سۋرەت: facebook.com/mcudprk.kz
سانيتارلىق-ەپيدەميولوگيالىق ساراپتاما ورتالىعى بيولوگيالىق قاۋىپسىزدىك تۋرالى زاڭدى ىسكە اسىرۋ اياسىندا بيولوگيالىق قاۋىپسىزدىك سالاسىندا ەلدەگى عانا ەمەس, ورتالىق ازياداعى العاشقى رەفەرەنس-زەرتحانا اتانىپ وتىر. بۇل مارتەبە – ورتالىقتىڭ زەرتحانالارى ەۋرازيالىق ەكونوميكالىق كوميسسيا القاسىنىڭ 2022 جىلعى 31 مامىرداعى №22 «ەۋرازيالىق ەكونوميكالىق وداققا مۇشە مەملەكەتتەردىڭ رەفەرەنس-زەرتحانا جۇيەلەرىن قۇرۋ تۋرالى» ۇسىنىمدارىنا ساي كەلەتىنىن ايعاقتايدى. وزىق تەحنولوگيالارمەن جابدىقتالعان ورتالىقتىڭ رەفەرەنس-زەرتحانا رەتىندە اككرەديتتەلۋى حالىقتى سانيتارلىق-ەپيدەميولوگيالىق قىزمەتپەن قامتۋدا ماڭىزدى ءرول اتقارادى. سونىڭ ىشىندە جەرگىلىكتى تاۋار وندىرۋشىلەردىڭ ءونىمىن زەرتتەپ, قاۋىپسىزدىگىن حالىقارالىق دارەجەدە راستاۋ قىزمەتىن جەڭىلدەتەدى. ورتالىقتىڭ زەرتحانالارىندا جاسالعان ساراپتامالار زەرتحانالاردى اككرەديتتەۋ جونىندەگى حالىقارالىق قاۋىمداستىقتىڭ (ILAK) قۇرامىنداعى 112 ەلدە مويىندالادى. دەمەك رەفەرەنس-زەرتحانا تاۋارلاردىڭ قاۋىپسىزدىگىنە الاڭدايتىن تۇتىنۋشىلارعا عانا ەمەس, كاسىپكەرلەرگە, ياعني تاۋار وندىرۋشىلەر ءۇشىن دە ءتيىمدى.
سانيتارلىق-ەپيدەميولوگيالىق ساراپتاما ورتالىعىنداعى زەرتحانانىڭ قىزمەتىن تەك مەملەكەتتىك قۇرىلىمدار عانا ەمەس, جەكە ۇيىمدار دا پايدالانا الادى. ياعني بيزنەسكە ءونىمدى ەكسپورتقا شىعارۋ ءۇشىن نەمەسە ءوز وبەكتىلەرىندە وندىرىستىك باقىلاۋ ءۇشىن ورتالىقتىڭ زەرتتەۋ ناتيجەلەرى پايدالى بولۋى مۇمكىن. بۇل جونىندە ساراپتاما ورتالىعىنىڭ باسشىسى ساۋلە ءشارىپوۆا تولىعىراق ايتىپ بەردى.
– ءبىزدىڭ سىناق زەرتحانامىز تاۋەلسىز, تەحنيكالىق مۇمكىندىگى دە مول. سىناق ناتيجەلەرىنىڭ ساپاسى كۇمانسىز. اككرەديتتەلگەن زەرتحانانىڭ ساراپتامالارى حالىقارالىق دەڭگەيدە مويىندالادى. بۇل وندىرۋشىلەردىڭ جانە ەكسپورتتاۋشىلاردىڭ شىعىنىن ازايتادى, ولار زەرتتەۋلەردىڭ كەڭ سپەكترىن ەسكەرە وتىرىپ, بەلگىلى ءبىر ونىمگە تولىققاندى ساراپتاما جاساي الادى. شەتەلدە قايتا سىناق جۇرگىزىپ قوسىمشا شىعىنعا ۇشىرامايدى, – دەدى س.ءشارىپوۆا.
پرەزيدەنت ءىس باسقارماسى مەديتسينالىق ورتالىعى باسشىسىنىڭ ورىنباسارى ليۋدميلا بيۋرابەكوۆا مۇنداي رەفەرەنس-ورتالىق جۇمىس ساپاسىنىڭ سىرتقى باعالاۋ جۇيەسىن جەتىلدىرەتىنىن ايتادى. سونىمەن قاتار دياگنوستيكالىق كۇردەلى جاعدايلاردا زەرتتەۋ جۇرگىزۋدىڭ ماڭىزدى ەلەمەنتى سانالادى ەكەن.
– سانيتارلىق-ەپيدەميولوگيالىق ساراپتاما ورتالىعى جوعارى دالدىكتەگى بىرەگەي زەرتحانالىق جابدىقتارمەن جاراقتاندىرىلعان. مۇندا جوعارى بىلىكتى ماماندار ەڭبەك ەتەدى. وسىنىڭ ارقاسىندا كۇردەلى زەرتتەۋلەردى ساپالى ءارى جەدەل جاساۋعا جول اشىلادى. بۇل – ەلىمىزدە بيولوگيالىق قاۋىپسىزدىك جۇيەسىن قۇرۋدا وتە ماڭىزدى, – دەيدى ل.بيۋرابەكوۆا.
ساراپتاما ورتالىعىنىڭ زەرتحاناسىندا اۋا, سۋ, توپىراق سەكىلدى سىرتقى ورتا وبەكتىلەرىنە, سونداي-اق تاماق ونىمدەرىنە, پوليمەرلى ماتەريالدارعا جانە باسقا دا ءونىم تۇرلەرىنە كەشەندى زەرتتەۋ جۇرگىزۋگە بولادى. رەفەرەنس-زەرتحانانىڭ تۇپكى ماقساتى وتاندىق ءوندىرىستى قولداۋ عانا ەمەس, قورشاعان ورتانى ساقتاۋعا جانە حالىقتىڭ سانيتارلىق-ەپيدەميولوگيالىق ساۋاتىن قامتاماسىز ەتۋگە نەگىزدەلگەن.
ورتالىقتىڭ 8 زەرتحاناسىندا باكتەريولوگيالىق, پارازيتولوگيالىق, مولەكۋليارلىق-گەنەتيكالىق, سانيتارلىق-حيميالىق, توكسيكولوگيالىق, حروماتوگرافيالىق زەرتتەۋلەر جۇرگىزىلەدى. ديوكسيندەر انىقتالادى جانە فيزيكالىق فاكتورلار ۇلتتىق جانە حالىقارالىق ستاندارتتارعا سايكەس ولشەنەدى. بۇدان بىلاي ورتالىقتىڭ ماماندارى قىزمەتى تاماق ونىمدەرى, اۋىزسۋدى وندىرۋمەن, ساقتاۋمەن, تاسىمالداۋمەن جانە وتكىزۋمەن, بالالاردى تاربيەلەۋمەن, وقىتۋمەن, حالىققا كوممۋنالدىق جانە تۇرمىستىق قىزمەت كورسەتۋمەن بايلانىستى كاسىپورىندارعا ترەنينگتەر مەن سانيتارلىق-گيگيەنالىق ءدارىس وتكىزىپ تۇرادى.
ماۋسىمدا ورتالىق بازاسىندا ەۋروپالىق كوميسسيانىڭ قولداۋىمەن حالىقارالىق ترەنينگ ورتالىعى مەن ۋىتتى-اقپاراتتىق ورتالىق اشىلعان. ورتالىق ۇجىمى 775 مىڭنان استام زەرتتەۋ جۇرگىزگەن. زەرتتەۋلەردىڭ سانى بىلتىرعىدان ەكى ەسە كوپ.
