداردى 100 پايىز قامتاماسىز ەتكەننەن كەيىن عانا ارتىلعانىن ساتۋعا بولادى. اۆتوگاز بەكەتتەرىندە كەزەك, ليميت قويۋ, باسقا دا شەكتەۋلەر مۇلدە بولماۋعا ءتيىس. جاۋاپتى باسشىلار كۇندەلىكتى رەيد ۇيىمداستىرىپ, ساتۋ بارىسىن تەكسەرۋى قاجەت. جوعارى باعا قوياتىن, گازدى ماقساتىنا ساي ساتپايتىن كاسىپكەرلەرمەن كەلىسىمشارت بۇزىلادى», دەدى نۇرلىبەك ماشبەك ۇلى.
باعانى رەتتەۋدىڭ امالى رەتىندە جيىندا «بايقوڭىر» اكك جانىنان بىرىڭعاي وپەراتور قۇرىپ, گاز قورىن ساقتاپ, ساتۋ جايىندا ۇسىنىس ايتىلدى. كورپوراتسيا ون كۇن ىشىندە ءتيىستى ۇسىنىس بەرىپ, ماسەلەنى قولعا الۋى كەرەك.
قىزىلوردا
