ەكى بولىمگە قۇرىلعان كونتسەرت ساحنا تورىندە سان الۋان جانرداعى بي ونەرىنىڭ جاۋھارلارىن جارقىراتا كورسەتتى.
– ترۋپپامىزدىڭ جازعى دەمالىستان كەيىن كورەرمەندەردىڭ الدىنا العاش شىعۋى بولعاندىقتان ءبىز بۇل كەشكە اسا ىجداعاتتىلىقپەن دايىندالدىق. ارتىستەرىمىز دە كورەرمەنىن ساعىنىپ قالىپتى. ءوزىڭىز كۋا بولعانداي, باعدارلامامىزدىڭ «Nomad Dance Gala» دەپ اتالاتىن ءبىرىنشى بولىمىندە وتاندىق تالانتتى دا جاس بالەتمەيستەرلەردىڭ تۋىندىلارى مەن ۇلتتىق نومىرلەر تانىستىرىلدى. البەتتە, كەش پرەمەراسىز وتپەيدى. قازاق ۇلتتىق حورەوگرافيا اكادەمياسى دايىنداعان «اسان مەن ۇسەن» كوڭىلدى جاڭا ءنومىرى بالەت جانكۇيەرلەرىنە توسىن جاڭالىق بولعانى ءسوزسىز. ال كەشىمىزدىڭ ەكىنشى بولىمىندە ءبىز XX عاسىر جاۋھارى – ن.ريمسكي-كورساكوۆتىڭ مۋزىكاسىنا كەمەڭگەر حورەوگراف م.فوكيننىڭ «شەحەرازادا» بالەتىن ۇسىندىق. سپەكتاكلگە ارنالعان ستسەنوگرافيانى ۇزدىك تەاتر سۋرەتشىلەرىنىڭ ءبىرى ل.باكست جاساعان بولاتىن. ول – سانكت-پەتەربۋرگ پەن پاريجدە كوپ جۇمىس ىستەگەن, وتكەن عاسىردىڭ باسىندا ەكزوتيكا مەن وريەنتاليزم ەرەكشەلىگىندەگى ەۋروپالىق ءسان ۇلگىلەرىنىڭ شىعارۋشىسى بولعان كانىگى شەبەر مامان, – دەدى «استانا وپەرا» بالەت ترۋپپاسىنىڭ كوركەمدىك جەتەكشىسى, رەسەيدىڭ حالىق ءارتىسى التىناي اسىلمۇراتوۆا.
تەاتر گالا كەشتە جەتەكشى سوليستەردىڭ, سونداي-اق كوردەبالەت ارتىستەرىنىڭ قاتىسۋىمەن بولاتىن نومىرلەردى كورەرمەن نازارىنا ۇسىندى. ولار جەكە جانە دۋەتتە ونەر كورسەتتى. كونتسەرتتىك باعدارلاما «تۇران» ەتنو-فولكلورلىق ءانسامبلىنىڭ مۋزىكاسىنا قويىلعان انۆارا سادىقوۆا مەن المات شامشيەۆتىڭ حورەوگرافياسىنداعى «جارمەڭكە» نومىرىمەن اشىلدى. سونداي-اق بۇل كەشتە ءامينا كيسەمباەۆا مەن بالەت ارتىستەرى انۆارا سادىقوۆانىڭ تاعى ءبىر اۆتورلىق قويىلىمى – «Steppe Sons» التەرناتيۆ-فولك توبىنىڭ مۋزىكاسىنا قويعان «سارماتتىق ابىز ايەل» ءنومىرىن دە ناقىشىنا كەلتىرە ورىندادى.
ال پاتريك دە بانانىڭ قويىلىمىنداعى «دالا ءۇنى» بالەتىنەن اداجيونى قازاقستاننىڭ ەڭبەك سىڭىرگەن قايراتكەرى ايگەرىم بەكەتاەۆا مەن عالىمجان نۇرمۇحامەت, ولجاس تارلانوۆ پەن اسەل شايكەنوۆانىڭ تاماشا تاندەمى تانىستىردى. سونىمەن قاتار مازمۇندى باعدارلاماعا اتاقتى بالەتمەيستەردىڭ حورەوگرافياسىنداعى تاعى ءبىر جارقىن ءنومىر – «تۇران» ەتنو-فولكلورلىق ءانسامبلىنىڭ مۋزىكاسىنا قويىلعان «قيلى زامان» ءنومىرى ەنگىزىلىپ, ونى سۇلتانبەك عۇمار كاسىبي جوعارى دەڭگەيدە ورىنداپ شىقتى. عاجايىپ ءارى قىزىقتى ۇلتتىق ءنومىردى ەلوردالىق كورەرمەندەر اسا زور ىقىلاس ءھام تولاسسىز قوشەمەتپەن قارسى الدى.
ەكى كۇن قاتارىنان كورسەتىلگەن بۇل گالا كەشتە كورەرمەن قاۋىم ارتىستەردىڭ قوس قۇرامىنىڭ دا شەبەرلىگىنە باعا بەرۋگە تاماشا مۇمكىندىك الدى. اسىرەسە كوپشىلىكتىڭ كوڭىلىنەن شىققان جارقىن بالەت – «شەحەرازادانى» قوس قۇرام ويىنىندا سالىستىرا تاماشالاپ, شىنايى باعا بەرۋدىڭ ءساتى دە وسى جولى ءتۇستى. اتاپ ايتساق, ايتۋلى سپەكتاكلدە التىن قۇلدىڭ باستى پارتياسىن سەرىك ناقىسپەكوۆ پەن قازاقستاننىڭ ەڭبەك سىڭىرگەن قايراتكەرى باقتيار ادامجان ورىنداسا, زوبەيدانى قازاقستاننىڭ ەڭبەك سىڭىرگەن قايراتكەرى ايگەرىم بەكەتاەۆا مەن اناستاسيا زاكلينسكايا تانىستىردى. ءسوزسىز, بۇل گالا كەش بالەت ماۋسىمىنىڭ ەڭ جارقىن وقيعالارىنىڭ ءبىرى بولعانى انىق.
ماۋسىماشار كونتسەرتتىڭ تاعى ءبىر ەركشەلىگى وتكەن تەاتر ماۋسىمىندا بالەتمەيستەرلىك قىرىمەن دە كوپشىلىك كورەرمەننىڭ ىقىلاسىنا بولنگەن سوليست سۇلتانبەك عۇمار بۇل كەشتە «Mangurt» جانە «رۋح» دەپ اتالاتىن قوس تۋىندىسىن ۇسىندى. ولاردى نيما توكوۆ, كاميلا ورمانوۆا, يسلام قايىپباي, ايدان قالجان جانە «استانا وپەرا» ارتىستەرى ءساتتى ورىنداپ شىقتى. ودان بولەك, ايتۋلى بالەتتىك جارقىن باعدارلامادا عازيزا مولداحمەتتىڭ ورىنداۋىندا «سىعان ءبيى», قازاقستاننىڭ ەڭبەك سىڭىرگەن قايراتكەرى انەل رۇستەموۆا مەن جاقسىلىق ساۋقىمبەكوۆتىڭ ينتەرپرەتاتسياسىندا «اڭساۋ» نومىرلەرى تانىستىرىلدى. قورىتا ايتقاندا, «Nomad Dance Gala» كەشى ەلىمىزدەگى حورەوگرافيا ونەرىنىڭ بىرەگەي ءستيلىن ىزدەۋگە دەگەن تالپىنىستى عانا كورسەتىپ قويماي, سونىمەن قاتار وتاندىق بالەتتى جاڭا ءھام اناعۇرلىم جوعارى دەڭگەيگە كوتەرگەنى ءسوزسىز.
